12
Lox Krai Samoelax Ka Pui Hun
1 Samoelax ah nin ka pui Isarelax, “Jhak heue, aux hoik nghiet lox pex mai grawng pa ah pex ka aux khawmuik mai hoik yaog simiang piang pex.”
2 Jhak heue, simiang hoik ot tau mai pex, yam in aux hoik kuad mai hoik paing hauk kaing, kawn simex aux kawx hoik ot tau mai pex, aux hoik lailing ka plak sivoe pex, jah yam mawh aux kawn nyawm tom hoek in singaix.
3 “Yam in aux hoik ot tin, kieh pex kham mhai rug grawng aux sivoe Simiang Siyiex mai sivoe pui pa hoik groi Nawh Cao bee piang. Mawh hoik sax teei aux mawie pui lie? hoik sax teei aux la pui lie? hoik sax pie lhen aux kraung pui lie? hoik sax khin aux pui mawx, hoik sax rieb aux mau cun praok, khaing taix pui pa sang kieh ngai aux dug lie? Aux tak deeh plud an ka pex.”
4 Kix deeh ah nin, “Maix ang sax pie lhen kraung yix, ang sax khin ka yix mai ang sax teei tix ceuceu khaing taix pui tix kaux kawx.”
5 Mai nawh deeh ah nin ka kix, “Simiang Siyiex mawh mhai rug ka pex mai nawh pa hoik groi Nawh Cao bee piang hoik kham mhai rug ka daux in singaix, pa ang pex yaox tix ceu kawx, ka daux taix aux. “Mai kix deeh ah nin, “Nawh Cao hoik mawh mhai rug.”
6 Mai Samoelax ah nin ka pui hun, “Simiang Siyiex mawh pa yaog Mose mai ArunRef 12:6 Lih 6:26. mai pa viex keeing pex lih khaing meung Ejiptux.”
7 Mawh kheu nan, ot pex yiien yawg, aux tak ka kum grawng see pex sivoe ngai Simiang Siyiex pa dex mai pa rahsee pa hoik yuh Simiang Siyiex mai pa hoik yuh Nawh Cao ka pex mai ka keeing pex khankix.
8 Yam hu laig Yakop ka Ejiptux, pui Ejiptux yuh pa khin ka kix mai keeing pex khankix riag yo ka Simiang SiyiexRef 12:8 Lih 2:23. mai Simiang Siyiex ploi Mose mai Arun pa viex keeing pex khankix lih khaing Ejiptux mai kix kieh pex ot dee in.
9 Viang mawh nan, kix piawm ka Simiang Siyiex tix, Nawh Cao coh kix ka daux tawm taix Sirax, Ref 12:9 Cao 4:2. cao kaing naing ting pui Hazaw mai ka daux tawm taix pui PhilitixRef 12:9 Cao 13:1. mai ka daux tawm taix simiang Mawbax, Ref 12:9 Cao 3:12. mai pui an khankix puing ka kix.
10 Kix yiiem ka Simiang Siyiex ah nin, “Yix hoik yuh phimap, mawh kheu yix hoik tik vud ka Simiang Siyiex mai hoik yuh kaing jhaw siyiex Balax mai siyiex Ashatariet, viang mawh nan, taoh yix luan khaing daux tawm taix pui koeng yix mai yix tak yuh kaing jhaw Maix Cao.”Ref 12:10 Cao 10:10-15.
11 Mai Simiang Siyiex ploi Yerubalax, Ref 12:11 Cao 7:1. Barak, Ref 12:11 Cao 4:6. YephathaxRef 12:11 Cao 11:29. mai SamoelaxRef 12:11 1Sa 3:20. hoek mai taoh pex lih khaing dau tawm taix pui koeng pex khaing ku plak mai pex hoik yaox ti ot yiien yawg mhawm mhawm.
12 Yam hoik yaox pex hoek Nahat simiang pui Amon puing ka ti, pex ah nin ka aux, ang mawh, cawh tix koe simiang pa kwang piang yix, Ref 12:12 1Sa 8:19. viang Simiang Siyiex mawh kawx simiang piang pex.
13 Jhak heue, simiang pa laug pex mai pa mhaing pex, yam in Simiang Siyiex hoik yaog simiang tix kaux piang pex.
14 Phan pex lhat graung ka Simiang Siyiex mai yuh kaing jhaw, cu nghiet ka lox Nawh Cao mai paw tieh feen ka lox tawm pingnyap Simiang Siyiex mai phan pex mai simiang pa kwang piang pex hawt khaix Simiang Siyiex tix mawh pa mhawm,
15 phan pex ang nghiet ka lox Simiang Siyiex mai tieh feen ka lox tawm pingnyap Simiang Siyiex, plawng taix Simiang Siyiex tak tiebtie pex mai keeing pex khankix.
16 Yam in cung sijung mai jhak pa ting lhaong ceu pa yuh Simiang Siyiex ka sivoe ngai pex khankix.
17 In ngaix mawh bawg yam vawg nghox ca ang mawh lie? aux tak kok ka Simiang Siyiex son ang Nawh Cao kieh sinum praix mai rawm lhiex lih mai deeh chix kieh pex yaox ka phimap krax lud pa kied ting tix, pa hoik yuh pex ka sivoe ngai Simiang Siyiex, ka daux pa chawk pex simiang son tix.”
18 Samoelax kok yo ka Simiang Siyiex mai Simiang Siyiex kieh sinum praix mai rawm lhiex lih ka daux singaix an mai pui hun kied koe krax lhat graung ka Simiang Siyiex mai Samoelax.
19 Pui hun khawmuik ah nin ka Samoelax, “Rawg bwan ka Siyiex son kawncau maix khankix, sonsang ang yix yum, mawh kheu yix hoik baox yuh phimap pa caox in, ka hoik mhaing tix simiang son cao tix.”
20 Mai Samoelax ah nin ka pui hun, “Paw lhat graung, viang pex hoik yuh kawx phimap pa caox, paw lai veeh khaing pa hawt ti khaix Simiang Siyiex, viang mawh nan, yuh kaing jhaw Simiang Siyiex khawm rhawm tix,
21 paw lai veeh ti hawt khaix ceu pa giex going pa ang koe bwanson mai pa ang pon taoh, mawh kheu ceu an mawh pa giex going.
22 Mai Simiang Siyiex ang tik vud ka pui kheu min ceu kaux pa ting lhaong Nawh Cao, mawh kheu Simiang Siyiex hoik khaw rhawm ti kieh pex mawh pui Nawh Cao.
23 Lheu khaing an phan mawh aux pa yuh phimap mai pa ang rawg bwan ka Simiang Siyiex son pex, kieh singai khaing aux, aux tak sidiex pex ka pa mhawm mai krax pa rahsee.
24 Kieh lhat graung ngie ka Simiang Siyiex mai yuh kaing jhaw Nawh Cao ka daux pa kaux sijax mai khawm rhawm tix, mai doh keud ka pa kied ting lhaong pa hoik yuh Nawh Cao son pex.
25 Phan pex ca kawn yuh pa caox caig, pex mai simiang tak hoek krax laux leeing heue.”