1 Siyiex kaoh mai yuh laux ka pui pa koeng ka Nawh mai kieh prung prang hu kudah dee liak, mai pui pa koeng ka Nawh khankix, kieh to khaing Nawh liak. 2 Kieh kix vung viang hu, awm vung viang taox ngu liak, mai kieh kix ceh hu awm bee kax pa dex ngu, kieh pui pa ang rahsee, laux leeing sivoe ngai Siyiex liak. 3 Kieh pui pa rahsee khankix gaux rhawm sivoe ngai Siyiex liak mai kieh kix gaux sile hu sivoe liak. 4 Ah lai ka Siyiex mai rhax lai yaogyaw ka ceu kaux Nawh, cox daux krax sivoe sang hu Nawh daux tiag mai ceu kaux Nawh mawh Siyiex heue. Gaux sile hu sivoe, sivoe ngai Nawh Cao awx. 5 Siyiex ot ka daux nyiex bwan pa singax singeh Nawh mai mawh keeing ka kawn doe khankix mai prawng ca ka son miexmai khankix heue. 6 Siyiex tawx akhwang ka pui pa ang koe paox pie, mawh nyiex ma heue. Mai Nawh Cao tawx krax nyawm rhawm ka pui pa ot daux thawng daux gang khankix. Phan mawh pui pa tieh feen ka Nawh khankix, yaox ti ot dee kroh dee kram heue. 7 Siyiex eue, yam thong Maix ka pui Maix mai hu ka daux tiag, 8 mawh kheu min plakngai Maix, haktiex yung yiang mai lhiex lih khaing raoma heue. Mawh kheu min plakngai Siyiex, gawng Sina kawx, yung yiangRef 68:8 Lih 19:18. heue. 9 Siyiex eue, Maix kieh lhiex lih tom nie mai joh jhan ka sinngao Maix pa mawh pui pa taug pa mao khankix heue. 10 Pui Maix khankix hoik yaox dee ot dee koe tix heue. Siyiex eue, Maix hoik rien ti deuh bwanson ka son kix pui pa hot sibhawm heue. 11 Mawh kheu Siyiex tawx lox kieh pui hu sidiex lox bwan gaux rhawm gaux rhi ka son pui pa ang nyang tawng khankix heue. 12 Simiang mai kru naing nawh khankix to heue. Mai bun pa deuk daux nyiex nawh khankix, gwieh ti ih ka kraung khrai pa hoik pon kix heue. 13 Mawh kheu hoik caw pex ti ot sinax gawng mai awm sikaux pa hoik om pruik tix ka mau mai hauk tix ka khri raoh heue. 14 Siyiex Cao pa grum mai sibrawm pa ting, yam kieh Nawh cub simiang khankix, prung prang dee ot kix tan mai awm rawm rha pa lih ka piang gawng Zalamon heue. 15 Gawng Bashan pa lhaong pa choek pa grum naog mawh gawng Bashan cie Siyiex heue. 16 Gawng pa grum naog pa lhaong pa choek khankix eue, yuh patix pex lai jiang ka gawng pa simie Siyiex ti ot yuh ka mawx? Siyiex yuh dee ot Nawh, ka piang gawng tan jheung jheung leeing ju heue. 17 Ling brung cie Siyiex pa nie lheu khaing kaing mheen kaing sien, lih hoek khaing gawng Sina mai hu ka dee ot pa singax singeh heue. 18 Yam deeh haok Nawh Cao ka dee lhaong, Nawh giex ti viex pui hu tom nie mai Siyiex ot ka daux sinax kawn pui mai pon rieb totaix khaing pui Nawh khankix mai khawm pui pa tieh feen heue. 19 Siyiex mawh pa koe bwanson ku jheung jheung mai Cao pa taoh ka ex yam tuktiaktukte pui ka ex heue. 20 Siyiex ex mawh Cao pa taoh ka ex mai mawh Siyiex Cao pa taoh ex lih khaing ka daux krax pa yum heue. 21 Siyiex tak sang tawk kaing pui pa koeng ka Nawh mai viah ti tik ngawg pui pa yuh phimap tete heue. 22 Siyiex ah nin, Aux tak viex kix hoek khaing meung Bashan mai Aux viex kix hoek khaing rawm sigrit sigra pa raux. 23 Phan yuh nan maix tak dig ka nham kix mai sox maix khankix tak sang lied ti ih nham kix heue. 24 Siyiex eue, kix hoik yaox pa hu Maix, Siyiex aux mai simiang aux, ka dee singax singeh heue. 25 Cao pa rhax lai hu sivoe mai bunkrih cao tah kraung hu sinax mai cao pa tah ting hawt khaix heue. 26 Ceu pui Isarelax khawmuik eue, yaogyaw ka Siyiex, ka daux dee khrawm pui hun khankix paox tix heue. 27 Jah ka Benyamin pa iak mai tom hoek ka Simiang Yudax mai Simiang Zebulon mai khawm Simiang Napthalix heue. 28 Siyiex eue, jhi ex yaox sibrawm Maix liak. Siyiex eue, kieh bwanson pa yuh Maix ka ex kaux cong liak. 29 Kieh simiang khankix, viex totaix ka Maix, son daux nyiex bwan pa koe ka daux veng Yerusaliem liak. 30 Sidiex gau ka totiag pa caox pa vao, pa ot ka daux tiag priem ang ah mai cub phung mawie praix mai kawn mawie pa awn ju pa eei pui khankix, viex bliah mau mai krub ka Maix ka daux pa viex rhawm awn rhawm tiiem liak. Ceu pui pa simie ti yuh naing khankix, kieh prung prang hu kudah dee liak. 31 Kieh cao cau simiang khaing meung Ejiptux hoek liak. Mai kieh pui meung Ethiopia nied ti yaog taix tix ka Siyiex heue. 32 Can meung pa koe ka piang haktiex khawmuik eue, rhax lai yaogyaw ka Siyiex awx. 33 Rhax lai yaogyaw ka Siyiex Cao pa jah tom dix mai Cao pa brug ka raoma ka piang raoma, jhak heue, Nawh Cao ploi lox pa ting pa sinum hu heue. 34 Rieb ti teei grawng pa ting Siyiex sibrawm awx, min plakngai Nawh koe ka piang pui Isarelax mai sibrawm Nawh kieh sidawng ka daux pai awm heue. 35 Siyiex eue, Maix mawh pa khaw ex ti lhat graung ka praix dee singax singeh Maix heue. Siyiex Isarelax mawh Cao pa tawx riang rao mai sibrawm ka pui Nawh khankix heue. Kieh Siyiex koe bwanson liak.