1 Yam hoik kuad Davit mai yam hoik naog bawg yam singaix nawh khankix, nawh yaog kawn simex tix Sawlamon mawh simiang piang ceu pui IsarelaxRef 23:1 1Sim 1:1-40. heue. 2 Nawh kraix khrawm cao kaing ceu pui Isarelax mai cao giex kaing li khankix tau mai ceu pui Lewix heue. 3 Yam ankix simin ka pui Lewix khankix, jah ka pui koe ju tixngoe num haok plak piang pa mawh kawn simex khawmuik, koe loe mheen daix rheng kaux heue. 4 Khaing daux pui ra mheen pon rheng kaux mawh cao kaing kia ngien ka kaing nyiex bwan Siyiex mai an liah rheng kaux mawh cao kaing ting mai cao prawng see khankix, 5 an pon rheng kaux mawh cao pa pau siviex mai an pon rheng kaux mawh cao pa yaogyaw bwanson Siyiex tau mai kraung ting “Pa hoik yuh aux ti deuh, ” “Sonsang yaogyaw bwanson Siyiex heue.” 6 Davit tang gwieh ka kix cub mawx cub an khaing daux sinax kawn simex pui Lewix khankix pa mawh cub Gerashon, Kawhat mai Merarix khankix heue. 7 Khaing daux ceu pui Gerashon mawh Ladan mai Shimix heue. 8 Kawn simex Ladan khankix Yehilax mawh kawn Ai nawh, Zetam mawh kawn Nyi mai Yawlax mawh kawn Sam, kix koe loe kaux heue. 9 Kawn simex Shimix mawh Shelomix, Hazalax mai Haran loe kaux heue. In mawh cao kaing doeh nyiex ma keeing Ladan heue. 10 Kawn simex Shimix khankix mawh Yahat, Zina, Yushax mai Beriyax heue. Inkix pon kaux mawh kawn simex Shimix heue. 11 Yahat mawh kawn Ai mai Zizax mawh kawn Nyi nawh heue. Viang mawh nan, Yushax mai Beriyax ang koe kawn simex tom nie; mawh kheu nan, kix hoik kleuk tix awm doeh nyiex ma keeing tix kaux ngie heue. 12 Kawn simex Kawhat khankix mawh Amaram, Izaha, Hebron mai Zilax khawmuik koe pon kaux heue. 13 Kawn simex Amaram khankiex mawh Arun mai Mose heue. Arun mai cub doeh kawn praix nawh khankix, hoik tang gwieh ti deuh kix sonsang yuh nawh pa singax singeh khankix mawh pa kied singax singeh mai sonsang gleeing nyawng bhawng ka plak sivoe Siyiex mai sonsang mawh pa yuh kaing jhaw son Nawh Cao mai sonsang nawb bwan ka daux min ceu kaux Nawh Cao leeing ju heue.Ref 23:13 Lih 28:1. 14 Yam in cub kawn simex pui Siyiex pa mawh Mose khankix hoik mhai ti deuh ka daux doeh ru pui Lewix heue. 15 Kawn simex Mose khankiex mawh Gerashon mai Eliaza heue. 16 Khaing daux cub kawn simex Gerashon, Sheboelax mawh kawn Ai nawh, 17 Khaing daux doeh ru Eliaza khankix Rehabix mawh kawn Ai nawh heue. Eliaza ang lai koe kawn simex tang kaux khaing an heue. Viang mawh nan, kawn simex Rehabi koe tom nie heue. 18 Khaing daux cub kawn simex Izaha, Shelomit mawh kawn Ai nawh heue. 19 Khaing daux kawn simex Hebron khankix Yeri mawh kawn Ai nawh mai Amarix mawh kawn Nyi, Yahaze mawh kawn Sam mai Yekaman mawh kawn Sai nawh heue. 20 Khaing daux kawn simex Uzilax khankix, Mikha mawh kawn Ai mai Yeshi mawh kawn Nyi nawh heue. 21 Kawn simex Merarix khankix mawh Malalix mai Mushix heue. Kawn simex Malalix mawh Eliaza mai Kishax heue. 22 Eliaza tak ang koe kawn simex tix kaux kawx tom yum tix, koe ngie kawn bun khaing heue. puxaik kix, pa mawh cub kawn simex Kishax hoik teei ti moeng kawn bun nawh heue. 23 Kawn simex Mushix mawh Mahalix, Eda mai Yerimot, loe kaux heue. 24 Inkix mawh kawn praix ceu pui Lewix pa kaoh khaing daux doeh nyiex ma keeing kix, awm pa hoik koe carang kaux mawx kaux an, pa sang yaox ti yuh kaing jhaw son nyiex bwan Siyiex jah pa koe ju tixnga num haok plak piang heue. 25 Davit ah nin, “Siyiex ceu pui Isarelax hoik tawx krax pa yiien yawg ka pui Nawh khankix mai kix tak ot ka daux veng Yerusaliem leeing ju.” 26 “Nawh baox ah nin ka ceu pui Lewix khankix, “Kix tak ang lai yaox ka nyiex gox bwan man mai kraung khrai nyiex gox bwan man khaix in tix bawg kawx heue.” Ref 23:26 Pi 10:8. 27 Awm gumlox pa ghoit Davit ti ah, ceu pui Lewix khankix yaox ti teei carang, jah ka pa koe ju tixnga num haok plak piang heue; 28 Grawh grawng nawh, beeh glawm kix mawh sonsang teem ka cub kawn simex Arun ka daux kaing jhaw mai ka daux biang rawb rim nyiex bwan mai ka daux lawg khankix mai kieh kraung pa singax singeh khawmuik mawh pa singax mai khawm ka daux kaing jhaw nyiex bwan Siyiex, 29 tau mai blah pa khan ka plak sivoe Nawh Cao mai phawng nghox ca ceu pa mhawm son krax tan nghox ca pa im tau mai khlawp blah pa ang sau susaix khankix mai can ceu pa hoik tong sin ka plah rhiem mai can ceu pa klu klao tix tau mai bee mai can ceu pa hoik tiag tong ti deuh diag nawh kuceu khawmuik, 30 mai kix cung ti yaogyaw mai ting bwanson ka Siyiex ponngawp mai plak ponbo ku jheeng, 31 mai kix yaox ti gleeing krax tan pa gleeing plak sivoe ngai Siyiex jheung jheung ka daux singaix twah mai ka daux singaix haok khix khraox mai ka daux singaix pawie khankix, awm ka pa hoik tat kix ti deuh, pa koe daux beenli pa hoik yuh kix jheung jheung ka plak sivoe Siyiex. 32 Kix teei beeh glawm ka can ceu pa lo ka daux nyiex gox bwan man bang kum mai son pa lo ka dah dee pa singax singeh mai teem ka puxaik pa mawh kawn simex Arun khankix, ka son kaing jhaw ka daux nyiex bwan Siyiex khawmuik heue.Ref 23:28-32 Si 3:5-9.