1 Pux nan aux, moeng aux eue, aux hoik hoek ka daux sipeem aux, aux hoik khrawm ti teei Muran mai taux sioe bhawng aux, aux hoik yaox ti ih sigleem rawm hia, pa koe rawm hia cie aux, aux nyaux rawm plix siiet mai rawm teeih heue. Paox grawm aux khankix eue, ih heue. Nyaux heue. Rhawm moh dud pa moh aux khankix eue, Nyaux tom sak awx.

2 Aux it, viang mawh nan rhawm aux ca kawn haing, an mawh lox sikah paox moh dud aux, nawh gleuh siviex ah nin, “Pux aux, paox moh aux, kawn sikaux aux mai pui pa grum naog aux eue, paoh siviex son aux liak, mawh kheu rawm ciex hoik kheem ka kaing aux, hauk kaing aux hoik caux ka rawm ciex pa lih daux ponsawm heue.” 3 Aux hoik peeik sibex lang jung tix, aux sang baox pon ceep yuh ka mawx lie? Aux hoik khoek caong tix, aux sang pon deeh kieh seeing yuh ka mawx lie? 4 Paox moh dud aux sau taix tix ka daux jhong saw siviex mai rhawm aux hoik kied koe krax byaong ka nawh heue. 5 Aux yaog ti kaoh mai paoh siviex son paox moh dud aux mai rawm bee muran hoik jah tix lih mai taix aux, gien taix aux khankix hoik caux ka peeh bee Muran, piang rong khaox jhong diang siviex an heue. 6 Aux hoik paoh siviex son paox moh dud aux, viang mawh nan, paox moh dud aux hoik deeh veeh tix hu mai hoik luan heue. Rhawm aux hoik lih hu tau mai nawh yam hoik sikah nawh lox tix. Aux sawg ka nawh, viang mawh nan aux ang lai yaox ka nawh, aux kok ka nawh, viang mawh nan, nawh ang lai deeh pawk lox aux heue. 7 Cao pa lailing tix pau jhak daux veng khankix, yaox ka aux heue. Kix tawk aux, kix yuh aux mat, cao pau guh veng khankix, teei man tie ngai aux hu khaing aux heue. 8 Kawn bun veng Yerusaliem khankix eue, aux tawm ti deuh lox ka pex heue. Phan pex yaox ka paox moh dud aux, krai nawh mhong ka saux aux kheu moh tix nawh liak.

9 Maix pa sidaing mhawm tai khaing daux sinax bun khankix eue, paox moh maix tak sang mawh pa nie blon mhawm khaing paox moh dud tang kaux ka daux ceu patix lie? Paox moh dud maix tak sang mawh pa nie blon mhawm khaing paox moh dud tang kaux, ka ceu patix, awm lox sikah pa tawm maix tix priex ka yix lie?

10 Paox moh dud aux koe grang pa paing mai grang pa raoh nex nham mai mawh cao kaing ting daux sinax pui khankix tix mheen kaux heue. 11 Kaing nawh awm khri pa mhawm, hauk kaing nawh mawh pa pu mai lung awm lak heue. 12 Ngai nawh mawh pa awm sikaux, pa ot hawt rawm klawng, pa hoik heem tix ka rawm teeih mai ot nyawm nyiem hawt rawm khankix heue. 13 Sibax nawh awm tiag baoh dee koe sidah bhawng, awm baoh dee kuah rib riem pa nyawm sioe bhawng heue. Siyieb jheeh nawh jiet awm tai siyak, pa jaux rawm peeh Muran heue. 14 Plawng taix nawh awm gawng khri, pa hoik kab tix mai siang simaox klai heue. Kaux cao nawh awm nga sang, pa hoik dia tix sau siang simaox raoh khankix heue. 15 Plawng caong nawh jiet awm rong siang simaox paing, pa hoik deuh tix piang dang khri pa mhawm, ngai baoh nawh kied mhawm awm pang khaox Arit gawng Lebanon heue. 16 Lox jheeh moing nawh, mawh pa kied nyawm tix nghiet, nawh mawh pa mhawm grang khawmuik heue. Kawn bun veng Yerusaliem khankix eue, In mawh paox moh dud aux mai in mawh paox grawm aux heue.