1 Yam an, satan hoik yaog ti kaoh sonsang kieh ceu pui Isarelax khankix laux leeing mai hoik so rhawm Davit kieh nawh simin ka ceu pui Isarelax heue. 2 Mawh kheu nan, Davit ah nin ka Yuabax mai ka cao kaing pui khankix, “Hu heue, simin ti yaox ceu pui Isarelax khankix, jah ka veng Bereshabax tom hoek ka veng Dan mai viex carang kix hoek ka aux sonsang tawng aux ka ankix heue.” 3 Yuabax pawk lox ah nin, kieh Siyiex yuh pui Nawh Cao nie haoh hun khaing pa koe kix tixyieh son heue. Mawh kheu nan, simiang aux eue, “Ang kix khawmuik mawh siliex simiang aux lie? Simiang aux sang deeh mhaing ka ceu in khankix jao grawng pa yuh ka mawx lie? Kheu lai sang kieh mawh grawng ceu pa koe phimap ka daux ceu pui Isarelax lie?” 4 Viang mawh kawx nan, gumlox simiang hoik pex ka Yuabax heue. Mawh kheu nan, Yuabax lih khaing tan mai hu ka daux sinax ceu pui Isarelax khawmuik mai deeh hoek ka veng Yerusaliem heue. 5 Khaix an, Yuabax deeh tawx carang pui khankix ka Davit heue. Ceu pui Isarelax pa giex vaig khankix koe tix lan tix sien kaux mai ceu pui Yudax pa giex vaig khankix koe pon sien aliah mheen kaux heue. 6 Viang mawh nan, nawh ang nyang simin ka ceu pui Lewix mai ceu pui Benyamin pa koe ka sinax kix, mawh kheu jao seeing Yuabax ka gumlox simiang heue. 7 Siyiex ang lai khaw rhawm ka ceu in, mawh kheu nan, Nawh Cao hoik tawx krax kham geu ka ceu pui Isarelax khankix heue. 8 Mawh kheu nan, Davit deeh ah nin ka Siyiex, “Aux hoik lud ka pa kied ting lhaong kheu jao grawng yuh aux ceu in heue. Viang mawh nan, yam in aux rawg bwan, teei ti tik phimap siliex Maix Cao liak, grawh grawng nawh, aux hoik kied yuh ceu pa vao pa caox heue.” 9 Siyiex sikah ka Gat, pa mawh cao jhai Davit ah nin, “Hu krai ka Davit ah nin, Siyiex ah nin; 10 “Aux tak tawx ceu in loe ceu ka maix mai laug ti teei an tix ceuceu ka son cao maix, Aux tak sang yuh ceu an ka maix heue.” ” 11 Mawh kheu nan, Gat hoek ka Davit mai ah nin ka nawh, “Siyiex ah nin; laug ti teei an ka son cao maix, 12 Pa sang mawh sibhawm praix loe num mai pa sang pex pui koeng maix khankix ka maix loe khix tau mai lawm vaig pa hoik hoek ti pheet khaix maix, phan ang mawh nan, jhawm saux preng pa sang viex kawncau Siyiex tau mai vaig lawm Siyiex sonsang yuh haktiex ceu pui Isarelax khankix laux leeing heue. Yam in keud ti yaox ka lox ceu pa sang deeh krai aux ka cao pa ploi aux hoek heue.” 13 Davit ah nin ka Gat, “Aux kied koe pa laux rhawm! yuh bwanson kieh aux glup ka daux tawm taix Siyiex heue. Pa caux rhawm Nawh Cao mawh pa kied ting lhaong, viang mawh nan, paw doh kieh aux glup ka daux tawm taix kawn pui liak?” 14 Mawh kheu nan, Siyiex ploi jhawm saux preng lih hoek piang ceu pui Isarelax khankix mai pui Isarelax hoik goh ti yum aliah mheen kaux heue. 15 Siyiex ploi kawncau tix hu ka veng Yerusaliem, sonsang yuh veng an laux leeing heue. Yam tak sang yuh kawncau Siyiex veng an laux leeing, Siyiex jhak ti yaox mai koe krax pa voi rhawm mai Nawh Cao ah nin ka kawncau Siyiex, “Ding heue paw lai yuh krax pa laux leeing an, yoi taix maix heue. “kawncau Siyiex cung hawt biang glah nghox Aronax