1 Mawh kheu nan, can kaing pa hoik yuh Sawlamon, son nyiex bwan Siyiex hoik hoik mai Sawlamon, viex can ceu pa hoik appong keeing nawh ti tan khankix khawmuik, pa mawh mau mai khri mai kraung shiao khankix hoek heue. Nawh sau ti priex ceu ankix ka daux sinngao nyiex bwan Siyiex heue.

2 Yam in Sawlamon deeh kraix khrawm cub kuad riex ju pui Isarelax, khawm cao kaing ting doeh ru kix, khawm cao kaing ting doeh nyiex ma keeing riex ju pui Isarelax khankix ka daux veng Yerusaliem, sonsang pon kix ti deeh viex teug bwan sijax mukheu Siyiex hoek khaing veng DavitRef 5:2 2Sa 6:12-15; 1Been 15:25-28. pa mawh Zion heue. 3 Mawh kheu nan, pui Isarelax khankix hoik khrawm paox tix tau mai simiang ka daux pawie pa yuh kix ka daux khix aliah heue. 4 Mawh kheu nan, cub kuad song ceu pui Isarelax khankix khawmuik hoik hoek mai cub ceu pui Lewix, khankix hoik teei ti viex teug bwan heue. 5 Khaix an, kix teei teug bwan hoek daux bang kum nyiex gox bwan man mai khawm kraung shiao pa singax singeh an khankix khawmuik, pa hoik dawg priex ti deuh ka daux nyiex gox bwan man khankix heue. Cao giex kaing li mai pui Lewix khankix hoik teei ti viex ankix laig ka plak daux heue. 6 Khawm simiang Sawlamon mai cub pui hun ceu pui Isarelax khawmuik, pa hoik krawk khrawm paox tix tau ka plak sivoe teug bwan mai kix appong tix tan yung mai moi khankix, pa ang lai dak uik simin, kheu jao pa hoik kied haoh hun kix heue. 7 Khaix an, cao giex kaing li viex teug bwan sijax mukheu Siyiex laig ka daux dee ot nawh, ka plak daux nyiex bwan, dee pa kied singax singeh greem pruik Cherubin heue. 8 Cherubin di pruik tix piang dee koe teug bwan mai Cherubin hoik kheem teug bwan mai khawm khaox glawm heue. 9 Khaox glawm an, kix hoik yuh lang sonsang pon yaox kix toeh khaox glawm khankix khaing dee pa singax singeh ka plak sivoe daux lawg plak daux, viang mawh nan, kix ang pon tix chix yaox khaing plak praix heue. Kix ot hawt tan, tom hoek ka daux in singaix heue. 10 Ka daux teug bwan, lheu khaing khlawp simaox ra khlawp, pa hoik sau Mose ti deuh hawt baoh HawraxRef 5:10 Pi 10:5. ang koe tidtix tan, yam hoik yuh Siyiex gumlox sijax mukheu tau mai kawn praix ceu pui Isarelax khankix yam lih hu kix khaing meung Ejiptux heue. 11 Yam hoik luan ceu ankix, yam hoik lih hoek cao giex kaing li khaing dee pa kied singax singeh, mawh kheu can cao giex kaing li khankix hoek daux bang kum khawmuik, hoik yuh tokaux cao tix singax singeh, ang lai priex lai rien ti yuh kaing jhaw awm pa koe cub caw kix heue. 12 Ceu pui Lewix cao rhax lai, pui kaoh khaing Asaphax mai Heman mai Yedutun khankix tau mai kawn simex kix khawm puxaik kix khawmuik, cung tix it ka toeh plak lih singaix khu dee tan, kix ceep ka kraung man paing, giex chiang, ting mai ting feuk mai cub cao giex kaing li pa phlu teettawng sinum tiyieh tixnga kaux ot tau mai kix, 13 Yam cao phlu teettawng mai cao rhax lai khankix mawh tix cub, sonsang yuh kix lox tix sinum tix dum, sonsang mawh pa yaogyaw kix bwanson Siyiex mai yam yaog kix lox tix khaw tau mai teettawng mai chiang mai kraung ting pa koe maox khankix yaogyaw Siyiex ka daux pa ah nin, mawh kheu Nawh Cao mawh pa mhawm, mawh kheu krax pa caux rhawm Nawh Cao kaux cong leeing ju heue.Ref 5:13 1Been 16:34; 2Been 7:3; Eza 3:11; Yaog 100:5; 106:1; 107:1; 118:1; 136:1; Ye 33:11. Nyiex bwan an pa mawh nyiex bwan Siyiex hoik naog ka pa ceep paiawm, 14 Mawh kheu cao giex kaing li ang lai pon sitoe ti yuh kaing jhaw kheu jao pa ceep paiawm, kheu jao hoik naog min sibrawm Siyiex ka dau nyiex bwan Siyiex heue.Ref 5:13-14 Lih 40:34-35.