5
Lox Nabyam Pui Pa Yum Rhawm
1 Paw vi ah ka kuad, jeeh nyaw ti sidiex nawh, awm mawh nawh keeing, ka sinaw khankix awm mawh kix puxaik,
2 ka yiex kuad khankix awm mawh kix miex, ka bunkrih khankix, awm mawh kix nan ka daux pa singax singeh khawmuik awx.
Yungyi Ka Miex Mai Miexmai
3 Yungyi ka miex mai pa mawh miexmai tete awx.
4 Phan miexmai koe kawn, phan ang mawh nan kawn saux, kieh kawn khankix gau ti yuh ka cub geh nyiex tix phao ka mai deeh plud bwanson ka miex keeing tix, grawh grawng nawh pa yuh nan mawh pa khaw plak sivoe ngai Siyiex heue.
5 Bun pa mawh miexmai tete, pa deuk tix kaux khaing mai pa ang koe tidtix, hoik een krax keud pot jun pot tix ka Siyiex mai nied ti rawg bwan mhaing ku singaix heue.
6 Miexmai pa nieb yuh krax gaux rhawm haktiex, nawh hoik yum yam kawn klawd tix heue.
7 Ceu in khankix kawx tawm ti deuh sonsang luan kix khaing krax pa deuh phimap heue.
8 Phan pui tix kaux kaux ang kia ngien ka tokaux tix mai nie lheu mawh ka pui nyiex tokaux tix, nawh hoik thiang ti tik krax yum rhawm mai nie lheu caox khaing pui pa ang yum rhawm heue.
9 Paw sau miexmai pa ang nyang hoek ju tigliah num ka daux carang mai kiex tak lai mawh pa hoik koe ngie mex tix kaux khaing,
10 pa kham pui mhai ruk ka grawng pa hoik yuh kiex pa mhawm, phan kiex hoik eei kawn tix ting, phan kiex hoik chix kia nyo sinie, phan kiex hoik khoek caong pui pa singax singeh khankix, phan kiex hoik kia ngien ka pui pa yaox krax tug krax kha, phan kiex hoik nied ti coca yuh kaing pa mhawm ku ceu, sau kiex daux carang heue.
11 Paw rieb ti sau miexmai pa awn ju khankix, grawh grawng nawh, ha kix kox ang pon kut rhawm ka grawng pa gau Cao Khrit mai koe rhawm tix sang baox koe mex,
12 mai lih ti mawh phimap, kheu laux yuh kix lox sijax pa hoik tawx phao ka heue.
13 Lheu khaing an kix lailing ka tix nyiex hoik tix nyiex, gau ti nieh, nieh khaing ang mawh, viang mawh nan mawh pui bied, pa krai grawng pa ang kix khaw ti krai, pa nieb chuh grawng pa ang dex ang dawd mai kix heue.
14 Aux simie miexmai pa awn ju khankix baox koe mex mai koe kawn mai bung ti kia nyiex tix, son ang sang koe dee map pa koeng kah heue.
15 Grawh grawng nawh pui tix blah hoik via hu mai hawt khaix Satan heue.
16 Phan bun tix kaux kaux pa yum rhawm, koe miexmai pa caw paox ceu, kieh nawh teem kix mai paw kieh mawh beeh glawm ceu cao, sonsang pon ceu cao ti kia ngien ka pa mawh miexmai tete heue.
17 Kuad ceu cao khankix pa giex kaing mhawm mhawm, sawn kix mawh pa keung ti pon min pakngai pa yaw ra son, nie lheu mawh ka kix pa nied ti yuh kaing pa sidiex pa gau heue.
18 Grawh grawng nawh phuk lai singang khri ah nin, “Maix tak ang jup jheeh mawie ka jup yam dig nawh nghox lih,”Ref 5:18 Pi 25:4.
mai baox ah nin,
“Pui yuh kaing keung ti pon ngawh riang tix heue.”Ref 5:18 Mat 10:10; Luk 10:7.
19 Phan ang koe cao kham mhai ruk ra loe kaux, paw rieb pa deuh phimap ka piang kuad ceu cao.Ref 5:19 Pi 17:6; 19:15.
20 Ah ka kix pa yuh phimap sivoe ngai pui khawmuik, yuh ka mawx son pui pa deuk khankix kawx, sang lhat graung kah heue.
21 Aux tawm lox ka maix ka sivoe ngai Siyiex mai Yesux Khrit mai kawncau Siyiex pa hoik laug khankix nhie maix hawt yuh ceu in khankix, paw vi yuh tang siyox mai paw jhak ka pakngai pui heue.
22 Paw khran deuh taix ti tawx ara ka piang pui tix kaux kawx mai paw neuex tokaux tix ka daux phimap pui tang kaux, kieh tokaux tix singax singeh awx.
23 Paw lai baox mawh pui nyaux rawm, viang mawh nan nyaux rawm plix siiet ceeix ceeix, son vaig maix mai ceu pa saux maix law lawx heue.
24 Phimap pui tix blah sidawng mai hu sivoe ka dee prawng dee ciyang phimap, phimap pui tix blah hawt khaix kix heue.
25 Awm an viang mawh kaing ceu pa mhawm kawx koe pa sidawng mai pa ang sidawng kawx ang pon ti mox heue.