8
Pui Isarelax Mhaing Simiang
1 Yam hoik kuad Samoelax nawh deeh kieh kawn simex tix prawng see ka pui Isarelax.
2 Ceu kaux kawn Ai nawh mawh Yawlax mai ceu kaux kawn Nyi mawh Abiyax, kiex khawm ra mawh cao pa prawng see ka veng Berashibax.
3 Kawn simex nawh ang lai hawt khaix keeing tix mai moh ka mau pa ang rahsee mai rieb mau cun praok mai tik been pa mawh meh.
4 Khaix an kwad riex ju pui Isarelax khrawm paox tix hoek ka Samoelax daux veng Ramax,
5 ah nin ka nawh, “Jhak heue, maix hoik riex ju kawn simex maix kawx ang hawt daux krax maix, yam in yaog simiang son yix tix kaux sonsang yuh cao prawng see ka yix, awm pui tang ceu.”Ref 8:5 Pi 17:14.
6 Yam ah kix, “Tawx simiang tix kaux sonsang prawng see ka yix, ” viang mawh nan, Samoelax ang khaw rhawm mai rawg bwan ka Siyiex.
7 Mai Simiang Siyiex ah nin ka Samoelax, “Nghiet ka lox pui Isarelax pa krai kix ka maix, mawh kheu kix ang lai thiang ti tik ka maix, kix hoik thiang ti tik ka Aux, son ang Aux lai kwang piang kix.”
8 “Awm kaing pa hoik yuh kix ka Aux khawmuik, jah yam viex Aux kix lih hu khaing Ejiptux, tom hoek ka daux in singaix, kix tik vud ka Aux mai yuh kaing jhaw siyiex pui tang kaux mai kix yuh nang nan ka maix.
9 Mawh kheu nan nghiet ka lox kix, mawh ngie tawx maix satix ka kix mai jhi grawng been pa sang kwang simiang piang kix.”
10 Samoelax krai gumlox Simiang Siyiex khawmuik ka pui hun, pa hoik mhaing simiang tix kaux ka nawh.
11 Nawh ah nin, “In mawh been pa yuh simiang sonsang kwang piang pex. Nawh tak teei kawn simex pex mai kieh kix mawh cao kia ngien ling lawx brung mai ka brung naing nawh khankix mai kix tak to ka sivoe ling lawx naing nawh.
12 Nawh tak yaog cao kaing naing pa kwang pui tix rheng, cao kaing naing pa kwang pui tix yieh, cao kaing naing pa kwang pui tixphwan mai cao kaing naing pa kwang pui kao kaux son tix mai kieh pui tiblah mawh cao thai ma kaung, cao vawg nghox mai pui pa sang yuh kraung naing son nawh tiblah mai pui pa sang yuh kraung ling lawx naing brung nawh khankix.
13 Nawh tak teei kawn bun pex mawh pa khre sidah bhawng, cao yuh priex mai cao ping blah.
14 Nawh tak teei kaung, sipeem plix siiet pex mai sipeem khaox salon pa mawh cie pex mai tawx ka kawncau tix.
15 Nawh tak teei kao son tix son khaing nghox mai plix siiet pex mai tawx an ka cao kaing mai kawncau nawh khankix.
16 Nawh tak teei kawncau simex, kawncau bun pex khankix mai pui awn ju pa mhawm pex khankix, khawm la pex mai kieh yuh kaing jhaw nawh.
17 Nawh tak teei kao son tix son khaing phung yung pex mai pex tak mawh siliex nawh.
18 Pex tak yiiem yo kheu simiang, ka hoik laug pex son tix daux singaix an, viang mawh nan Siyiex ang pawk ka lox pex singaix an.”
19 Pui hun ang nghiet ka lox Samoelax mai kix ah nin, “Ang mawh, yix tak caw tix koe simiang pa kwang piang yix,
20 sonsang awm yix pui tang ceu mai simiang, tak kwang ka yix mai lih hu sivoe yix, puing naing ka son yix.”
21 Mai Samoelax mhong ka lox pui hun mai deeh krai lox an ka Simiang Siyiex.
22 Mai Simiang Siyiex ah nin ka Samoelax, “Nghiet lox kix mai yaog simiang tix kaux ka son kix. Samoelax deeh ah nin ka pui Isarelax, pui ku kaux tang ing ka veng tix heue.