7
1 Kawn bun simiang eue, caong pa ceep maix daux kiep, mawh pa mhawm miex ding, ba maix, jiet awm simaox siang, pa yuh pui min ka kaing taix tix heue.
2 Sitaing maix hoik mawh pa mhawm lawm le awm kawk rawm, pa ang chix cud ka rawm nyaux pa nyawm sioe bhawng heue. Nyoi maix mawh pa awm pum nghox tix pum, pa hoik deuh tix priex tau mai tai siyak khankix heue.
3 Teeih maix khawm ra plak awm kawn kiah iak ra mu, pa keh brawm khaing miex kiah tix mu heue.
4 Ngawg maix awm nyiex tab lhaong tix lhang pa hoik yuh tix ka nga sang, ngai maix awm rawm dung an khankix pa koe ka daux veng Heshabon hawt daux diang siviex Batrabim heue. Gawng meeh maix, awm nyiex tab lhaong Lebanon, ot ka plak see veng Damasekat heue.
5 Kaing maix pa hoik ceep ka mhok khri, awm gawng Kharame mai hauk kaing maix mawh pa lung pliex, simiang hoik mawh awm pui pa giex laung ka kleen hauk kaing maix heue.
6 Paox moh eue, krax pa mhawm tai maix mawh pa khaw rhawm mai pa nyawm rhawm ka miex ding,
7 grang grao maix awm pang khaox jhie yaong mai teeih maix awm sigleem plix nawh heue.
8 Aux hoik ah, “Aux tak sang haok pang khaox jhie yaong an, aux tak giex ka kak khaox nawh khankix heue. “Yam in, kieh teeih maix awm sigleem plix siiet mai kieh krax toek maix bhawm tix, bhawng awm plix kawk tie,
9 moing jheeh maix, awm rawm plix siiet pa sidaing nyawm heue.
Bun Shulamix Rawm plix siiet an koi lih, son paox moh dud aux mai koi lih hoek ka siyieb jheeh pui pa laig it khankix heue.
10 Aux mawh cie paox moh dud aux mai pa simie nawh hoik bleeh see aux heue.
11 Hoek heue, paox moh dud eue, kieh ex hu ka daux tiagtu; kieh ex hu ot ka daux nyiex yaong khankix heue.
12 Kieh ex yaog ti kaoh caocao mai hu ka sipeem plix siiet, kieh ex hu jhak ti yaox, ka hoik lih plaung nhu plix siiet mai ka tai nhu plix siiet khankix pruh ang pruh mai khawm pruh tai plix plix jiang khankix heue. Aux tak sang tawx krax moh tix ka maix tan heue.
13 Pang khaox pa awm khaox plix kheu niex khankix tawx pa nyawm bhawng tix mai plak praix diang siviex ex khankix mawh pa koe plix khaox can ceu pa nyawm, pa khraox mai pa prim khawmuik, paox moh dud eue, aux hoik priex ti deuh ceu an kix ka son maix heue.