1 Yosiyax koe ju daix num, yam yaog nawh ti mawh simiang mai nawh kwang ka daux veng Yerusaliem tixngoe tix num heue. 2 Nawh yuh can ceu pa khaw caw ka plak sivoe ngai Siyiex mai lawng ka daux krax daux grawng keeing nawh Davit; nawh ang lai gwieh tix hu ka plak gwiex plak dawm heue. 3 Ka daux daix num yam kwang nawh, ju nawh kawn awn nawh jah tix sawg ka Siyiex keeing tix Davit; mai ka daux yam hoek ka daux kao ra num tix num, nawh jah tix gah can dee pa lhaong mai riang grang Asherax pa yuh tix ka khaox mai riang grang pa saik tix, Khawm can riang grang pa hoik raug tix khankix singax khaing daux meung Yudax mai veng Yerusaliem heue. 4 Kix yieh ti tik khu dee tan siyiex Balax khankix, lih khaing ka plak sivoe ngai nawh mai khawm can khu dee tan nyawng bhawng, pa hoik koe ka plak piang ceu ankix, nawh hoik kid ti tik; mai riang grang pa mawh khaox Asherax mai riang grang pa hoik saik tix khankix, nawh hoik raig ti tik ankix laux leeing mai yuh ceu ankix phawng mai rhuat ankix piang simeeig can pui pa hoik appong ti tan ka kix heue. 5 Nawh deeh baox gleeing si-ang cao giex kaing li khankix piang khu dee tan kix mai hoik singax yuh meung Yudax mai veng Yerusaliem heue. 6 Mawh kheu nan, nawh baox yuh ankix ka daux hawt baoh veng Manashe, hawt baoh veng Epharem mai hawt baoh Simeon khankix, tom singai hoek baoh veng Napthalix mai hawt vung viang veng khankix khawmuik, laux leeing ka moe heue. 7 Yam khaix hoik gaing nawh ti tik khu dee tan mai riang rao pa mawh khaox Asherax mai khaix hoik pah nawh riang rao pa hoik saik khankix phawng mai khaix hoik kid nawh ti tik khu dee tan nyawng bhawng laux leeing khaing ka daux haktiex meung Isarelax khawmuik, nawh deeh ing ka veng Yerusaliem heue. 8 Yam in ka daux yam hoik kwang nawh ka haktiex kao daix num tix num, khaix hoik singax yuh nawh haktiex mai nyiex bwan, nawh ploi Shaphan kawn simex Azaliyax, Maseyax pa mawh cao kwang veng mai Joah kawn simex Yohaza pa mawh cao mhai ti deuh lox kum khankix, sonsang deeh cox tix ka nyiex bwan Siyiex Cao nawh heue. 9 Yam hoek kix ka Hilakilax cao giex kaing li pa ting kix ap ti tawx mau pa hoik viex tix laig ka daux nyiex bwan Siyiex, pa hoik khrawm pui Lewix cao pau diang siviex khankix khaing ceu pui Manashe ceu pui Epharem mai can pa kawn deuk khaing ceu pui Isarelax khankix, ceu pui Yudax, ceu pui Biyamin mai khawm ceu pui pa ot ka daux veng Yerusaliem khankix heue. 10 Khaix an, kix ap ankix ka daux tawm taix pui yuh kaing jhaw pa jhak ngiien nyiex bwan Siyiex mai kix tawx ankix, ka can pui pa yuh kaing ka daux nyiex bwan Siyiex, sonsang deeh cox priex kix ka nyiex bwan heue. 11 Kix tawx ankix ka cao pa yuh kaing taix mai ka cao pa sum nyiex khankix, sonsang liag kix tix shiao lon simaox pa hoik saik tix mai khaox lat mai sonsang tawm kix meeh nyiex, pa hoik yuh cub simiang Yudax laux heue. 12 Pui khankix yuh kaing ka daux krax pa kaux sijax tix heue. Cao pa jhak pa ngiien piang kix mawh Yahat mai Obadiyax pa mawh pui Lewix cub kawn simex Merarix mai Zekhariyax mai Meshulam cub kawn simex Kohat mawh cao bung tix jah kaing heue. Pui Lewix tang kaux pa hoik min ka grawng kraung pa tah ting mai ah lai rhax khankix, 13 Mawh cao pa teei beeh glawm mai mawh cao pa kia ngiien piang can pui pa hoik yuh kiang jhaw kuceu heue. Pui Lewix tiblah, hoik mawh cao pa tiiem lai mai cao kaing mai cao pa pau diang siviex khankix heue. 14 Yam teei kix mau pa hoik viex kix laig ka daux nyiex bwan Siyiex lih, cao giex kaing li Hilakiyax yaog pheen lai beenli Siyiex pa hoik tawx ka Mose heue. 15 Khaix an Hilakiyax deeh krai lox ah nin ka Shaphan cao pa tiiem lai, “Aux hoik yaox phuk lai beenli ka daux nyiex bwan Siyiex heue. “Hilakiyax tawx phuk lai an ka Shaphan heue. 16 Mawh kheu nan, Shaphan teei ti viex phuk lai an hu ka simiang khawm viex tix gumlox ka simiang ah nin, “Can ceu pa hoik tawm tix khawmuik ka cub kawncau mau soi maix khankix kix yuh nawh heue. 17 kix khrawm mau pa hoik yaox tix khankix ka daux nyiex bwan Siyiex mai ap ti tawx ka daux tawm taix cao pa kia ngiien