7
Tungkhipaw, Maee, Tounawpaw Arui
1 E hynh Bawipaw PACHIA nynh kae yn muihsahpaw nynh thua: siapharan kya-e lonua ku kha aw athua koute, lonua bua yn po takaw ccyh khe, Bawipaw nynh tungkhipaw hae kha a rae cih.
2 Tuh-e hae nynh ram lungkhu e lonua hae kha he a ae kou hae te, kae nynh,
“Pou Bawipaw PACHIA,
beih ngaethya hae, cite kae ngia!
Pawtemou Jakob tuh a thadyn kho cih?
Aning tuh myarya dihpaw nynh thua!” ka cipya.
3 E konglang te Bawipaw tuh
a lungpaleihkuh zah,
“E hynh cyihkuh vae lan khyh,” cite
4 E hynh Bawipaw PACHIA nynh kae yn muihsahpaw nynh thua: Bawipaw PACHIA nynh maee te bya a pia cih zah, tuh-e maee nynh rilipi te laephi kha a u cih.
5 Tetuh kae nynh,
“Pou Bawipaw PACHIA,
beih umtawtua, cite kae ngia!
Pawtemou Jakob tuh a thadyn kho cih?
Aning tuh myarya dihpaw nynh thua!” ka cipya.
6 E konglang te Bawipaw tuh
a lungpaleihkuh zah,
“E hynh mah cyihkuh lan khyh,” cite
Bawipaw PACHIA nynh a ci.
7 E hynh Bawipaw nynh bua yn muihsahpaw nynh thua: Bawipaw tuh tounawpaw arui kha a kuih kya ccyngkuh zah, tounawpaw arui te raekuhpaw pang pe khe a thadyn.
8 Te Bawipaw nynh kae kha, “Amos, pawmou na muih?” cite yn khia zah, kae nynh, “Tounawpaw arui kha nynh ka muih,” cite ka khung. Tetuh Bawipaw nynh,
“Dotua, ka ccungccaw Israel hae ngaelung khe
tounawpaw arui kha ka nung cih;
minmin kha papin bua
ka ngaesangpah vae lan khyh hae;
9 Isak kya-e ahangpaw hmin hae tuh
ccungccaw adae cih zah,
Israel a beikinnthyaa hae tuh
ro athua cih hae,
Jeroboam ciihan hae kha thaloi te
ka thonuakuh cih hae,” a ci.
Amaziah te Amos
10 Tetuh Bethel ranpibawi Amaziah nynh Israel siapharan Jeroboam kalan saw hae zah, “Amos nynh nang kha rawsete Israel hae ngaelung khe aruh lante a paccynku vae; a hopaw bya balyn kha ram pynpi nynh ngaesang kho vae khyh.
11 Amos nynh hynhte a ho:
‘Jeroboam tuh thaloi te a chih cih,
Israel tuh a kyng cih hae zah,
a ram kyate asawnaw lang
a cciakhae cih hae,’ a ci,” cite a hopya.
12 Te Amaziah nynh Amos kha, “Pou profeh, cceih, Judah ram lang ccaring ccue lah, tuin kyakhe profehbya hote na vue la kuakuh.
13 Bethel khua kya profehbya papin ho nan vae, pawccecize Bethel tuh siapharan beikinnthyaa thua zah, ram pynpi beikinn nynh thua,” a cipya.
14 Tetuh Amos nynh Amaziah kha, “Kae tuh profeh ka thua khyh, profeh ccapaw mah ka thua khyh; kae tuh sahiin a rinpaw ka thua zah, thaeku ku hae kha a do-oihtupaw nynh ka thua.
15 Bawipaw nynh sahiin phu ka rinnaw kyate kae kha yn ko zah, ‘La cceih lah, ka ccungccaw Israel hae kya profehbya la ho,’ yn cipya.
16 “Tukeiccuze, atu Bawipaw bya kha ngaetua.
Nang nynh, ‘Israel kha rawsete
profehbya ho nan, Isak ciihan kha
rawsete phungho nan,’ na ci.
17 Tukeiccuze Bawipaw nynh hynhte a ho:
‘Na zu tuh khuapi kya ohhuanung lang
a tang cih zah,
na ccanung hae te na ccapaw hae tuh
thaloi te a chih cih hae,
na laephi kha tounawpaw rui te
a tou cih hae zah a neekuh cih hae;
nang tuh athyaa leipaw ram kya na chih cih,
Israel tuh a kyng cih hae zah
a ram kyate ccaring a cciakhae
ccaccing cih hae,’ a ci,” cite a hopya.