5
Davit Kwang Piang Pui Isarelax
(1Been 11:1-3)
1 Khaix an doeh ru pui Isarelax, hoek ka Davit daux veng Hebron ah nin, “Yix mawh si-ang maix mai nex nham maix.
2 Bawg yam pa hoik luan yam mawh Sawlux simiang piang yix maix hoik mawh pa thung bung ka pui Isarelax lih hu mai thung kix deeh laig mai Simiang Siyiex ah nin ka maix, “Maix tak mawh cao liang yung cub pui Isarelax mai mawh cao pa kwang piang pui Isarelax.”
3 Cub kwad riex ju pui Isarelax khawmuik hoek bleeh ka simiang daux veng Hebron, simiang Davit yuh sijax mukheu tau mai kix, ka plak sivoe Simiang Siyiex mai kix yaog nawh mawh simiang piang pui Isarelax.
4 Yam jah Davit ti kwang piang kix, nawh koe ju tixgoe num mai nawh kwang piang kix tixpon num.
5 Nawh ot Ka daux veng mai kwang ka haktiex pui Yudax aliah num mai liah khix mai ot ka daux veng Yerusaliem mai kwang ka haktiex pui Isarelax mai haktiex pui Yudax tixgoe num.Ref 5:4-5 1Sim 2:11; 1Been 3:4; 29:27.
Davit Rhim Tab Zion
(1Been 11:4-9)
6 Simiang mai pui nawh khankix lih hu ka veng Yerusaliem sonsang puing ka pui Yebusix, Ref 5:6 Yaw 15:63; Cao 1:21. pui pa ot ka daux haktiex an hoek ah nin ka Davit, “Maix ang pon ti laig tin, pui dug ngai mai pui pa laux caong tak pon tiebtie maix, ” mai kix keud, “Davit ang doh pon laig.”
7 Viang mawh nan Davit pon rhim ti teei tab dee pa kaux pa cong kix Zion pa mawh veng Davit.
8 Yam an Davit ah nin, koe pui tix kaux kaux pa sang puing ka pui Yebusix khankix, kieh nawh haok hawt klawng mai puing ka pui laux caong mai pui dug ngai pa mawh pui koeng rhawm Davit ka, mawh kheu nan, pui ah nin ka paox tix, paw kieh pui dug ngai mai pui laux caong laig daux nyiex bwan.”
9 Davit ot ka dee pa kaux pa cong mai kix kok dee an mawh veng Davit, khaix an Davit deeh cox sum hawt vung viang Milaw, khawm plak daux khawmuik.
10 Simiang Siyiex Cao pa ting piang khawmuik ot tau mai nawh, mawh kheu nan, Davit haok hwan sipie mai mawh pui pa kied ting riang.
Hiram Mai Davit
(1Been 14:1-2)
11 Simiang Hiram khaing veng Taira, ploi pui cau tix khankix hu tau mai khaox gix mai pa chix kaing khaox sum nyiex mai cao pa sang simaox, hoek ka Davit mai kix sum nyiex haw tix lhang ka son Davit.
12 Davit hoik tawng ka yaog Simiang Siyiex nawh mawh simiang piang pui Isarelax mai hoik tawx meung haktiex ka son pui Nawh Isarelax.
Davit Baox Koe Kawn Daux Yerusaliem
(1Been 3:5-9; 14:3-7)
13 Mai Davit baox teei ti koe moeng iak daux veng Yerusaliem, khaix hoik gah nawh ti khaing veng Hebron mai nawh baox koe kawn simex kawn bun tom nie.
14 Inkix mawh ceu kaux kawn pa hoik keh son nawh ka daux veng Yerusaliem, mawh Shammua, Shobap, Natan, Sawlamon,
15 Ibaha, Elishua, Nephiet, Yaphia,
16 Elishama, Elidax mai Eliphaliet khankix heue.
Grawng Pa Som Ceu Pui Philitix
(1Been 14:8-17)
17 Yam hoik mhong pui Philitix ka groi kix bee mai hoik yaog Davit mawh simiang piang pui Isarelax, pui Philiti hu sawg ka Davit, Davit mhong grawng an, nawh hu laig ka dee pa kaux cong.
18 Pui Philitix hoek tom nie mai phruk phrat ti ot ka daux lung daux ngawd Repharen.
19 Davit chawk Simiang Siyiex ah nin, “Mawh sang caw aux ti hu puing ka pui Philitix inkix lie? mawh sang ap Maix Cao kix ka daux taix aux?” Mai Simiang Siyiex deeh ah nin ka Davit, “Lih hu heue, Aux sang ap kix ka daux taix maix tete.”
20 Davit hu ka veng Balax Perazem mai yuh kix laux tan mai nawh ah nin, “Siyiex yuh pui koeng aux laux ka plak sivoe aux, awm puk pak rawm, mawh kheu nan, nawh kok dee an mawh Balax Perazem.
21 Pui Philitix hoik prah riang rao pa krub tix tan, Davit mai pui nawh teei ti tik dee singai.
22 Pui Philitix baox hoek tix bawg mai phruk phrat ti ot daux lung daux ngawd Repharem.
23 Yam chawk Davit ka Simiang Siyiex, Nawh Cao pawk ah nin, “Paw hu see dee ot kix, lai lawm plak khaix kix mai haok ka plak sivoe dee koe nong khaox liah.”
24 Yam mhong maix ka lox sinum hu pui naing ka rao khaox liah maix niied ti sau riang tix, mawh kheu Simiang Siyiex tak hu ka plak sivoe maix sonsang pah Nawh Cao tab pui Philitix.”
25 Davit hawt ti yuh awm lox pa hoik tawm Simiang Siyiex ka nawh mai nawh hoik pon grheu pui Philitix lih khaing daux veng Gebax, tom hoek ka veng Gezerax heue.