1 Khaix hoik ceu an khankix, pui Mawbax, pui Amon mai pui tang ceu pa ot tau mai kix ceu pui Amawrix khankix hoek ti sang yuh naing ka Yehoshaphat heue. 2 Khaix an, pui tiblah hoek mai krai grawng ankix ka Yehoshaphat ah nin, cub pui pa kied hun tix cub hoek ti sang puing ka maix khaing plak toi rawm sigrit sigra, khaing meung Surix mai kix hoik ot ka daux veng Hazaron Tama, pa kok mawh veng Eng Gedi heue. 3 Yehoshaphat hoik kied koe krax lhat graung mai nawh tat rhawm tix sonsang sawg nawh ka Siyiex mai pao ti krai kieh pui twah pa ih ka daux meung Yudax khawmuik heue. 4 Mawh kheu nan, pui Yudax khankix hoik khrawm paox tix sonsang rawg mhaing kix krax teem khaing Siyiex mai pui khaing veng meung Yudax khankix khawmuik, hoek sawg ka Siyiex heue. 5 Khaix an, Yehoshaphat, hoik cung ti ot ka daux sigreung pui hun Yudax mai pui veng Yerusaliem ka daux nyiex bwan Siyiex sivoe bang pa khraox an, 6 Nawh ah nin, Siyiex keeing ex eue, mawh ang Maix mawh Siyiex pa ot ka daux raoma mai mawh ang Maix mawh cao pa kwang piang meung haktiex ceu pui khankix khawmuik, mawh ang sibrawm mai krax pa ting riang rao khankix koe ka daux tawm taix Maix son ang pui tix kaux kawx sang pon yaog tix tiebtie ka Maix lie? 7 Mawh ang Maix mawh Siyiex ex, pa hoik grheu ti tik pui pa ot ka daux haktiex in khankix, ka plak sivoe ceu pui Maix Isarelax mai hoik tawx haktiex in ka doeh ru Abraham, pa mawh paox grawm Maix leeing ju lie? 8 Kix ot ka daux haktiex an mai sum ti tawx dee pa singax tix dah ka daux haktiex an, son min ceu kaux Maix ah nin; 9 Phan krax laux leeing khaing vaig lawm krax prawng krax ciyang jhawm saux preng mai krax sibhawm praix khankix hoek piang yix, yix tak cung ka plak sivoe nyiex bwan in mai ka plak sivoe ngai Maix Cao, (son min ceu kaux Maix Cao ka daux nyiex bwan in) mai kok yo ka Maix Cao ka daux krax pa kham pa geu tix khankix, Maix Cao tak nghiet mai tak deeh taoh yix heue. 10 Yam in pui Amon, pui Mawbax mai pui piang gawng Sirax khankix, pa ang Maix Cao kieh ceu pui Isarelax khankix puing yam lih hoek kix khaing haktiex Ejiptux, viang mawh nan, pui Isarelax khankix hoik veeh ti hu khaing kix mai ang lai yuh kix laux leeing, 11 Inkix mawh pa caw ti tawx krax pa koe bwanson piang yix, kix sang theen yix lih khaing haktiex sinngao Maix Cao, ka pa hoik tawx Maix Cao ka yix, sonsang mawh sinngao pa sang pon yix ti cie heue. 12 O, Siyiex eue, Mawh ang Maix koe rhawm ti sang ciyang ka kix lie? Mawh kheu yix ang lai koe riang rao sibrawm ti sang puing ka cub pui pa kied haoh hun inkix, pa sang hoek ti puing ka yix mai yix ang lai tawng ka ceu pa sang yuh tix, viang mawh nan, ngai yix maong ti jhak ka Maix Cao heue. 13 Pui Yudax khankix mai kawn nyawm iak mai khawm moeng kix mai khawm kawn praix kix khawmuik, hoek ti cung tau ka plak sivoe Siyiex heue. 14 Khwan Siyiex hoik hoek piang Yahaze kawn simex Zokharix, kawn simex Benayax kawn simex Yeyelax, kawn simex Matania, pa mawh pui Lewix khaing daux cub kawn simex Asa ka daux sigreung cub pui hun khankix, 15 Nawh ah nin “Can pex pui Yudax khankix, can pui pa ot ka daux veng Yerusaliem mai simiang Yehoshaphat eue. Nghiet heue, Siyiex ah nin ka pex; paw koe krax lhat graung mai paw koe pa khi rhawm kheu jao grawng pui pa kied haok hun in khankix; mawh kheu naing ang tie mawh son cie pex, mawh ngie son cie Siyiex heue. 16 Singaix pasax lih hu mai puing ka kix heue. Kix tak bleeh tix hoek ka krax haok pui plak veng Ziza mai pex tak yaox kix hoek dee die rawm klawng iak an, pa koe ka plak sivoe daux tiagtu Yeruelax heue. 17 Pex tak ang lo ti yuh naing ka daux naing in, cung yiien yawg ka dee ot cao pex mai jhak ka krax taoh Siyiex pa ot tau mai pex, pui Yudax mai pui veng Yerusaliem khankix eue, paw doh koe krax lhat graung mai paw doh koe krax laux rhawm, lih hu ka kix daux singaix pasax, mawh kheu Siyiex tak sang ot tau mai pex heue. 18 Yehoshaphat ngeuh kaing mai gup pakngai tix piang tiex mai pui Yudax khankix mai khawm pui pa ot ka daux veng Yerusaliem khawmuik, hoik gup pakngai tix ka plak sivoe Siyiex mai krub ka Siyiex heue. 19 Khaix an, pui Lewix khankix, pa kaoh khaing daux cub kawn praix Kohat mai cub kawn praix Korax khankix, yaog ti cung sonsang yaogyaw ka Siyiex ceu pui Isarelax