23
Kungsi hae malang Paul
1 Paul nynh kungsi hae kha riri do hae zah, “Uteno hae, kae tuh atunin cia Pachia malang thinlung athyaapaw te nynh ka hiin,” a ci.
2 Ranpibawi lupi Ananias nynh Paul a mung kha bua oh cite a pe thadyn hae paw kha kaw a pya hae.
3 Paul nynh, “Asi rawpaw a thuh hae paw lungrua, Pachia nynh nang kha ae bua vae cih! Pawccecize kae hynh Kawbya thyhte byapia lan khaw khe kya na dahung; Kawbya te arawsekuh lante kae hynh bua lan kaw na pya hae tou?” a ci.Ref 23.3: Mat 23.27-28
4 Paul pe a thadyn hae paw nynh, “Pachia kya-e ranpibawi lupi kha na theihrya tou?” a ci hae.
5 Paul nynh, “Uteno hae, aning tuh ranpibawi lupi cipaw ka nyh khyh; pawccecize Ccathyaa kyaze, ‘Na ccungccaw hae a uktupaw kha a thethya na ho lan khyh,’ cite azeikuh,” a ci.Ref 23.5: Exo 22.28
6 Thuasalama tuh-e hae kyaze phu kheit tuh Sadusi hae thua hae zah ccangpaw phu tuh Farasi hae nynh thua hae cipaw kha Paul nynh he a nyh tuh, “Uteno hae, kae tuh Farasipaw nynh ka thua, Farasipaw ccapaw nynh ka thua. A chih hae paw a thoothui cih hae cite ngaehoinaw kong keiccu nynh kae tuh byapia ka thua,” cite kungsi hae kyakhe thawte a sia.Ref 23.6: Loc 26.5; Phil 3.5
7 Tuhte he a ho tuh, Farasi hae te Sadusi hae laku bya-eikunaw yn um zah ccungccaw zapi tuh phe phiakuh hae.
8 Pawccecize Sadusi hae nynh tuh thoothuinaw um khyh, vaawccungccaw um khyh, muisaw mah um khyh a ci hae; thuasalama Farasi hae nynh tuh ccangthum mawte a um a ci hae.Ref 23.8: Mat 22.23; Mar 12.18; Luk 20.27
9 Siaruanaw tuh myarya yn ccae, Farasi hae kalan a pan hae paw kawbya sazae hae nynh thokuh hae zah thawte a ei hae: “Hynh-e paw hynh a seinaw kharouh kae muih khyh. Muisaw nynh thuasah, vaawpaw nynh thuasah amaw hynh bya a hopyapaw athua kho,”note23.9 Abang Ccathyaa kya, “Pachia hynh rawsete dou nan oh sih,” cite a umbia. a ci hae.
10 Thawmawte he a eikuh hae tuh, minmin nynh Paul kha oun sue cih hae zah thoh oun paethungkuh cih hae cite rhawbawi lepaw nynh a thinphang keiccuze rhawkaw hae kha cciabung lan te minmin laku kyate Paul kha suede lan zah rhawkaw-inn kalan teekhae lan kaw a pya hae.
11 Awkhualan khuazi khe Bawipaw nynh Paul pe khe thadyn zah, “Paul, na rawthung sah! Pawccecize Jerusalem kya kamaw kong ccaekia na khan hawte Rom khuapi kya mah ccaekia na khan ung cih,” a cipya.
Paul Chia lan Pheenaw
12 Awkhualan awkhua khe Judah hae tuh tungkuh hae zah, “Paul kha ah chia mawlaezung oh tuh, looh mah ae lei lan zah tui mah nia lei lan,” cite thyalawkute bya a kinku hae.
13 Tuhte pheenaw kong khua a khan hae paw tuh milu sung pali lae acih hae.
14 Minmin nynh ranpibawi lepaw hae te piccan hae kalan cceih hae zah, “Paul kha kae chia makhia pawsang mah ae lei lan cite thyalawkute bya kae kinku vae.
15 Tukeiccuze atu nanning te kungsi hae nynh Paul a byathan kong kha houh aria lante byakhia lan a ry hae paw hawte umsakuh oh lah, Paul kha nae kalan cciakhae bung lan rhawbawi lepaw kha thaesah oh. Te Paul tuh nae kalan yn thua mawkhe chia lante kaening tuh paccynkute kae um vae,” cite a hopya hae.
