1 Khaix an, ceu pui Isarelax khankix khrawm paox tix hoek ka Davit ka daux veng Hebron ah nin, “Yix mawh si-ang maix mai mawh nex nham maix tete heue. 2 Ka daux bawg yam pa hoik luan yam kawn mawh Sawlux simiang piang yix maix hoik mawh pui pa thong bung ka pui Isarelax khankix lih hu mai deeh viex kix laig mai Siyiex ah nin ka maix, maix tak mawh cao pa liang ceu pui aux Isarelax mai mawh cao kwang piang ceu pui aux Isarelax khankix heue” 3 Mawh kheu nan, kwad riex ju pui Isarelax khankix hoek ka simiang daux veng Hebron mai Davit yuh sijax mukheu tau mai kix ka daux veng Hebron ka plak sivoe ngai Siyiex, khaix an, kix groi rawm bee ka Davit mai yaog nawh mawh simiang piang ceu pui Isarelax, awm gumlox pa hoik tawm Siyiex ti deuh ka Samoelax heue.

4 Davit mai ceu pui Isarelax khankix hu ka veng Yerusaliem, daux haktiex Yebusix mai ka dee ot ceu pui YebusixRef 11:4 Yaw 15:63; Cao 1:21. khankix heue. 5 Khaix an, pui haktiex Yebusix ah nin ka Davit “Maix tak ang pon ti laig ka daux veng in heue. “Viang yuh nan kawx Davit rhim ti teei nyiex tab Zeon pa kaux cong khankix Zeon mawh veng Davit heue. 6 Davit ah nin “Pui mawx pon ti hu puing ka ceu pui Yebusix tak pon ti mawh cao giex kaing naing ting heue. “Yuabax kawn simex Zeruya lih hu phao voe mai nawh yaox ti mawh cao kaing naing ting heue. 7 Khaix an, Davit ot ka daux nyiex tab pa kaux cong an, mawh kheu nan, kix kok dee an mawh veng Davit heue. 8 Nawh cox sum veng hawt rawb rim baoh an, jah ka haktiex Milo mai ka haktiex pa koe hawt rawb rim khankix, veng pa kawn deuk khankix mawh Yuabax pa cox sum heue. 9 Khaix an, Davit nied ti haok hwan mai ting riang sipie, mawh kheu Siyiex Cao haktiex raoma ot tau mai nawh heue.

10 Yam in, pui inkix mawh cao kaing pa kied ting riang rao pa koe tau mai Davit mai pui pa kied sau riang rao tix tau mai nawh ka daux meung haktiex tau mai ka daux haktiex nawh mai ceu pui Isarelax khawmuik sonsang yaog nawh mawh simiang, awm lox pa tawm Siyiex ti deuh ka ceu pui Isarelax heue. 11 Inkix mawh carang pui pa kied ting riang rao pa koe mai Davit, Yashoban kawn simex ceu pui Hakhamo, mawh cao kaing naing ting piang cub cao kaing naing khankix nawh mawh pui pa yaog gawng pliah tix pah ka pui loe yieh kaux tidom neh heue. 12 Khaix nawh mawh Eliaza kawn simex Dodo, ceu pui Ahohix, pa mawh pui pa kied ting riang rao khaing ka daux kix loe kaux tix kaux heue. 13 Nawh hoik ot tau mai Davit ka daux veng Pasadamim, yam in cub pui Philitix khankix khrawm paox tix sonsang puing naing mai tan koe gwang kaung pa naog ka nghox ca lang sidax tix gwang mai pui khankix to khaing ceu pui Philitix heue. 14 Viang mawh nan, kix kaog ka daux sigreung gwang kaung an mai deeh pon pah ka ceu pui Philitix khankix yum mai Siyiex deeh taoh kix ka daux krax pa pex pa kied ting heue. 15 Yam in cao kaing loe kaux khaing daux cub cao kaing ting khankix tixngoe kaux lih hu ka rang dee ot Davit ka daux Adulam mai cub kru naing ceu pui Philitix khankix pang tab ka daux ngawd Rephen heue. 16 Yam an, Davit ot ka daux tab pa kaux cong ti mai kru naing ceu pui Philitix khankix yuh tab ka daux veng Bieliehiem heue. 17 Davit ah nin ka daux pa kied keud ce tix, “Mawh pui mawx tix kaux kaux pa sang pon tawx aux nyaux rawm tix kawk khaing daux rawm veng Bieliehiem, pa koe hawt diang siviex veng lie? 18 Mawh kheu nan, pui ting riang rao loe kaux preeng tix laig ka daux sinax dee pang dee paung ceu pui Philitix khankix mai kix kin ti viex rawm khaing daux