26
Davit Deuh Ju Sawlux Bawg Ra
1 Pui veng Zipha hoek ka Sawlux, daux veng Gebiah ah nin, “Davit mox tix piang gawng Hakhilax plak sivoe veng Yeshimon ang mawh lie?”
2 Khaix an Sawlux kaoh mai hu ka daux tiag Zipha, tau mai pui Isarelax pa hoik laug nawh loe rheng kaux, sonsang sawg ka Davit daux tiag Zipha.
3 Mai Sawlux bang piang gawng Hakhilax praok krax, plak sivoe veng Yeshimon, Davit ot ka daux tiag mai nawh hoik mhong ka hoek sawg Sawlux tix ka daux tiag,
4 mawh kheu an, Davit ploi pui jiang hu jiang kix mai nawh tawng ka hoik hoek Sawlux tete.
5 Mawh kheu nan, Davit yaog ti hu daux tab dee bang Sawlux, Davit hoik yaox ka dee it Sawlux mai Abana kawn simex Nerax cao kaing naing ting kru naing nawh, Sawlux it sigreung tab mai pui ot vung viang nawh.
6 Yam an Davit chawk Ahimaliet pui Heta mai Abishie kawn simex Yeruya pux Yuabax ah nin, “Mawx pa sang hu tau mai aux dee bang tab Sawlux?” mai Abishie ah nin, “Aux tak hu tau mai maix.”
7 Mawh kheu nan, Davit mai Abishie hoek ka dee ot pui an plak ponsawm mai Sawlux laig it daux sigreung tab tau mai blung ti deuh pliah viex tix hawt kaing gaong tix mai Abana khawm pui khankix hoik laig it vung viang nawh khawmuik.
8 Abishie ah nin ka Davit, “Daux singaix Siyiex ap pui koeng maix ka daux taix maix, yuh bwanson kieh aux blung nawh ka pliah tix taix neh tom phlat ka tiex mai aux tak ang baox blung nawh ra bawg.”
9 Davit ah nin ka Abishie, “Paw yuh nawh laux leeing, mawh pui mawx pa pon nyeu taix tix piang pui pa hoik groi Simiang Siyiex bee ka ang koe krax lud ka lie?”
10 Mai Davit deeh ah nin, “Awm im ju Simiang Siyiex Nawh tak tawx krax kham geu ka nawh, phan ang mawh nan, singaix pa yum nawh tak hoek, phan ang mawh nan, nawh tak laux leeing ka daux naing.”
11 Kieh Simiang Siyiex tiebtie, son ang aux pon nyeu taix tix piang pui pa hoik groi Simiang Siyiex bee ka, viang mawh nan, teei pliah mai singiien rawm pa koe plak kaing gaong nawh mai kieh ax lih hu.”
12 Mawh kheu nan, Davit teei pliah mai singiien rawm, plak kaing gaong Sawlux pui tix kaux kawx ang yaox ang tawng mai pui tix kaux kawx ang siduad khaing it tix, mawh kheu Siyiex hoik kieh kix kied lhiag it mai kix hoik laig it khawmuik.
13 Khaix an, Davit tiang ti hu toi plak an mai cung piang choek gawng dee kied singai, khaing sinax kix.
14 Mai Davit kok yo ka pui mai ka Abana kawn simex Nerax ah nin, Abana eue, ang maix lai pawk lox lie?” mai Abana ah nin, “Mawh pui mawx pa kok yo ka simiang lie?”
15 Davit ah nin ka Abana, “Ang maix mawh simex lie? mawh pui mawx pa awm maix daux pui Isarelax, yuh ka mawx maix ang pau simiang cao tix mhawm mhawm, mawh kheu pui tix kaux laig ti sang yuh simiang cao maix laux leeing.”
16 Ceu pa yuh maix in, mawh pa ang mhawm tete, awm im ju Siyiex maix hoik keung ti mawh pa yum, kheu ang maix pau ka simiang tix, pa hoik groi Simiang Siyiex bee ka, yam in jhak ti yaox, mawh koe pliah simiang maix mai singiien rawm nawh pa deuh plak kaing gaong it nawh koe dee mawx?”
17 Sawlux tawng ka lox Davit ah nin, “Kawn simex aux Davit eue, mawh an lox maix lie?” mai Davit pawk ah nin, “cao simiang aux eue, in mawh lox aux.”
18 Mai Davit deeh ah nin, “cao simiang aux ca kawn hawt sawg kawncau tix yuh ka mawx? Mawh hoik yuh aux ceu patix? Mawh koe pa caox ceu tix ka daux taix aux.
19 Yam in yuh bwanson kieh cao simiang aux nghiet lox kawncau maix, phan mawh Simiang Siyiex pa hoik so rhawm maix yuh nin ka aux, kieh Nawh Cao rieb krax tan pa yuh kawn pui, phan ang mawh nan, phan mawh kawn pui pa so rhawm maix yuh nin ka aux kieh kix pon pa jhax lawg ka plak sivoe Simiang Siyiex, mawh kheu kix hoik grheu aux hu daux in singaix khaing pa sang pon aux sinngao haktiex cie Simiang Siyiex ah nin ka aux, hu yuh kaing jhaw Siyiex tang kaux khankix.
20 Mawh kheu nan, paw kieh nham aux cod piang tiex, dee singai khaing plak sivoe ngai Simiang Siyiex liak, mawh kheu simiang pui Isarelax hoek ti sawg aux pa awm diiep sox tix mu, awm hu leue pui keed piang gawng.”
21 Khaix an Sawlux ah nin, “Aux hoik lud tix, kawn simex aux Davit eue, deeh hoek, aux tak ang lai yuh krax pa kha rhawm ka maix, kheu jao kied koe ngawh jum ju aux ka daux ngai maix daux in singaix, jhak heue, aux hoik mawh pui pa caox mai kied lud.”
22 Davit pawk ah nin, “Pliah simiang kawn koe tin, kieh kawn nyawm awn ju tix kaux hoek teei.
23 Kieh Simiang Siyiex deeh plud ka pui ku kaux, son pa rahsee nawh mai son pa kaux sijax nawh, mawh kheu Simiang Siyiex hoik ap maix ka daux taix aux in singaix, viang mawh nan, aux ang pon nyeu taix tix lih piang pui pa hoik groi Simiang Siyiex bee ka.”
24 “Jhak heue, awm hoik kieh aux maix koe ngawh jum ju ka daux in singaix, plak sivoe ngai aux, mawh kheu nan, kieh ju aux mawh pa koe ngawh koe jum plak sivoe Simiang Siyiex mai kieh Nawh Cao deeh taoh aux lih khaing ceu pa kha rhawm khawmuik.”
25 Khaix an Sawlux ah nin ka Davit, “Kawn simex aux Davit eue, kieh maix mawh pa koe bwanson, kieh kaing pa yuh maix kuceu ting lhaong haok hwan.” Mawh kheu nan, Davit hu krax hu tix mai Sawlux deeh ing ka dee ot tix heue.