8
Pon Lawd luan Khaing Phimap
1 Mawh kheu nan, yam in, ang lai koe dee prawng ciyang ka kix pa ot ka daux Yesux Khrit heue.
2 Grawh grawng nawh been pa dex mai Khuan pa im ju, ka daux Yesux Khrit, hoik ploi aux luan khaing been phimap pa dex mai krax yum heue.
3 Pa ang lox lai beenli pon yuh, mawh kheu iak riang rao kheu nex nham, Siyiex hoik ploi Kawn tix lih ka daux pa yaung nex nham phimap mai grawh grawng phimap, Nawh prawng ciyang phimap ka daux nex nham,
4 son been pa hoik nhie ka daux lox lai beenli, tak sang naog ka daux ex, pa ang hu awm pa khaw mai nex nham, viang mawh nan pa hu awm pa khaw mai Khuan heue.
5 Kix pa ot hawt pa khaw mai nex nham, nie lheu keud grawng ceu pa dex mai nex nham, kix pa ot hawt pa khaw mai Khuan, keud grawng ceu pa dex mai Khuan heue.
6 Rhawm pa dex mai nex nham mawh krax yum heue. Viang mawh nan rhawm pa dex mai Khuan, mawh pa im ju mai pa nhim heue.
7 Mawh kheu rhawm pa dex mai nex nham, mawh pa ra lai koeng ka Siyiex, mawh kheu nawh ang cu nghiet, ka lox lai beenli Siyiex. Chix kawx, ang chix cu nghiet kah heue.
8 Kix pa ot ka daux nex nham, ang chix yuh pa khaw caw ka rhawm Siyiex.
9 Viang mawh nan pex ang ot ka daux nex nham, pex ot ka daux Khuan, phan Khuan Siyiex ot ka daux pex heue. Kaux pui mawx ang ah, phan ang koe Khuan Cao Khrit ang lai mawh cie Nawh heue.
10 Viang mawh nan phan Cao Khrit ot ka daux pex, viang tokaux hoik yum kheu phimap kawx, khuan mawh pa im kheu pa rahsee heue.
11 Lheu khaing an, phan Khuan Kaw pa kieh Yesux deeh kaoh im khaing krax yum ot ka daux pex, Nawh pa hoik kieh Cao Khrit deeh kaoh im khaing krax yum tak sang kieh tokaux pex pa chix yum, im kheu Khuan Nawh Cao pa ot ka daux pex heue.
Kawn Lih Plak Khuan Cao
12 Mawh kheu nan, puxaik khankix eue, ex mawh pa koe ceuk ka nex nham, sonsang im hawt nex nham, ang mawh,
13 Phan pex im hawt nex nham, pex tak lai yum, viang mawh nan phan pex kieh ceu pa yuh tokaux tix, yum kheu Khuan Cao, pex tak sang im heue.
14 Can pui pa hawt krax thong Khuan Siyiex hu khankix, mawh kawn Siyiex heue.
15 Pex hoik pon rhawm siliex pa deeh kieh chix lhat graung, ang mawh, viang mawh nan pex hoik pon rhawm, pa sang sawn kieh mawh kawn lih, mawh kheu nan ex tom kok, Abax, Keeing eue.
16 Mawh tokaux Khuan Cao pa kham mhai rug ka khuan ex, grawng pa mawh ex kawn Siyiex heue.
17 Phan mawh kawn, mawh cao pa pon sin heue.Ref 8:15-17 Ka 4:5-7. Pa mawh cao pa pon sin Siyiex mai pa rom ti pon sin tau mai Cao Khrit, phan ex rom ti kham geu tau mai Nawh Cao, sonsang pon khawm min plakngai tau mai Nawh heue.
Min Plak Ngai Pa Tak Sang Hoek
18 Grawh grawng nawh aux sawn ceu pa yaox ti kham geu yam in, mawh pa ang keung ti tiag yaox ka min plakngai pa tak sang plak jhi ka ex sax heue.
19 Can pa phan deuh ca keud pot jun pot mai krox son bawg yam sang plak jhi kawn Siyiex khankix heue.
20 Can pa phan pa deuh hoik yaox ti ot greem pa ang tie mawh, kheu alo tix ang mawh, hoik mawh kheu Kaw pa hoik kieh nawh ot greem heue. Viang mawh nan hoik koe krax keud pot jun pot,
21 grawh grawng can pa phan pa deuh kawx, tak sang yaox ti luan khaing pa mawh siliex ka pa chix laux leeing mai hoek ka daux pa pluat ploi pa dex mai min plakngai kawn praix Siyiex heue.
