7
Stefen Byaliarunaw
1 Ranpibawi lupi nynh, “Tuh-e bya tuh tuhte athua tou?” cite a khia.
2 Stefen nynh khung zah:
“Uteno hae te paaw hae, la ngaetua oh: Ah minpaaw Abraham nynh Haran kya a um maw, Mesopotamia ram kya a um lyaze phu-enaw Pachia nynh a kya yn langkuh zah,
3 ‘Na umnaw ram te na puizia hae kha cciataw hae lah kae muihsah cih paw ram langkhe cceih,’ a cipya.
4 Abraham nynh Kaldia ram kha cciataw zah Haran kya a um; a paaw a chih koute atu nanning na umnaw oh hynh-e ram kalan hin Pachia nynh a nuesaku.
5 E ram kya ccuphe lyh sanmah Pachia nynh amaw kha rho lang pya khyh; tuhzemah ccaaw lu kheit san a saah mawze amaw te a ciihan hae hanlan e ram hynh rho lang kae pya cih cite Pachia nynh bya a kinpyaku vae.
6 Pachia nynh hynhte a ho: A ciihan hae tuh ramccang lang a um cih hae, te minmin tuh seetangnaw kalan cciakhae athua cih hae zah kum za pali lungkhu a tuaasah cih hae.
7 ‘Minmin nynh rya a lawpya hae paw minphuin kha bya ka pia cih; tukoute tuin ram kyate a pou cih hae zah hynh-e hmin kya kamaw kha yn beik cih hae,’ cite Pachia nynh a ho.
8 Pachia nynh vingdungawkunaw te asekuhpaw byakinnaw kha Abraham kalan a pya. Tukeiccuze Abraham nynh Isak kha saah zah nin taryanaw nin kya vingdung a awpya; te Isak nynh Jakob a saah, Jakob nynh ciihan kyaze paaw hae lu haw lae ning kha a saah.
9 “Ciihan kyaze paaw hae nynh eiungnaw hoi hae zah Josef kha Izip ram lang a zua hae; thuasalama Pachia tuh Josef kya um zah,
10 a vawsawnaw balyn kyate luesah zah Izip siapharan Faro malang maehoynaw te hawnaw kha a pya; Faro nynh Izip ram uktu lang te a innbyn balyn a uktu lang Josef kha a khang.
11 Izip ram balyn te Kanaan ram balyn kya ccakannaw te myarya lepaw vawsawnaw um zah, ah minpaaw hae tuh looh muekuh kho vae khyh hae.
12 Thuasalama Jakob nynh Izip ram kya looh a um cipaw he a thae tuh, ah minpaaw hae kha masaty a saw hae.
13 Vaeningnaw kya Josef nynh a u hae kha a nysaku hae; Faro nynh mah Josef a puizia hae kha a ny hae.
14 Josef nynh a paaw Jakob kha byataw zah a puizia hae balyn sung sari lu pangaw kha amaw kalan a kobua hae.
15 Jakob tuh Izip ram lang a cceihbung. Tuin kyakhe Jakob te ah minpaaw hae tuh a chih hae.
16 Minmin kha Shekhem khua lang cciakhae hae zah Shekhem kya umpaw Hamor a ccaaw hae kya-e Abraham nynh phua te a repaw shawku kyakhe a uu hae.
17 “Thuasalama Pachia nynh Abraham kya bya a kinpyakupaw accingnaw ccyh he anae tuh tuh-e ccungccaw hae tuh Izip ram kya pungthung hae zah,
18 Josef kha a nyh leipaw ccangpaw siapharan alangkuh cia a lungthung hae.
19 Tuh-e paw nynh aening ah minphuin hae kya thyaruhnaw hoi zah mih ccaaw taraw hae kha a chi ccaw hae cite ccaring vua lan ah minpaaw hae kha a nangse hae.
20 Tuh ccyh lyatuin myarya puithyapaw Moses tuh pui zah a paaw inn kya sah thum cia a kua hae.
21 Aning kha he a vua hae te, Faro ccanung nynh khuinkuh zah a ccapaw lang a kuaku.
22 Moses tuh Izip ccungccaw hae kya-e hawnaw balyn kha marya ccangkuh zah byahonaw kya te ryalawnaw kya a thungpaw nynh thua.
