28
1 Ka daux singaix an pui Philitix khrawm kru naing tix, sonsang hu puing ka pui Isarelax mai simiang Akhisha ah nin ka Davit, “Kieh maix kriem tawng maix mai pui maix tak yaox ti hu ka daux naing tau mai aux.”
2 Mai Davit ah nin ka simiang Akhix, mhawm heue maix tak tawng ka ceu pa pon yuh kawncau maix tete mai simiang Akhix ah nin ka Davit, “Mhawm heue, aux tak kieh maix mawh cao kaing naing ting pa pau ju aux.”
Sawlux Kum Mai Bun Chix Sibawk
3 Yam an Samoelax hoik yum mai pui Isarelax yiiem doe ka son nawh mai kix sipaung nawh ka daux veng Ramax, pa mawh veng ot cao nawhRef 28:3 1Sa 25:1. mai Sawlux grheu pui singie mai pui pa koe khwan caoxRef 28:3 Krub 20:27; Pi 18:10-11. khaing daux haktiex.
4 Pui Philitix khrawm paox tix hoek mai kix bang ka daux veng Shunim, mawh kheu nan, Sawlux khrawm pui Isarelax mai kix hu bang ka daux veng Gilabaw.
5 Yam yaox Sawlux ka kru naing pui Philitix, nawh kied lhat mai rhawm nawh kawx, hoik kied sikua sigrien sigre.
6 Yam chawk cheng Sawlux tix yaox grawng pa sang yuh tix ka Simiang Siyiex, Siyiex ang pawk lox nawh daux camaox ang ah, ka daux UrimRef 28:6 Si 27:21. ang ah mai ka daux lox jhai ang ah,
7 Sawlux ah nin ka kawncau tix, “Hu sawg bun pa chix sibawk, sonsang yaox aux ti hu chawk nawh, mai kawncau nawh krai koe bun pa chix sibawk ka daux veng En Dawrax tix kaux tan.”
8 Sawlux peeik kraung ceep tix mai loh ti ceep kraung tang ceu mai lih hu tau mai pui ra kaux mai hoek ka bun pa chix sibawk ponsawm ah nin, “Yuh bwanson chawk ti yaox khwan pui yum son aux mai kok ka pui pa krai aux ceu kaux ka maix.”
9 Bun chix sibawk an ah nin ka nawh, “Jhak heue, maix tawng grawng pa hoik yuh Sawlux mai nawh hoik grheu pui singie mai pui pa koe khwan caox khaing daux haktiex in khawmuik, yuh ka mawx maix sang taong kie ka aux.”
10 Sawlux tiextu ka nawh ka plak sivoe Siyiex ah nin, “Awm im ju Simiang Siyiex, krax pa ciyang tak ang hoek piang maix son grawng in.”
11 Bun an deeh ah nin, “Mawh sang kieh maix aux jhi tix yaox pui mawx?, ” mai Sawlux deeh ah nin, “Kok Samoelax ka son aux.”
12 Yam hoik yaox bun an ka Samoelax, nawh riag yo ah nin ka Sawlux, “Kheu maix lai pie lhen ka aux maix mawh Sawlux.”
13 Mai simiang deeh ah nin ka nawh, “Paw lhat graung kah, mawh yaox maix ceu patix, ” bun an deeh ah nin ka Sawlux, “Aux yaox ka haok khwan tix ceu khaing daux tiex.”
14 Mawh koe pakpeung grang nawh yuh ka mawx?” mai nawh ah nin ka bun an, bun an deeh pawk ah nin, “Mawh grang pakpeung pui pa kuad tix kaux pa haok khaing tan mai nawh ceep sibex dhah mai Sawlux tawng ka mawh an Samoelax, nawh gup pakngai tix piang tiex mai krub nawh.
15 Yam an Samoelax ah nin ka Sawlux, “Kheu maix lai kok tix tuktiak ka aux, ” mai Sawlux pawk ah nin, “Aux kied koe krax laux rhawm, kheu sang yuh pui Philitix naing ka aux, Siyiex hoik tik vud aux mai ang lai pawk lox aux, ka daux lox jhai ang ah, ka daux camaox ang ah, mawh kheu nan, aux tom kok maix sonsang jhi maix aux yaox, pa sang caw aux ti yuh.”
16 Samoelax ah nin, “Simiang Siyiex hoik tik vud maix yam mawh pui koeng ka maix, yuh ka mawx maix lai kawn chawk aux,
17 Simiang Siyiex hoik yuh ceu an ka maix awm hoik krai Nawh Cao ka aux, mawh kheu Simiang Siyiex hoik teei meung haktiex in daux tawm taix maix mai tawx ka paox plawg maixRef 28:17 1Sa 15:28. Davit.”
18 Mawh kheu ang maix cu nghiet ka gumlox Simiang Siyiex mai ang hawt yuh awm pa kied song rhawm tix ka pui AmalietRef 28:18 1Sa 15:3-9. mawh kheu nan, Simiang Siyiex yuh ceu in ka maix daux in singaix.
19 Lheu khaing an, Simiang Siyiex tak ap pui Isarelax, khawm maix ka daux tawm taix pui Philitix pasax maix khawm kawn simex maix tak ot tau mai aux mai Siyiex tak baox ap kru naing pui Isarelax ka daux taix pui Philitix.”
20 Khaix an Sawlux goh gup piang tiex dom mawx dom an, jao kied lhat graung nawh ka lox krai Samoelax mai riang rao nawh hoik uik khaing daux nawh, kheu ang nawh lai ih praix tix ngaix mai tix sawm.
21 Bun an hoek ka Sawlux mai yaox ka kied laux rhawm Sawlux, nawh ah nin ka Sawlux, “Jhak heue, kawncau bun maix hoik nghiet ka lox maix mai ang lai lhawk ka ju tix mai hoik nghiet ka lox pa krai maix khankix.
22 Mawh kheu nan, yam in nghiet ka lox krai kawncau bun maix, kieh aux khan blah ka plak sivoe maix ceeix, teei ti ih sonsang deeh koe riang rao yam deeh ing tix.”
23 Sawlux thiang ah nin, “Aux ang ih, ” viang mawh nan kawncau nawh mai bun an, niied ti tawx riang nawh mai nawh nghiet ka lox kix mai nawh yaog ti kaoh khaing piang tiex mai ngawm piang ku it tix.
24 Bun an koe mawie pa kluing tix mu ka nyiex, nawh niied ti pah kawn mawie an mai teei phawng gaox nghox ca mai ku klao tau mai yuh blah pa ang sau susaix ka,
25 viex ti hoek tan kah Sawlux mai kawncau nawh, khaix hoik ih kix kah, kix yaog ti hu daux sawm an heue.