1 Khaix an Samoelax teei kawk rawm bee mai see piang kaing nawh mai ngheet ka nawh ah nin, “Pa groi Simiang Siyiex bee piang maix, sonsang mawh maix cao kaing piang sinngao Nawh Cao ang mawh lie?” 2 Yam lih hu maix khaing aux in singaix maix tak yaox pui ra kaux ka simeeig Rakhelax ka haktiex pui Binyamin, ka Zelaza mai kiex ah nin ka maix, la pa sawg maix ka hoik yaox tix, yam in keeing maix ang lai khi rhawm grawng la, nawh deeh tieh ti khi rhawm ka grawng maix ah nin, “Aux sang yuh ka mawx ka kawn simex tix?” 3 Mai maix tak luan khaing tan, tom hoek ka khaox tiah ka Tabaw, pui loe kaux pa hu ka Siyiex ka Betelax, tak pub ka maix tan, tix kaux tak viex kawn pex loe mu, an tix kaux tak viex blah loe lon mai tix kaux tak viex singiien rawm plix siiet tix mu. 4 Kix tak rieb ti singeuh taix maix mai tawx blah ka maix ra lon maix tak rieb ti teei an khaing taix kix. 5 Khaix an maix tak deeh hoek ka gawng Kipehatelohim ka dee koe tab kru naing pui Philitix, yam hoek maix ka veng tan maix tak pub cao jhai tix cub, pa lih khaing dee pa lhaong mai viex ting pawd, kraung lawk leh mai ting plah khaox pa sideet maox hoek tah sivoe kix mai kix tak ah lox jhai. 6 Khaix an, khwan Simiang Siyiex tak hoek piang maix, maix tak ah lox jhai mai kix maix tak deeh tieh ti mawh pui pa tang si yox tix kaux. 7 Yam lih mhai rug in khankix ka maix, maix hawt yuh awm khaw maix ti yuh, mawh kheu Siyiex ot tau mai maix. 8 Maix tak lih hu ka sivoe aux ka Gilagalax, jhak heue, aux tak hoek ka maix sonsang yuh krax tan pa gleeing mai yuh krax tan pa nhim. Maix tak yaox ti pau aliah singaix, tom hoek aux ka maix mai jhi maix yaox ceu pa sang caw maix ti yuh. 9 Yam veeh nawh khaix tix lih hu khaing Samoelax, Siyiex hoik tawx rhawm keud pa tang si yox ka nawh, mhai rug in khawmuik lih mawh daux singaix an. 10 Yam hoek kix ka Gibat, jhak heue, cao jhai tix cub rieb ka Sawlux mai khwan Siyiex lih hoek piang nawh mai ah lox jhai ka sinax kix. 11 Yam hoik yaox pui khankix, hoik dawg tawng tix ka nawh kix yaox ah nawh lox jhai sinax cao jhai khankix, pui hun ah nin ka paox ti, “In mawh patix pa lih mawh ka kawn simex Kisha lie? Mawh Sawlux pa ot sinax cao jhai ang mawh lie?” 12 Pui ot tan tix kaux pawk ah nin, “Keeing kix mawh pui mawx lie?” mawh kheu nan, lox kab tom lih ti koe ah nin, “Mawh Sawlux pa ot sinax cao jhai ang mawh lie?”Ref 10:12 1Sa 19:23-24 13 Yam hoik ah Sawlux lox jhai, nawh hoek ka dee pa lhaong. 14 Khaix an keeing iak Sawlux ah nin ka nawh mai kawncau nawh, “Kaoh pax khaing hu tix dee mawx lie?” Mai nawh ah nin, “Hu sawg ka la, mawh kheu ang yiex yaox ka la, yiex tom hoek ka Samoelax.” 15 Keeing iak Sawlux ah nin, “Krai aux mhong ka ceu pa ah Samoelax ka maix liak.” 16 Sawlux pawk ah nin ka keeing iak tix, “Nawh krai ngie yiex mhong ka hoik yaox tix ka la.” Viang mawh nan, nawh ang krai grawng pa dex mai been haktiex, pa krai Samoelax ka nawh heue.

17 Samoelax kok pui hun khrawm paox tix ka Simiang Siyiex ka Mizapa, 18 nawh ah nin ka pui Isarelax, “Simiang Siyiex, Siyiex pui Isarelax ah nin, Aux hoik viex pui Isarelax lih khaing Ejiptux mai aux hoik taoh pex khaing daux taix pui Ejiptux mai khaing taix meung haktiex, pui pa yuh pa kin pa khin ka pex 19 Viang mawh nan, pex hoik tik ka Siyiex tix, pa hoik taoh pex khaing krax kha rhawm mai krax laux leeing, mai pex ah nin, “Ang mawh! viang mawh nan, yaog simiang piang yix yam in thong paox pex hoek ka plak sivoe Simiang Siyiex awm pa koe doeh nyiex ma pex mai doeh ru pex.” 20 Mai Samoelax kieh doeh ru pui Isarelax hoek dex mai yuh nieb, caw ka doeh ru Binyamin. 21 Nawh viex doeh ru pui Binyamin hoek dex mai yuh nieb, caw ka doeh ru Matarix mai kix baox viex doeh nyiex ma Matarix ku kaux hoek dex mai yuh nieb, caw ka Sawlux kawn simex Kisha, yam an kix sawg ka Sawlux ang yaox. 22 Kix chawk cheng Siyiex ah nin, “Mawh ang pui an nyang bax hoek tin lie?” Simiang Siyiex ah nin, “Jhak heue, nawh mox tix sinax kraung.” 23 Mai kix to hu teei nawh khaing tan, yam cung nawh sinax pui khankix, nawh lheu lhaong khaing pui ku kaux, jah mee klip nawh tom hoek plak piang. 24 Mai Samoelax ah nin ka pui khankix, “Mawh yaox pex ka pui pa hoik laug Simiang Siyiex lie? pui pa awm nawh ang lai koe sinax pui hun tix kaux kawx.” Pui hun yo lox sinum ah nin, “Kieh simiang lang ju liak!” 25 Mai Samoelax krai pui hun mhong grawng been pa dex mai simiang, mai nawh tiiem ti deuh ka daux phuk lai mai deuh sivoe Siyiex. Mai Samoelax deeh kieh pui hun ing ka nyiex ma tix ku kaux. 26 Mai Sawlux ing ka nyiex tix ka Gibat mai pui vao pa so Siyiex rhawm kawx ing tau mai nawh. 27 Viang mawh nan, koe pui caox tiblah ah nin, “Pui in sang pon taoh ex yuh ka mawx lie?” Mai kix nunai nawh, ang viex totaix ka nawh. Viang mawh nan, Sawlux ang lai een ka daux rhawm tix heue.