23 “Moses tuh kum sung pali he accing te, Israel ccungccaw hae a uno hae kalan pae rynaw thinlung yn hoi.
24 A unopaw lu kheit kha Izip paw nynh a tuaa a sahpaw kha he a muih tuh, pankhaw zah a hanlan phulawpya te Izip paw kha phe a buatheih.
25 Pachia nynh amaw kha mangte minmin kha oun luesah cih hae cipaw tuh a uno hae nynh mang a thaethya cih hae cite Moses nynh a tuaku; thuasalama minmin nynh thaethya khyh hae.
26 Awkhualan mimaw te mimaw a pekuh hae paw kalan khe cceih zah, ‘Uteno hae, nanning tuh uteno khaw na thua oh, pawccemou naemaw te naemaw na peku oh?’ cite a ccawku nawlan hae a hopia hae.
27 Thuasalama a innpaw paw kha atazae leite a cyihtupaw nynh Moses kha ccaring tu zah, ‘Hum nynh mou nang hynh kaening tungvaw uktu lang te byapiatu lang ae nung?
28 Inkhawnin Izip paw na chia hawte kae hynh chia lan tou nae ry?’ a cipya.
29 Tuh-e bya tuh Moses nynh he a thae te, ccue zah Midian ram kyakhe mikhiapaw lang a tang, tuin kya ccapaw lu ning a saah.
30 “Kum sung pali he aro tuh Sinai mua kin ramkaw e thabu kya aruapaw maeesoi kyakhe Bawipaw vaawpaw tuh Moses kalan yn langkuh.
31 Tuh-e tuh Moses nynh he a muih tuh, a ngaeangthua zah a pe langte do lan cite he a naekuh tuh Bawipaw kyate roi nynh a kalan yn ccae zah,
32 ‘Kae tuh na minpaaw hae Pachia, Abraham Pachia, Isak Pachia te Jakob Pachia nynh ka thua,’ a cipya. Moses tuh thyngkuh zah do ngan vae khyh.
33 Bawipaw nynh, ‘Na phanah kha na ccu kyate khahkuh, pawccecize na thadynnaw hmin tuh athyaapaw laephi nynh thua.
34 Izip ram e ka ccungccaw hae riathaenaw kha phe ka muih ccaccing vae, mih siaruanaw roi kha ka thae zah minmin kha luesah khylan nynh kae rungbung; atu rang lah nang kha Izip ram lang kae saw cih,’ a cipya.
35 “ ‘Hum nynh mou nang hynh uktu lang te byapiatu lang ae nung,’ cite minmin nynh a vua hae paw tuh-e Moses ccaccei kha Pachia nynh thabu kya yn langkuhpaw vaawpaw liate uktu lang te luesahtu lang a sawpaw nynh thua.
36 Aning nynh Israel ccungccaw hae kha poukhae hae zah Izip ram, Rili Se te ramkaw kyakhe kum sung pali lungkhu ngaeangnaw te muihsahnaw kha a langsahpya hae.
37 ‘Pachia nynh nae uno hae kyate kamaw alopaw Profeh lu kheit kha nae hanlan yn pousah cih, amaw bya kha na ngae cih oh,’ cite Israel hae kya a hotupaw tuh hynh-e Moses nynh thua.
38 Aning tuh ramkaw kya a sueluakuh hae paw Israel hae kya thuasah, Sinai mua kya amaw kalan bya a hopahpaw vaawpaw ryte thuasah, aening ah minpaaw hae ryte thuasah a la umkheih hae paw nynh thua; aning tuh aening kalan pya lanpaw ahiinpaw bya kha a muepaw nynh thua.
39 A bya kha ah minpaaw hae nynh la ngae ry khyh hae; amaw kha vua hae zah mih thinlung kyate Izip ram lang bua a ki ry hae,
40 Aaron kyakhe, ‘Kae malang a cceih lanpaw pachia hae kha oun raepah; Izip ram kyate oun cciakhaepaw hynh-e Moses tungvaw kya pawmou acyikuh cipaw kae nyh vae khyh,’ cite a hopya hae.
41 Tuh ccyh lyakhe minmin nynh vaetuataw kha raekuh hae zah tuh-e zohtuh kalan khe silawkunaw a rae hae. Mimaw mih kuih te a raeku hae paw kyakhe mih lungpaw.