tau mai lox pa kied ting si num heue. 20 Kix yaog ti kaoh caocao ka daux plak ponngawb mai lih hu laig ka daux tiagtu Teko; mai yam lih hu kix, Yehoshaphat, yaog ti cung ah nin, pui Yudax mai can pui veng Yerusaliem khankix eue, Nghiet heue, Yum rhawm ka Siyiex pex mai pex tak mawh pa kaux cong, yum rhawm ka cao jhai Nawh Cao khankix mai pex tak koe krax pa pex ka heue. 21 Yam hoik kum nawh tau mai pui khankix, nawh yaog ti deuh can pui pa tak sang ah lai rhax ka Siyiex, kheu kix ceep kraung pa mhawm grang pa singax singeh mai yaogyaw bwanson Nawh Cao, hu ka plak sivoe cub kru naing khankix mai ah nin “Yaogyaw ka Siyiex, mawh kheu krax caux rhawm Nawh Cao kaux cong leeing ju heue.” 22 Yam in yam hoik jah kix ti ah lai rhax mai ah lox yaogyaw tix khankix, Siyiex yuh ti deuh pui pa yuh naing jawm khankix ka pui Amon, pui Mawbax mai pui piang gawng Sirax khankix, pa hoek ti sang puing ka pui Yudax mai kix hoik som nai heue. 23 Grawh grawng nawh, pui Amon mai pui Mawbax, yaog ti cung mai puing ka cub pui pa ot piang gawng Sirax khankix mai pah kix pak lawg mai yuh kix laux leeing khawmuik heue. Yam hoik sidah yuh kix ka pui pa ot piang gawng Sirax khawmuik, kix ra lai yuh paox tix laux leeing tix kaux lai tix kaux heue. 24 Mawh kheu nan, yam hoek pui Yudax khankix ka dee pa sang kok puan kix ti yaox ka daux tiagtu, kix yaox ka plak see pui haok pui hun an khankix mai kaux yum kix hoik goh lih yum piang tiex heue. Pui tix kaux kawx ang lai koe krax pa glawd ka heue. 25 Yam hoek Yehoshaphat mai pui nawh khankix ti teei kraung pa tud rhim cie kix hu dee singai, kix hoik yaox ka kraung pa kied ngawh mai pa koe jum tom nie piang kaux yum an khankix ka daux sinax kix mai khawm siang simaox pa laoh liean khankix mai kix peeik ti teei kraung ankix ka son tokaux cao tix nie lheu khaing krax pon klawm kix nawh hu mai kix khrawm ti teei kraung pa tud rhim an khankix loe singaix kheu jao kied nie heue. 26 Yam hoek ka daux pon singaix tix ngaix, kix deeh khrawm paox tix ka daux ngawd Berakha, mawh kheu kix hoik yaogyaw bwanson Siyiex tan heue. Mawh kheu nan, ceu kaux dee an kok mawh daux ngawd Berakha, tom hoek ka daux in singaix heue. 27 Khaix an, kix deeh blak ti ing khaing tan, pui Yudax mai pui veng Yerusaliem khankix ku kaux, khawm Yehoshaphat, hoik ot ka plak sivoe kix, sonsang deeh ing kix ka veng Yerusaliem, tau mai pa gaux rhawm, mawh kheu Siyiex hoik yuh kix koe pa gaux rhawm piang pui pa koeng kix heue. 28 Mawh kheu nan, kix hoek ka veng Yerusaliem tau mai pa tah tix ting mai khawm ting feuk mai khawm phlu tix teettawng khankix hoek ka daux nyiex bwan Siyiex heue. 29 Pa lhat graung ka Siyiex lih ti koe piang meung haktiex an, yam mhong kix ka puing Siyiex pui koeng ceu pui Isarelax khankix heue. 30 Khaix an, baoh dee ot dee koe Yehoshaphat hoik koe pa yiien yawg, kheu hoik tawx Siyiex pa nhim ka hawt vung viang nawh khawmuik heue. 31 Mawh kheu nan, Yehoshaphat, mawh simiang piang meung Yudax heue. Nawh koe ju tixngoe phwan num yam yaog nawh tix mawh simiang mai nawh kwang haktiex tixnga phwan num ka daux veng Yerusaliem heue. Ceu kaux miex nawh mawh Azuha kawn bun Shilahix heue. 32 Nawh hawt lawng ka daux krax keeing nawh Asa mai ang lai gwieh tix hu ka praok mai nawh hoik yuh ceu pa rahsee ka daux plak sivoe ngai Siyiex heue. 33 Viang yuh ka mawx kawx, dee pa lhaong khankix ang nyang bax teei ti tik, kheu jao ang pui khankix nyang bax viex rhawm ti hawt khaix Siyiex keeing kix heue. 34 Yam in grawng kaing pa deuk Yehoshaphat, yam jah tom sidah, kix hoik tiem ti deuh grawng ankix hoik mhai tix ka daux phuk lai been cub simiang ceu pui Isarelax khankix heue. 35 Khaix an, Yehoshaphat simiang meung Yudax hoik yuh paox pie tau mai Ahaziyax simiang meung Isarelax, pa kied yuh ceu pa caox caig khankix heue. 36 Nawh rom tix tau mai nawh sonsang yuh reu ting khankix sonsang hu ka veng Tasux mai kix hoik yuh reu ting khankix ka daux veng Ezion Geba heue. 37 Viang mawh nan, Eliza kawn simex Dodava, pui veng Maresha, pa hoik krai lox jhai Yehoshaphat pa ah nin, “Mawh kheu hoik rom maix cao tix tau mai Ahaziyax, Siyiex tom yuh kaing jhaw maix khankix laux leeing heue. “Khaix an, reu ting khankix hoik laux leeing ang pon hu ka veng Tasux heue.