ceu pui Yebusix heue. 16 Khaix an, Davit maong ti jhak mai yaox cung kawncau Siyiex ot daux sinax haktiex raoma mai nawh nyeu vaig lawm pa koe daux taix ti piang veng Yerusaliem heue. Mawh kheu nan, Davit mai kwad song khankix ceep ka chee rhix mai gup ngai tix piang tiex heue. 17 Davit ah nin ka Siyiex, “Ang hoik mawh aux pa tawx lox ka pui khankix mai kieh kix simin ka pui haktiex ang mawh lie? Aux hoik mawh pui yuh phimap mai hoik yuh ceu pa caox caig tete, viang mawh nan, mawh hoik yuh kawn yung in khankix patix lie? Siyiex aux eue, aux rawg bwan mai kieh taix Maix Cao ot piang aux mai piang doeh nyiex ma keeing aux khankix, viang mawh nan, paw kieh jhawm saux preng krax kham geu in khankix hoek piang ceu pui Maix Cao liak!” 18 Khaix an, kawncau Siyiex hoik tawm lox ka Gat mai kieh ah nin ka Davit, kieh Davit haok sum khu dee tan tix lhang son Siyiex piang biang glah nghox Aronax ceu pui Yebusix heue. 19 Mawh kheu nan, Davit hoik lih hu awm lox pa hoik tawm Gat, ka pa hoik krai nawh ka daux min ceu kaux Siyiex heue. 20 Yam kawn pah Aronax ka nghox, nawh gi tix jhak mai yaox kawncau Siyiex mai kawn simex nawh pon kaux pa ot mai nawh khankix hoik mox tix heue. 21 Khaix an, Davit hoek ka Aronax mai Aronax jhak mai yaox ka Davit heue. Nawh lih hu khaing glah pah nghox ca mai gup kaing tix piang tiex plak sivoe ngai Davit heue. 22 Khaix an, Davit ah nin ka Aronax, tawx dah dee glah pah nghox in ka aux, sonsang sum aux khu dee tan tix lhang piang an son Siyiex heue. Maix coh ka aux awm ngawh jum pa simie maix ti pon, mawh sonsang ang jhawm saux preng hoek piang pui khankix heue.” 23 Aronax ah nin ka Davit, “Teei an ka son maix mai kieh simiang aux yuh an khankix awm pa khaw caw ka daux ngai nawh heue. Jhak heue, aux tak baox tawx moi son krax tan pa gleeing mai tawx kraung shiao biang glah pah nghox mawh son khix mai nghox ca son krax tan phawng nghox ca, aux tawx ceu an khawmuik heue. 24 Khaix an, simiang Davit ah nin ka Aronax, “Ang mawh, mawh kheu nan, aux tak liag awm ngawh jum nawh tom naog, grawh grawng nawh, aux tak ang teei kraung khrai cie maix son Siyiex mai ang tan krax tan pa gleeing pa ang koe ngawh koe jum khankix ka son tix heue.” 25 Mawh kheu nan, Davit ciang ti tawx khri liah yieh shekhe ka Aronax ka son dee an heue. 26 Davit sum khu dee tan tix lhang ka son Siyiex tan mai nawh tan krax tan pa gleeing mai krax tan pa nhim khankix mai nawh kok ka Siyiex, Nawh Cao pawk lox ka nawh tan mai ngu khaing raoma cod piang khu dee tan pa gleeing heue. 27 Khaix an, Siyiex tawx lox ka kawncau Siyiex mai nawh deeh teei vaig sau daux phak vaig heue. 28 Ka daux bawg yam an yam yaox Davit ka pawk Siyiex lox tix, ka biang glah pah nghox Aronax ceu pui Yebusix, nawh yuh krax tan pa appong tan heue. 29 Mawh kheu nyiex gox bwan man Siyiex mai khu dee tan krax tan pa gleeing, pa yuh Mose ti deuh ka daux tiag kawn koe piang dee pa lhaong ka veng Gibion daux bawg yam an heue. 30 Viang mawh nan, Davit ang pon hu ka plak sivoe an sonsang chawk cheng ka Siyiex, kheu jao lhat graung nawh ka vaig lawm kawncau Siyiex heue.