42 Pachia nynh minmin kha maetawkuh hae zah vaawlang e uccaw hae kha beik khylan a vua vae hae. Profeh hae ccauh kyaze,
‘Pou Israel hae, nanning nynh
ramkaw kya kum sung pali lungkhu
na chia oh paw sahiin hae te
silawnawpaw hae kha
kamaw kalan nae pya oh zawtou?
43 Moloh pachia bu te
nae pachia Refan kya-e awsi,
beik lan na raeku oh paw
zohtuh hae kha na phuku oh;
tukeiccuze kae mah nanning kha
Babilon khuapi khunglang
kae nue cih oh,’
cite azeiku hawte nynh athua.
44 “Aening ah minpaaw hae nynh ramkaw kya a um lya hae khe, Pachia tuh kae kya a um cinawpaw ccaekia lang beikbu a la hoi hae; tuh-e beikbu tuh Pachia nynh Moses a hopya hawte, Moses nynh a muihpaw pungsan thyhte a sakpaw nynh thua.
45 Pachia nynh mih malang te a deepya hae paw ccangpaw minphuin hae ram kha ah minpaaw hae nynh he a ccou hae te, tuh-e beikbu tuh Joshua ryte a teekhae hae. Tuh-e beikbu tuh David she kyacia tuin kya po a um.
46 David tuh Pachia kya-e maehoynaw kha mue zah Jakob Pachia a umnaw lanpaw inn saknaw kaw kha Pachia kalan a ngia.
47 Thuasalama Solomon nynh Pachia hanlan beikinn kha a sak.
48 Tuhzemah Ahang Huaccepaw Pachia tuh kuih te raepaw beikinn kya um khyh;
49 ‘Vaawlang tuh
ka bawitungkhung thua zah
laephi tuh ka ccu synaw nynh thua;
pawcihawpaw inn mou
nae sakpah cih oh?
Bawipaw nynh a ci.
Tuhkhyhze ka haeungnaw hmin tuh
pawcihawpaw mou athua?
50 E hae balyn tuh ka kuih te
ka raepaw thua khyh tou? a ci,’
cite profeh nynh a ho hawte nynh thua.
51 “Nae lungkhung zah thinlung kya te nakaring kya vingdungawkuh lei hae paw ccungccaw hae, Thyaa Muisaw kha palei na rawse oh; nae minpaaw hae nynh a cyi hae hawte na cyibua oh.
52 Nae minpaaw hae nynh profeh hum kha mou tuaasah leite a nung hae? Adingpaw Ccungccapaw yn thuanaw lanpaw kong a hopah ty hae paw kha minmin nynh a chia hae; atu nanning tuh tuh-e Adingpaw a pheetu hae te a theihtu hae nynh na thua oh.
53 Nanning tuh vaaw hae paccynpyanaw liate kawbya kha na mue oh zemah na zui khyh oh,” a ci.
Stefen kha Lung te Deihnaw
54 Minmin nynh hynh-e bya kha he a thae hae tuh, mih bungpaw zah Stefen kha mih hawzynua hae.
55 Thuasalama Stefen tuh Thyaa Muisaw te phe beih zah vaawlang khe riri dothung zah Pachia phu-enaw te Pachia ranglang a thadynpaw Jesu kha a muih.
56 Stefen nynh, “Dotua oh, vaawlang ahungkuhpaw te Ccungccaw Ccapaw nynh Pachia ranglang a thadynpaw kha ka muih!” a ci.
57 Minmin nynh mih nakaring kha mih kuih te huhkuh hae zah thawte sia hae zah Stefen kha a ccuenua hae.
58 Khuapi atolang khe sue hae zah lung te a deih hae; ccaekia hae nynh mih boeining hae kha Saul a ci hae paw ccangvaepaw cculeihpaw khe a pum hae.
59 Lung te a deih lya hae khe Stefen nynh sawsang zah, “Bawipaw Jesu, ka muisaw hynh yn lawpah,” a ci.
60 A ccukharutung zah, “Bawipaw, mih seinaw hynh beih ccuinpah nan hae,” cite thawte a sia. Tuhte a ho koute a chih.