1 Aux ploi lox mai kok yo ka Siyiex heue, Nawh nghiet lox pa kok yo aux heue. 2 Yam hoek aux krax khi rhawm, aux sawg ka Maix Siyiex heue. Yam ponsawm aux yaog taix tix rawg bwan, ju aux thiang ti tik pa nyawm rhawm heue. 3 Aux keud grawng Siyiex mai khi rhawm mai ngia tix heue. Aux keud rhawm tix mai laux rhawm heue. 4 Maix kieh ngai aux blah leeing sawm, aux khi rhawm tom ang lai pon sikah heue. 5 Aux doh keud ka grawng singaix pa hoik luan mai jhong khix mee num pa hoik luan dix. 6 Bawg yam ponsawm aux jawg tix keud mai rhax lai mai aux chawk ka daux rhawm ti ah nin mai aux chawk cheng ka ju tix heue. 7 Siyiex khex hoik tik vud aux jheung jheung lie? Khaix in ang Nawh yuh bwanson ka aux tix bawg kawx lie? 8 Krax caux rhawm Nawh hoik uik jheung jheung lie? Sijax mukheu Nawh hoik laux leeing, leeing ju lie? 9 Hoik pi awm Nawh krax caux rhawm lie? Nawh Cao hoik prah hoik grham krax caux rhawm pa moh, kheu song rhawm song rhi Nawh lie? 10 Phan yuh nan, aux lawk kham geu grawng pa ting rhawm aux heue. Lheu khaing taix khawn dawm Siyiex, pa ting lhaong khaing, pa chix cox ka aux heue. 11 Aux tak krai ka grawng kaing pa hoik yuh Maix mai doh keud ka ceu pa daox am pa hoik yuh Maix tom didix. 12 Aux keud grawng ceu pa hoik yuh Maix mai krax prawng ca Maix khankix heue. 13 Siyiex eue, daux krax Maix mawh pa singax singeh heue. Siyiex mawx pa lheu ting khaing Maix Siyiex lie? 14 Maix mawh Siyiex Cao pa chix yuh ceu pa daox am mai pa hoik jhi sibrawm ka ceu kawn pui khankix heue. 15 Maix hoik teei plawng taix mai hoik taoh ka pui Maix, ceu pui Yakop mai ceu pui Yosiep khankix heue. 16 Siyiex eue, rawm khankix yaox ka Maix mai lhat graung heue. Rawm pa raux khankix kawx, yung yiang heue. 17 Paiawm khankix, lih mawh rawm, raoma kawx, sinum praix heue. Te Maix kawx, hoik tah hu kudauh kudee heue. 18 Lox tuh sah Maix viex tix ka daux bhaung keu kang lux mai puk plak praix khankix, hoik riang yuh haktiex heue. Haktiex kawx yung yiang hu heue. 19 Daux krax Maix koe ka daux rawm sigrit sigra mai grawng hu Maix kied sidaing vieh mai khaix Caong Maix ang chix yaox sidawng. 20 Maix hoik teei taix Mose mai Arun, thong ka pui Maix awm cub phung yung heue.