3
Ara Cao Giex Kaing Ceu Cao
1 Lox pa ah nin, “Phan pui tix kaux kaux sawg ti pon ara cao giex kaing ceu cao, nawh simie kaing pa mhawm,” mawh lox pa kaux sijax heue.
2 Mawh kheu nan pui pa giex kaing ceu cao tak lai mawh pui pa ang koe dee deuh phimap kah, pa koe moeng tix kaux khaing mai pa yuh satix, pa chix priex rhawm tix, pa chix keud chix sawn, pa chix khre ka nyo sinie, pa chix gau heue.
3 Ang lai mawh pui pa nieb pleung ka plai rawm plix siiet, pa nieb tap toi ka pui, tak lai mawh pa awn rhawm awn rhi, pa ang simah simiang, pa ang moh ka mau heue.
4 Tak lai mawh kaw pa chix giex kaing nyiex tix, pa koe rhawm pa chix keud chix sawn ti kieh kawn praix cu nghiet tix heue.
5 Viang mawh nan phan mawh pui pa ang chix giex kaing nyiex tokaux tix, nawh tak chix priex ceu cao Siyiex yuh ka mawx?
6 Pa ang mawh pui khraox ih li, ha nawh kox ting rhawm vao tix mai rau ka daux pa sang ciyang ka phicaox.
7 Lheu khaing an nawh tak lai mawh, pa pui plak praix kham mhai ruk pa mhawm kah, phan ang mawh nan ha nawh kox rau ka daux pa deuh pui phimap mai ka daux kie phicaox heue.Ref 3:2-7 Ti 1:6-9.
Ara Cao Bung Kaing Ceu Cao
8 Awm an pui bung kaing ceu cao khankix kawx, tak lai mawh pui pa chix keud chix priex rhawm tix, pa ang mawh pui pa koe dak ra mu, pa ang nieb nyaux plai rhawm plix siiet tom nie, pa ang keud ti pon mau yie ka krax pa ang khaw.
9 Tak lai mawh pui pa jhawp ka pa raux pa mox krax yum rhawm ka daux dee chix keud chix tawng tix pa singax singeh heue.
10 Viang mawh inkix kawx kieh cheu ti yaox phao ka, khaix an phan ang koe dee deuh phimap kah, kieh kix yuh pui pa bung kaing ceu cao heue.
11 Awm an moeng kix kawx, tak lai mawh pa chix keud chix priex rhawm tix mai pa ang nieb bied ti ah grawng pui mai pa chix yuh satix mai pa kaux sijax ka daux ku ceu khawmuik heue.
12 Kieh pui pa bung kaing ceu cao khankix, mawh pa koe moeng tix kaux khaing, pa chix giex kaing piang kawn praix mai piang nyiex tix mhawm mhawm heue.
13 Grawh grawng nawh kix pa hoik yuh kaing cao bung kaing ceu cao mhawm mhawm pon pakngai pa mhawm son tokaux tix mai rhawm pa kied kwa daux krax yum rhawm pa koe ka daux Yesux Khrit heue.
Ceu Pa Kied Ting Raux
14 Viang aux keud pot jun pot ti sang hoek ka maix laung laung kawx, aux tiiem grawh grawng ceu in khankix hu ka maix,
15 yuh ka mawx phan aux ang khran hoek maix tak lai tawng grawng pui khaw ti yuh ka mawx ka daux nyiex Siyiex, pa mawh ceu cao Siyiex pa im ju mai rong mai jaong cie pa mawh meh heue.
16 Ceu pa chix nab chix yam mai pa yuh pa khaw ka Siyiex, mawh pa kied ting raux mai ang koe dee ne dee ah ka grawng an heue. Nawh Cao hoik lih bleeh ka daux nex. Khuan Cao hoik kham mhai ruk kah, pa hoik yaox kawncau Siyiex khankix kah, pa hoik sidiex grawng Nawh ka pui tang ceu, pa hoik yum rhawm pui haktiex kah, pa hoik teei haok ka daux min pakngai heue.