22 Ex tawng grawng can pa phan pa deuh khawmuik, hoik rom ngia tau, ka daux ceu pa kha rhawm saux yha tom yam in heue.
23 Ang joeng mawh ngie nan, pie tokaux ex kawx, pa hoik pon plix liang Khuan Cao, pie tokaux ex kawx, ngia ka daux tokaux tix mai ca krox bawg yam pa sang sawn tix mawh kawn lih, pa mawh pa taoh ka tokaux ex heue.
24 Ex hoek krax taoh ka daux pa keud pot jun pot heue. Viang mawh nan pa keud pot jun pot, phan hoik yaox, ang lai baox mawh pa sang keud pot jun pot heue. Ceu pa hoik yaox pui, nawh lai baox keud pot jun pot yuh ka mawx?
25 Phan ex keud pot jun pot son ceu pa ang ex nyang bax yaox, ex tom chix gun tix krox son ceu an heue.
26 Awm an, Khuan Cao teem ex, ka daux pa iak riang rao ex heue. Ex ang tawng grawng khaw ti rawg bwan yuh ka mawx, viang mawh nan, tokaux Khuan Cao khyox khaw son ex ka lox ngia pa ang jheeh chix ah heue.
27 Kaw pa sawg liiem ka rhawm, tawng rhawm Khuan Cao, mawh kheu Nawh khyox khaw son pui pa singax singeh awm pa khaw mai alo Siyiex heue.
28 Ex tawng grawng kuceu khawmuik rom ti yuh tau, sonsang mawh pa mhawm ka son kix pa moh ka Siyiex, pa mawh pa hoik kok ti teei awm pa khaw mai pa hoik yiag hoik bak Nawh Cao heue.
29 Kix pa hoik grux tawng Nawh Cao kah, Nawh hoik ciak ti kieh awm riang Kawn tix, sonsang mawh Nawh pa liang ti keh ka daux puxaik tom nie heue.
30 Kix pa hoik ciak ti deuh Nawh Cao khankix kawx, Nawh kok ti teei khawm heue. Kix pa hoik kok Nawh Cao ti teei kawx, Nawh kieh rahsee khawm. Nawh tawx khawm min plakngai ka kix heue.
Krax Muh Siyiex Koe Leeing Ju
31 Phan mawh nan ex sang ah ka mawx ka grawng ceu in khankix? Phan Siyiex ot plak ex, mawx pa sang ot tang plak ti yuh ka ex?
32 Kaw pa ang deuh pie ka Kawn tix, viang mawh nan hoik tawx Nawh son ex khawmuik, Nawh tak ang yuh bwanson ti tawx giex ka ex, kuceu khawmuik tau mai Nawh lie?
33 Mawx pa sang chix deuh phimap ka pui pa hoik laug Siyiex ti teei? Mawh Siyiex pa kieh rahsee heue.
34 Mawh mawx pa sang prawng ca ti deuh phimap? Mawh Cao Khrit pa hoik yum, mawh heue, nie lheu mawh pa hoik deeh kaoh im khaing krax yum mai pa ot plak taix khawn dawm Siyiex mai pa khyox khaw son ex heue.
35 Mawh mawx pa sang gwieh ex khaing krax moh krax rhawm Cao Khrit? Mawh pa kha rhawm, phan ang mawh nan pa khi rhawm, phan ang mawh nan pa tuktiak, phan ang mawh nan pa sibhawm siya, phan ang mawh nan pa ot kakaong, phan ang mawh nan krax caox krax laux, phan ang mawh nan mawh vaid lie?
36 Awm hoik tiiem ti deuh ah nin, “Hoik pah ex yum leeing ngaix ka son Maix heue. Hoik deuh ex mawh awm yung son pa sang pah heue.”Ref 8:36 Yaog 44:22.
37 Ang mawh, ka daux ceu in khankix khawmuik, ex mawh pa nie lheu mawh khaing pa pex, kheu Kaw pa hoik moh ka ex heue.
38 Grawh grawng nawh aux hoik yum rhawm, viang grawng pa yum ang ah, pa im ang ah, kawncau Siyiex khankix ang ah, pa giex kaing khankix ang ah, ceu pa koe yam in khankix ang ah, ceu pa sang hoek ti mawh khaix khankix ang ah, sibrawm khankix ang ah,
39 pa lhaong ang ah, pa raux ang ah, viang mawh pa phan pa deuh tang ceu, ceu tix ang ah, tak ang chix gwieh ex khaing krax moh krax rhawm Siyiex, pa koe ka daux Simiang ex Yesux Khrit heue.