27
Rom lang Paul A Cceih
1 Kaening tuh Italy ram lang sanphalung te cciakhae lan cite bya he a pae hae tuh, minmin nynh Paul te ccangpaw thongccah hae kha Aukastas rhawkawphu kyaze rhawbawipaw Julias kalan khe a ap hae.
2 Adramyttium sanphalung lungkhu lang kae tee zah Asia ram rili kin lang po ccia lan vae cite eenaw te kae thokuh. Mesidonia ram e Thesalonika khuapaw Aristarkhas tuh kaening ryte a cceihbua.
3 Awkhualan tuh Sidon khua kya kae thua; Julias nynh Paul kha thawccih zah a ban hae kalan ccianaw kaw te tuh-e hae nynh do-oihnaw kaw kha a ua.
4 Tuin kyate kae thokuh zah khisan nynh arawsekuh lante azaw keiccuze Saipras tuikoih kya-e khisan a khawnaw langte sanphalung te kae cceih.
5 Silisia ram te Pamfilia ram e rili kya po kae cceih zah Lysia ram e Myra khua kya kae thua.
6 Tuin kya rhawbawipaw nynh Alexandria kyate Italy ram lang yn cceihpaw sanphalung kha muih zah, tuin kya oun ccisaku.
7 Byabyate nin patae kae cceih koute vawsawte Kanidas khua pe kae thua, khisan nynh oun khaw keiccuze Salmone khua te arawsekuhpaw Krete tuikoih kya-e khisan akhawnaw kalan te kae cceih.
8 Tuh-e tuh vawsawte kae lue koute, Lasia khuapi pe, ‘Puithya Haeungnaw’ a ci hae paw hmin kya kae thua.
9 Ccyh khaw aro te, Loohsung ninnote27.9 Seingaethyanaw rae nin (Lev 16.29-34) tuh phe athang vae keiccuze atu sanphalung te khuaccong tuh ri lan a um vae, tukeiccuze Paul nynh tuanaw pya hae zah,
10 “Uteno hae, atu hynh-e khuaccongnaw tuh sanphalung te uccaw hae kyalya thua leite, ah hiinnaw azo lanpaw cia ri lan a um cipaw ka ny,” a cipya hae.
11 Tuhzemah rhawbawipaw nynh Paul bya laeze pilot te sanphalung hoitu bya kha a zynhua.
12 Tuh-e sanphalung haeungnaw tuh khuaccihsaw hanlan accanthya khyh keiccuze Foenisia lang phya kho ze phya lan zah, tuin kya khuaccihsaw lungkhu um lan cite ccungccaw alunghua nynh a ry hae. Foenisia tuh Krete tuikoih kya umpaw sanphalung haeungnaw thua zah niccaw-deilang te niccaw-thahlang nynh a hawi.
Khise Atho
13 Alia lang e khisan nynh byabyate he yn zaw tuh, mih eenaw kha kae mue vae cite tuakuh hae zah, sanphalung kha supah hae zah Krete tuikoih pe varang langte anaekunaw te a cciasah hae.
14 Thuasalama khaw aro mawze “Thahlang-nithua khise” a ci hae paw khise myarya rupaw tuh Krete tuikoih kalan te yn tho vae.
15 Sanphalung nynh khisan kha taening kho vae khyh zah khisan nynh po he a cciakhae tuh kaening mah khisan zawnaw lang yn mungbia vae.
16 Kauda a ci hae paw tuikoih taraw kya-e khisan akhawnaw kya he kae thua tuh, kohlung kha a ro khyh nawlan myarya thawbangte kae khynsah.
17 Tuh-e kohlung tuh sanphalung kalan a khang kou hae te, sanphalung atyn nawlan liarue hae te a khiide hae; Syrtis tuideinaw kya yn khangkuh sei cih cite a ri hae pawte sanphalung boeidaw kha khah hae zah khisan nynh hung a mungbia vae.
18 Khise nynh myarya oun hebia pawte awkhualan tuh sanphalung kya-e phupaw hae kha a vuaban hae.
19 Nin thumnaw kya sanphalung uccaw hae kha mih kuih te a vua hae.
20 Nin patae cia khuanin te awsi hae langkuh vae khyh hae zah, khise zawpaw tuh adaehua khyh keiccuze kae lue cih cite kae ngaehoinaw balyn kha nyathya tuh pong azo vae.
21 Looh ae leite khaw a um kou hae te, Paul nynh mih ngaelaku khe thadyn zah, “Uteno hae, nanning nynh ka bya kha na la ngae oh zah Krete kyate ah ccia khyh oh ze, hynh-e ronaw te shungnaw kyate phe ah lue cih oh paw.