16 Tuhte a buh hae paw kong kha Paul a ccianung ccapaw nynh he a thae tuh, cceih zah rhawkaw-inn kalan tee zah Paul kha a hopya.
17 Paul nynh rhawbawi lu kheit kha ko zah, “E ccangvaepaw hynh rhawbawi lepaw kalan la cciakhae tua, pawccecize a hopya lanpaw hankhakheit a hoi,” a cipya.
18 Tukeiccuze rhawbawipaw nynh tuh-e ccangvaepaw kha rhawbawi lepaw kalan cciakhae zah, “Thongccahpaw Paul nynh kae kha yn ko zah, namaw kalan hankhakheit hopya lanpaw a hoipaw e ccangvaepaw hynh na kalan cciakhae lan yn naw,” a cipya.
19 Rhawbawi lepaw nynh ccangvaepaw tuh a kuih te kyng zah a makhaete zya cciakhae zah, “Pawmou hopya lan nae rypaw tuh?” cite a khia.
20 Aning nynh, “Judah hae nynh Paul a byathan kong kha houh aria lante byakhia lan a ry hae paw hawte umsaku lan zah Paul kha awkhualan kungsi hae kalan na cciakhae nawlan na kalan ngia lan cite mih naw phe ccah vae.
21 Thuasalama nang nynh minmin kha ngaepah nan hae; pawccecize mih ccungccaw hae sung pali lae nynh Paul kha phang a buh vae hae. Minmin nynh Paul kha ah chia mawlaezung oh tuh, looh mah ae lei lan zah tui mah nia lei lan cite thyalawkute bya a kinku vae hae; bya na pae lanpaw kha ngaw hae zah atu paccynkute a um vae hae,” a cipya.
22 Tukeiccuze rhawbawi lepaw nynh ccangvaepaw kha pousah zah, “E nae hopyapaw bya hynh hum sanmah la hopah nan,” cite bya a tawsya.
Felik kalan Paul A Ky hae
23 Rhawbawi lepaw nynh rhawbawi hae lu ning kha ko hae zah, “Sisaria khua lang ccia lan rhawkaw za ning, marang rhawkaw sung sari te ccoi rhawkaw za ning kha atu khuazi suimilan ccangtakua kya pou lan paccyn oh.
24 Paul a cciku lanpaw marang kha paccyn oh lah, ram uktu Felik kalan khyndadyh lan cciakhae oh,” a cipya hae.
25 Aning nynh hynhcite ccaw ccangkheit a zei:
26 “Klaudias Lysias nynh ram uktu Felik kha sawtuanaw te kae beihlang.
27 E ccungccapaw hynh Judah hae nynh kyng hae zah a chiadyn hae khe, aning tuh Rom ccungccaw nynh thua cipaw ka ny pawte rhawkaw hae ryte kae ccianua zah kae luesah.
28 Judah hae nynh pawkeiccumou amaw hynh sei a be hae cipaw ka ny ry pawte kungsi hae kalan ka thuakhae.
29 Chi lan accanpaw seinaw, thongsaw lan accanpaw seinaw keiccu sei a be hae paw thua leite, mimaw kawbya te asekuhpaw byakhianaw keiccu nynh thua cipaw kha ka ny.
30 Judah hae nynh e paw hynh phang a buh hae cipaw kha he yn hopah hae tuh, na kalan palou kae ky zah amaw seibetu hae kha mah paw kong nynh seibe hae cipaw na malang a la ho nawlan hae kaw ka pya hae. Ngedante,” cite ccaw a ky.
31 Rhawkaw hae tuh kawpya athua hawte Paul kha hoei hae zah khuazi khe Antipatris khua lang a cciakhae hae.
32 Awkhualan khe marang rhawkaw hae kha Paul ryte po cciasah hae zah, mimaw tuh rhawkaw-inn lang a ki hae.
33 Marang rhawkaw hae nynh Sisaria khua he a thua hae te, ram uktu kalan ccaky kha pya hae zah Paul kha mah a malang khe a ap hae.
34 Ram uktu nynh ccaky kha he a ria koute, paw pee kya-e mou na thua cite Paul kha a khia. Paul tuh Silisia pee kya-e nynh thua cipaw he a nyh tuh,
35 “Sei ae betu hae paw oun thua hae te, na bya tuh kae piapah cih,” a cipya. Tukoute Paul kha Herod kya-e siapharan inn kyakhe rin lan aning nynh kaw a pya hae.