LAI GRAWNG BEEN PHUK RA
(2 Chronicles)
1
(1Sim 3:3-15)
1 Sawlamon mawh kawn simex Davit, hoik kied koe riang rao ka daux meung haktiex kwang nawh mai Siyiex ot tau mai nawh mai yaog nawh ting heue.
2 Sawlamon, krai lox ka ceu pui Isarelax khawmuik, ka cub cao kaing naing pa kwang piang pui kaing rheng kaing yieh, ka cub cao pa prawng see khankix mai ka cub cao thong cao bung ku kaux pa koe ka daux ceu pui Isarelax khawmuik mai ka cao kaing daux doeh nyiex ma keeing kix khawmuik heue.
3 Khaix an, Sawlamon mai cub pui hun pa ot tau mai nawh khawmuik, hu ka dee pa lhaong pa koe daux veng Gibeon, mawh kheu bang kum nyiex gox bwan man Siyiex hoik koe tan, pa hoik yuh Mose kawncau Siyiex, ti deuh ka daux tiagtu heue.
4 Viang mawh kawx nan, Davit hoik teei ti viex teug bwan sijax mukheu Siyiex khaing veng Kirayat Yarim, hoek ka dee pa hoik khre Davit ti deuh son nawh, kheu hoik sum nawh tix tawx nyiex gox tix lhang ka son nawh, ka daux veng YerusaliemRef 1:4 2Sa 6:1-17; 1Been 13:5-14; 15:25; 16:1. heue.
5 Yam in khu tawng dee tanRef 1:4 2Sa 6:1-17; 1Been 13:5-14; 15:25; 16:1. pa hoik yuh Bezalelax, kawn simex Uzix, pa mawh kawn simex Hurax, hoik deuh ka plak sivoe nyiex gox bwan man Siyiex Sawlamon mai cub pui hun khankix sawg Nawh Cao tan heue.
6 Sawlamon haok bleeh ka khu tawng dee tan pa koe plak sivoe Siyiex pa hoik koe ka daux bang kum nyiex gox bwan man mai nawh gleeing ti tan tobrie tix rheng piang an heue.
7 Ka daux bo an, Siyiex hoek bleeh ka Sawlamon mai ah nin ka nawh, rawg heue, mawh sang simie maix Aux tawx ceu patix ka maix lie?
8 Sawlamon, ah nin ka Siyiex, “Maix Cao hoik jhi krax caux rhawm tix tom nie ka keeing aux Davit mai hoik kieh aux mawh simiang ka dee ot nawh heue.
9 Siyiex eue, kieh gumlox sijax mukheu Maix Cao, mawh pa kaux cong ka keeing aux Davit, kheu hoik kieh Maix Cao aux mawh simiang piang pui ceu in, pa kied nie haoh hun awm phawng tiex khankix heue.Ref 1:9 Jah 13:16; 28:14.
10 Yam in tawx pingnya cuyi mai krax tawng ka aux, sonsang pon aux ti lih mai laig ka plak sivoe pui inkix, phan ang mawh nan, mawh pui mawx pa pon prawng ca ka pui pa kied haoh hun cie Maix Cao lie?”
11 Siyiex deeh ah nin ka Sawlamon; “Kheu hoik koe rhawm maix yuh nin mai ang tie mhaing krax magmi mai sinngao krax pa koe min plakngai khawm ju pui pa koeng maix khankix mai kheu ang maix tie mhaing krax pa lang ju tix, viang mawh nan maix mhaing ngie pingnya cuyi mai krax tawng son tokaux cao maix, sonsang pon maix ti prawng ca ka pui Aux khankix, piang pui pa hoik kieh Aux maix mawh simiang;
12 Pingnya cuyi mai krax tawng yung tak tawx ka maix mai Aux tak tawx krax magmi mai pa koe sinngao mai pa koe ka maix; pa awm in, simiang pa dawg koe voe maix khankix mai simiang pa tak sang kwang khaix maix khankix ang koe pa awm maix pie tix kaux kawx heue.
(1Sim 10:26-29; 2Been 9:25-28)
13 Mawh kheu nan, Sawlamon kaoh khaing dee pa lhaong pa koe ka daux veng Gibeon mai khaing plak sivoe bang kum nyiex gox bwan man mai hoek ka daux veng Yerusaliem piang meung Isarelax heue.
14 Sawlamon kraix khrawm ling lawx naing brung mai cub pui naing brung khankix, nawh koe ling lawx naing brung tix rheng pon yieh lhangRef 1:14 1Sim 4:26. mai khawm cub pui naing brung khankix tix mheen ra rheng kaux, pa mawh pui pa hoik pang nawh ti deuh ka daux veng ling lawx naing brung mai pa hoik deuh nawh tau mai simiang ka daux veng Yerusaliem heue.
15 Simiang yuh mau mai khri khankix haoh hun awm lon simaoxRef 1:15 Pi 17:17. ka daux veng Yerusaliem mai nawh yuh khaox Arit, haoh hun awm khaox ruh khankix pa koe ka dee tiiem haktiex khankix heue.
16 Brung cie Sawlamon khankix mawh pa viex hoek khaing daux meung EjiptuxRef 1:16 Pi 17:16. mai daux veng Kevie; mawh cao yuh lai geu simiang khankix pa liag ti viex hoek khaing veng Kevie, pa koe ngawh jum baux yam an heue.
17 Kix baox deeh mhaing teei ti tawx ling lawx tix lhang ka mau liah yieh shekhe mai brung tix mu, ka mau tixyieh tixphwan shekhe, khaing meung Ejiptux, mawh kheu nan, khaing ka daux tawm taix cao pa yuh lai geu son tang kix, kix hoik pon teei ti viex ceu ankix hoek ka cub simiang ceu pui Hitix mai cub simiang ceu pui Surix, khankix heue.