veng Bieliehiem pa koe hawt diang siviex veng ma viex rawm an ing ka Davit, viang yuh nan kawx, nawh ang cu ti nyaux rawm an, nawh see ti tan rawm an ka plak sivoe Siyiex heue. 19 Nawh ah nin, “Siyiex aux eue, kieh in mawh pa singai hu khaing aux, mawh sang pon nyaux aux nham pui inkix, pa ang lhawk ka ju tix ka daux pa yaox kix krax kha rhawm sonsang viex kix rawm in hoek lie? “mawh kheu nan, nawh ang nyaux, in mawh pa yuh pui pa ting riang rao an loe kaux heue. 20 Yam in Abishie pux Yuabax mawh cao kaing ting khaing daux kix loe kaux, nawh yaog gawng pliah pah ka pui khankix loe yieh kaux mai nawh pon krax pa ao min khaing ka daux pui inkix loe kaux heue. 21 Khaix daux cub kix tixngoe kaux nawh mawh pa nie lheu koe min, mawh kheu nan, nawh pon ti mawh cao kaing naing ting kix, viang mawh nan, nawh ang krup ka pui loe kaux ankix heue. 22 Pui veng Kapzelax, Benayax kawn simex Yehoyadax mawh pui pa koe rhawm kwa pa yuh kaing ao min, nawh pah pui Mawbax ra kaux pa kied kwa awm sivai sangsi, nawh baox lih hu mai pon pah sivai sangsi tix mu ka daux tiex bawg yam lih rawm rha heue. 23 Nawh pah pui Ejiptux tix kaux pa lhaong phwan sawk, ka daux tawm taix pui Ejiptux an koe gawng pliah pa awm blax taing heue. Benayax viex khaox gix tix lih hu ka nawh mai rhim ti teei pliah an khaing daux taix pui Ejiptux mai deeh pah nawh yum ka gawng pliah nawh heue. 24 Ceu in hoik mawh pa yuh Benayax kawn simex Yehoyadax mai nawh pon pa ao min ka daux pui pa ting riang rao khankix loe kaux heue. 25 Nawh mawh pa nie lheu koe min khaing pui ankix tixngoe kaux, viang mawh nan, nawh ang nyang krup pui phao voe ankix loe kaux mai Davit yaog nawh mawh cao kaing piang cub pui naing pa pau ju nawh khankix heue. 26 Pui naing pa kied ting riang rao khankix mawh Asahelax pux Yuabax mai Elahanan pa mawh kawn simex Dodo khaing daux veng Bieliehiem, 27 Shammot pa mawh ceu pui Harorix mai Heliet pa mawh ceu pui Pelon, 28 Irax kawn simex Ikhesha pa mawh ceu pui Tekaw mai Abeza pa mawh ceu pui Aneto, 29 Sibekhie ceu pui Husha mai Ilie, ceu pui Aho, 30 Maharie ceu pui Netawphah mai Heliet kawn simex Banax, ceu pui Netawpha, 31 Ethie kawn simex Rebie khaing veng Gibax, pa mawh kawn praix Benyamin mai Binayax ceu pui Piratawn, 32 Hurie mawh pui kaoh khaing baoh rawm klawng iak Gasha mai Abyelax, ceu pui Arabax, 33 Azamaviet ceu pui Barumix mai Eliabax ceu pui Shalabo, 34 Cub kawn simex Hashen, pa mawh ceu pui Gezawnix mai Yawnatan kawn simex Shagie ceu pui Harax, 35 Ahiam kawn simex Sakha, ceu pui Harax mai Eliphalax kawn simex Urax, 36 Hepha ceu pui Mekherax mai Ahiyax, ceu pui Pelawn, 37 Hezaraw, ceu pui Kharame mai Narie, kawn simex Ezabie, 38 Yawlax pux Nasan mai Mibaha, kawn simex Hagarix, 39 Zeliet, ceu pui Amawnix mai Naharie, ceu pui Bero cao pa klawm kaung ceep naing Yuabax, pa mawh kawn simex Zeruya, 40 Irax ceu pui Isarix mai Gariet ceu pui Isarix, 41 Uriyax ceu pui Hitix mai Zabax kawn simex Alie, 42 Adinax kawn simex Shiza, ceu pui Rubin, nawh mawh cao kaing ting tix kaux khaing ka daux ceu pui Rubin mai pa kwang ceu pui Rubin khankix tixngoe kaux, 43 Hanan kawn simex Makha mai Yoshaphat, ceu pui Mitanix, 44 Uziyax ceu pui Ashatharax, Shama mai Yehelax, mawh kawn simex Hoshan ceu pui Aro, 45 Yedelax kawn simex Shimrix mai pux nawh Yawha pa mawh ceu pui Tizix, 46 Elelax ceu pui Mahvi, Yeribie mai Yawshaviyax, pa mawh kawn simex Elanaam mai Itamma, ceu pui Mawbax, 47 Elelax, Obet mai Yasilax ceu pui Mezawbek khankix heue.