31
Sawlux Mai Kawn Simex Nawh
(1Been 10:1-12)
1 Pui Philitix puing ka pui Isarelax, pui Isarelax to sivoe pui Philitix mai kix hoik goh ti yum piang gawng, Gilabaw tau mai pa kied mat tix.
2 Pui Philitix hawt pheet Sawlux mai kawn simex nawh, kix krup mai pah ka Yawnasan, Abinadat mai Malakhishua kawn simex Sawlux.
3 Naing hoik kied kin dee ot Sawlux mai pui naing ak khankix hoik krox puing ka nawh. Mai nawh hoik kied mat ka ak pui naing khankix.
4 Khaix an, Sawlux ah nin ka cao klawng kraung naing tix, “Lawd vaig maix lih mai suat aux kah, phan ang mawh nan, aux lhat pui pa ang nyang pat hak khankix hoek suat aux mai nu nai ka aux, ” viang mawh nan, cao klawm kraung naing nawh, ang cu tix suat, awm pa ah nawh, jao kied lhat tix, mawh kheu nan Sawlux lawd vaig tix tiru mai gup tix piang rao vaig.
5 Yam yaox cao klawm kraung naing nawh ka hoik goh Sawlux tix yum, nawh kawx baox gup ti yum piang rao vaig tix yum tau mai Sawlux.
6 Mawh kheu nan, Sawlux mai kawn simex nawh loe kaux mai cao klawm kraung naing hoik yum daux tix ngaix khaing.
7 Yam yaox pui Isarelax pa ot toi ngawd mai can pui pa ot toi rawm Yawdan ka hoik to pui Isarelax ka hoik yum Sawlux mai kawn simex nawh, yam an kix prah veng ot tix mai to khawmuik mai pui Philitix hoek plud ti ot dee an.
8 Yam hoek daux singaix pasax, pui Philitix hoek ti peeik kraung naing ceep pui yum khankix mai hoik yaox yum Sawlux mai kawn simex nawh loe kaux piang gawng Gilabaw.
9 Kix hoik kid kaing nawh mai peeik kraung naing ceep nawh, kix ploi pui hu ka haktiex Philitix kudah, sonsang pao kix grawng ceu an, daux nyiex vad riang grang siyiex kix mai daux sinax pui khankix.
10 Kix priex kraung naing ceep nawh daux nyiex vad Ashatariet mai kix preue tokaux yum nawh piang guh veng Bietshan.
11 Yam mhong pui haktiex Gilat pa ot daux veng Yabiet, ka ceu pa yuh pui Philitix ka Sawlux,
12 pui pa koe rhawm vao rhawm kwa khankix yaog ti lih hu leeing sawm mai kix teei tokaux yum Sawlux mai tokaux yum kawn simex nawh, hoek khaing piang guh veng Bietshan, kix deeh hoek ka veng Yabiet mai gleeing ti tik tokaux yum kix tan khawmuik.
13 Khaix an, kix deeh sut si-ang mai sipaung ka greem pang khaox plix phak pa koe ka daux veng Yabiet mai kix twah pa ih aliah singaix heue.