kaing khankix mai ka pui pa yuh kaing khankix heue. 18 Khaix an, Shaphan cao pa tiiem lai krai grawng ankix ka simiang ah nin “Cao giex kaing li Hilakiyax hoik tawx lai tix pheen ka aux, “mai Shaphan phat lai an ka sivoe ngai simiang heue. 19 Yam in ceu ankix hoik lih ti mawh, yam hoik mhong simiang ka gumlox lai beenli an nawh riah kraung ceep cao tix heue. 20 Khaix an, simiang tawx gumlox ka Hilakiyax, Ahikam kawn simex Shaphan; Abadon kawn simex Mikha, Shaphan cao tiiem lai mai Asayax pa mawh kawncau simiang ah nin, 21 “Hu mai chawk ti yaox Siyiex ka son aux mai khawm son can pui pa kawn deuk khankix ka daux meung Isarelax mai meung Yudax, son grawng gumlox phuk lai an pa hoik yaox tix, ka pa song rhawm Siyiex hoik lih piang ex, son ang cub keeing ex khankix priex ti hawt gumlox Siyiex, sonsang hawt yuh kix awm pa hoik tiem khawmuik ka daux phuk lai in heue.” 22 Mawh kheu nan, Hilakiyax mai can pui khankix pa hoik tawx simiang beeh glawm ka kix, hu ka cao jhai bun Huladax pa mawh moeng Shalum, kawn simex Tikava kawn simex Hasharax cao pa pau nyiex deuh sibex lang jung heue. Nawh ot ka daux veng Yerusaliem plawg ra pa mawh dee ot pui hun mai kix sikah gumlox ankix ka nawh heue. 23 Bun an deeh pawk ti ah nin ka kix Simiang Siyiex ceu pui Isarelax ah nin, “Deeh ing krai ka pui pa hoik ploi pex hoek ka aux awx. 24 Siyiex ah nin jhak heue, Aux tak viex krax pa kha rhawm hoek piang pui in mai piang pui pa ot baoh in khankix awm can ceu pa jhax lawg khawmuik, pa tiiem tix ka daux phuk lai pa hoik phat kix sivoe simiang meung Yudax; 25 Mawh kheu hoik tik vud kix ka Aux mai hoik gleeing kix ti tan nyawng bhawng ka siyiex tang kaux tang hak khankix, sonsang so kix Aux song rhawm ka kaing pa yuh kix ka taix tix khawmuik. Mawh kheu nan, krax song rhawm Aux tak lih piang dee in mai ang lai chix yeet heue. 26 Ka son simiang meung Yudax pa ploi pex hu chawk ti yaox Siyiex ka grawng in, pex deeh ing krai ka nawh yuh nin, Siyiex ceu pui Isarelax ah nin, grawng gumlox can pa hoik mhong maix khankix, 27 “Mawh kheu hoik awn rhawm maix mai yuh maix tokaux cao tix tiiem ka plak sivoe Siyiex yam ghlat Nawh Cao ka son dee in mai ka son ceu pui pa ot dee in khankix mai mawh kheu jao hoik viex mai krax tiiem rhawm cao tix ka plak sivoe Aux mai riah kraung ceep cao tix mai hoik yiiem ka plak sivoe Aux, Aux baox deeh mhong ka lox sikah maix, Siyiex ah nan heue. 28 Aux tak kraix khrawm maix ing ka dee ot cub keeing maix khankix mai maix tak mawh pa kraix khrawm tix hoek ka daux simeeig ka daux pa nhim; mai ngai maix tak ang lai yaox ka pa kha rhawm an khankix pa tak sang viex Aux hoek piang baoh dee in mai khawm piang pui pa ot baoh dee in khankix heue.” “Mawh kheu nan, kix deeh viex gumlox in hoek ka simiang heue.

29 Khaix an, simiang kok mai khrawm kuad song meung Yudax mai veng Yerusaliem khawmuik heue. 30 simiang haok ka nyiex bwan Siyiex tau mai meung Yudax mai can pui pa ot ka daux veng Yerusaliem khankix, cao giex kaing li pui Lewix khankix mai pui ting pui iak khawmuik mai nawh phat kix mhong lox pa koe ka daux phuk lai sijax mukheu pa hoik yaox ka daux nyiex bwan Siyiex heue. 31 Khaix an, simiang cung tix ot ka dah dee ot nawh mai yuh sijax mukheu ka plak sivoe Siyiex, sonsang hawt tix khaix Siyiex mai sonsang priex gumlox pingnyap Nawh Cao mai beenli pa deuh Nawh Cao khankix, khawm rhawm khawm rhi tix khawmuik mai khawm ju tix khawmuik, sonsang hawt yuh awm gumlox sijax mukheu can pa hoik tiem ka daux phuk lai in heue. 32 Nawh kieh can pui pa ot ka daux veng Yerusaliem mai pui Binyamin khawmuik, kham tix rieb ka sijax mukheu an heue. Mawh kheu nan, can pui pa ot ka daux veng Yerusaliem khankix yuh awm pa koe sijax mukheu pa koe Siyiex keeing kix heue. 33 Mawh kheu nan, Yosiyax gah ti tik pa seeing brai khawmuik, khaing daux haktiex cie pui Isarelax khawmuik mai kieh pui pa ot ka daux meung Isarelax khawmuik, sau riang rao ti yuh kaing jhaw Siyiex Cao kix, ka daux baux singaix ju nawh khawmuik, kix ang phrat tix khaing hawt khaix Siyiex keeing kix heue.