1 Siyiex eue, pui tang ceu khankix, hoik hoek ka daux sin Maix, kix hoik kieh nyiex Bwan pa singax singeh Maix, seeing brai mai hoik yieh ti tik veng Yerusaliem heue.Ref 79:1 2Sim 25:8-10; 2Been 36:17-19; Ye 52:12-14. 2 Kix hoik teei ti tawx sim raoma khankix, ih ka tokaux yum siliex Maix khankix mai kix hoik teei ti tawx nex nham pui Maix ka totiag pa caox khankix heue. 3 Kix teei nham kix hieh hawt vung viang veng Yerusaliem, awm lih rawm mai ang koe pui sipaung. 4 Paox plawg paox nyhawm pa ot dex vung viang aux khankix, salao mai nyiah maung aux heue. 5 Siyiex eue, krax song rhawm song rhi Maix ang cu tix naox yiien, kawn sang rheung miex grheung? Rhawm rhi Maix ang nyang fah, tak sang hax awm ngu, kawn rheung miex grheung? 6 Krax pa song rhawm song rhi Maix teei tix hieh ka piang pui tang ceu pa ang tawng ka Maix mai ka piang pui meung pa ang kok ka ceu kaux Maix khankix heue. 7 Grawh grawng nawh, kix kiied tix ih ka nex geh nyiex Yakop mai yieh laux dee ot dee koe kix heue. 8 Phimap pa yuh tax keeing ex dix, paw kieh hoek ka piang ex liak. Mawh kheu ex hoik rau hoik ot dee tiiem mai Maix caux rhawm ka ex mai nied tix teem launglaung liak. 9 Siyiex Cao pa taoh ka ex eue, ka daux min plakngai ceu kaux Maix, teem ka ex liak. Ka daux ceu kaux Maix taoh ti teei aux mai ploi phimap aux liak. 10 Mawh kheu patix, pui tang ceu khankix ah nin, Siyiex kix koe dee mawx? Maix prawng ca ka nham pui Maix, pa hoik teei pui tang ceu khankix, sidawng ka sivoe ngai ex liak. 11 Maix nghiet ka lox pa riag, pa ngia pui pa ot ka daux thawng khankix mai taoh ka pui pa tak sang pah yum khankix ka daux plawng taix Maix pa ting sibrawm liak. 12 Siyiex eue, ka piang pui, paox plawg aux, pa salao ka Maix khankix, deeh viied tix tawx phimap ka piang naok kix, tom sidah aliah son liak. 13 Mawh kheu nan, can ex pa mawh pui Maix mai cub yung pasax sawm tau mai Maix khankix, tak sang yaogyaw ka Maix jheung jheung mai plak jhi bwanson Maix ka pui pa tak sang mawh khaix in leeing ju heue.