22 Atu zemah nae rawthung sah; pawccecize sanphalung holeite hum sanmah a hiinnaw a shungpaw um lan khyh.
23 Pawccecize kae yn hoitupaw te kae nynh ka beikpaw Pachia vaawpaw nynh atazi khe ka pe yn thadyn zah,
24 ‘Paul, rih nan; nang tuh Sizar siapharan malang na thadyn cih; nang ryte sanphalung kya na cceihkheih oh paw balyn kha Pachia nynh khynnaw ae pya cih oh,’ cite yn hopya.
25 Tukeiccuze uno hae, nae rawthung sah; pawccecize kae yn hopya thyhte yn cyihkuh cih cite Pachia kha ka zyn.
26 Tuhzemah aening hynh tuikoih ccangkhakheit kyakhe oun vua mamin cih,” cite a hopya hae.
27 Thuasalama zi haw lae palinaw he yn thua tuh, Mediterranean rili kya oun loubia lyakhe ziraccyng loukaw tuh sanphalung ryalahtu hae nynh laerou kalan kae naekuh vae cite a tua hae.
28 Tui kha he a toutua hae tuh, lang kuin akhupaw kha a muih hae; takyh asawnaw lang he a cceih hae te, bua toutua hae zah lang haw lae pangaw akhupaw kha a muih hae.
29 Lungpi kha kae diasei cih cite rih hae zah sanphalung nulang te sivawhinpi ccangpali kha tui lungkhu lang a saw hae, te khua adae nawlan saw a sang hae.
30 Sanphalung ryalahtu hae nynh sanphalung kyate zya ccue lan zuakuh hae zah sanphalung malang te sivawhinpi hae a sah hae paw o-ang lante umsakuh hae zah kohlung kha rili kalan a sawbung lya hae khe,
31 Paul nynh rhawbawipaw te rhawkaw hae kha, “E sanphalung ryalahtu hae nynh sanphalung kya a um khyh hae ze, nanning na lue kho lan khyh oh,” cite a hopya hae.
32 Rhawkaw hae nynh kohlung rui hae kha phya bae hae zah kohlung tuh tui a lousah hae.
33 Khua vyavya yn dae tuh, Paul nynh ccungccaw hae balyn kha looh ae lan thawte hopah hae zah, “Nanning tuh nae bungzou zah looh leite, pawsang ae leite atunin cia nin haw lae pali na um vae oh.
34 Tukeiccuze looh ae ccavae oh cite kae ngia oh, pawccecize looh tuh nae hiinnaw hanlan nynh thua; nanning laku hum sanmah a sangrua ccangkheit san khuakuh lan khyh,” a cipya hae.
35 Tuhte he a ho koute Paul nynh sanlou kha lawkuh zah mih balyn malang khe Pachia kalan lungtuabya hote sanlou kha eih zah a ae.
36 Minmin balyn mah mih lungngaengan zah looh a aebua vae hae.
37 Tuh-e sanphalung kya kae umpaw tuh kae balynte za ning sung sari lu taruhnote27.37 Abang ccathya hae kya tuh 275 cite um zah abang kya tuh 76 cite a um. kae cih.
38 Minmin nynh phe byn lan a ae kou hae te, sanphalung tuh a phupaw azaw ccaw cite chanvuihphaw kha rili lungkhu lang a vua hae.
Sanphalung Aroh
39 Khua he yn dae tuh, tuh-e ram tuh nyh khyh hae; thuasalama akouleihnaw san kheit kya varang lang kha muih hae zah athua kho ze tuhlang tuin sanphalung kha cciasah lan cite a paccyn hae.
40 Sivawhinpi hae kha supah hae zah rili lungkhu lang a saw hae, te zawnawpaw khiidenawpaw liarue hae kha phou hae zah malang e boeidaw kha a dawpya hae, te varang langkhe khisan a mungsah bia hae.
41 Thuasalama sanphalung tuh laesia adohpaw kha dia zah a thadyn vae, te sanphalung malang tuh laesia kya a bingku keiccuze pia kho vae khyh; thuasalama anulang tuh rili tuileih eih aru keiccuze phe a khya.
42 Thongccah hae nynh tuizeihkute a ccue khyh nawlan hae, rhawkaw hae nynh minmin kha chia lan a paccynku hae
43 thuasalama rhawbawipaw nynh Paul kha a luesah ry pawte mih paccynkunaw kha khee zah, tui a zeihthya hae paw nynh masaty toikuh hae sah lah varang lang zua hae sah;
44 te tuhlaepaw nynh thingphe hae te sanphalung akhyanahpaw thing hae te zua hae sah cite kaw a pya hae. Tuhcite minmin balyn tuh khyndadyh lan laerou kalan pong a zua hae.