1 Siyiex eue, nghiet ka lox pa rawg aux bwan liak, paw lai mox khaing pa rawg mhaing aux liak. 2 Jhak ka aux mai deeh pawk lox aux liak, aux iak riang rao mai ngia khi rhawm heue. 3 Mawh kheu lox pui pa koeng ka aux, kheu pa tuktiak tukte pa ang rahsee mai pa deuh phimap ka piang aux, ka daux pa song rhawm mai koeng ka aux heue. 4 Rhawm rhi tokaux aux siyaung mai kied lhat graung ka krax yum pa sang hoek ka piang aux heue. 5 Krax pa lhat pa siyaung hoek ka piang aux mai hoik kheem ka piang aux heue. 6 Aux ah nin, kieh aux koe pruik awm sikaux liak, phan yuh nan, aux sang pu hu tang dah tang dee mai laux lee tix mhawm mhawm heue. 7 Aux tak sang hu dee singai mai tom dee ot ka daux tiagtu heue. 8 Aux nied ti to sonsang luan khaing lhiex ting bhaung ting heue. 9 Siyiex eue, kieh lox pa ah kix prung prang grai mu liak, mawh kheu hoik yaox aux, pa khin ti teei mai tud rhim ka daux veng heue. 10 Kix ca daw hu ka piang guh veng ku singaix ang jud jai mai yuh krax pa caox caig mai yuh pa seeing brai ka daux veng heue. 11 Kix khin ti yuh ceu pa ang khaw ka daux sigreung veng mai tuktiak tukte mai pie lhen ka pui daux krax heue. 12 Pui pa salao ka aux, ang mawh pui pa koeng ka aux, phan mawh, aux pon gun pon yeung heue. Pui pa ot tang plak, ang mawh pui koeng ka aux, phan mawh, aux pon via heue. 13 Pui pa yuh nan mawh mhai pui plak aux mai paox grawm aux mai pui paox meed tawng aux heue. 14 Ex tang kum kawng mai paox tix mhawm mhawm mai ex hu tau mai cub pui hun ka daux nyiex Siyiex heue. 15 Kieh simiang kix yum giex liak, phan kix kawn im ju, kieh lih hu ka daux meung yum, grawh grawng nawh, phimap koe dee ot kix mai ka daux kix heue. 16 Phan mawh aux, kok ka Siyiex mai Siyiex taoh aux heue. 17 Yam ponbo, yam ponngawb mai yam pongaix, aux kha rhawm mai ngia mai Nawh Cao mhong lox aux heue. 18 Yam yuh kix naing ka aux, Nawh Cao taoh ju aux mai kieh aux nyawm rhawm heue. Pui pa ot plak aux kied sidaing nie hun heue. 19 Siyiex Cao pa jah bah ma la rawm dix, nghiet ka lox aux mai yeen kix goh, mawh kheu ang kix thai lox cox rhawm tix mai ang koe rhawm lhat ka Siyiex heue. 20 Pui pa yuh nan, chix lud chix lud ka paox grawm tix mai ang kaux sijax heue. 21 Lox jheeh nawh nyu awm bee kawx, daux rhawm nawh keud grawng sang yuh naing heue. Lox nawh awn awm bee kawx, awm vaid pa hoik lawd ti deuh heue. 22 Kraung cien pa klawm maix deuh piang Siyiex awx. Nawh tak teem ka maix heue. Nawh ang sax kieh pa lhat graung hoek ka piang pui pa rahsee heue. 23 Siyiex eue, Maix teei ti sau kix ka daux pa laux leeing heue. Pui pa teei ju pui yum mai pui pa ang kaux sijax, paw kieh kix im ju pie tix plak singaix, phan mawh aux, deuh rhawm ka Maix heue.