1 Ceu kawn pui khawmuik eue, nghiet awx. 2 Kawn pui piang haktiex khawmuik, pa iak pa ting ang ah pa mi pa hot ang ah, khrawm paox tix nghiet awx. 3 Jheeh aux krai lox cuyi pingnya mai rhawm rhi aux keud sawn ka pa dex dawd mai cuyi pingnya heue. 4 Aux veeh yhaok tix nghiet ka lox been mai tah ting mai plak jhi grawng ceu pa raux pa mox heue. 5 Yam hoek bawg yam pa nu, pa caox caig mai yam hoek rob pui pa caox caig khankix kawx, aux tak lhat ka ceu patix? 6 Pui pa deuh rhawm ka kraung khrai tix mai kix yaw tix, kheu kied haoh kraung khrai kix heue. 7 Kaux pui mawx ang ah, ang doh pon taoh ka puxaik tix mai sonsang taoh, ang doh pon tawx ngawh ka Siyiex. 8 Sonsang taoh ka ju kix mawh pa kied ngawh kied ting jum heue. Phan yuh nan, ju kix tak som nai giex heue. 9 Pui ang pon taoh ka ju, sonsang im leeing ju mai son ang lai hoek ka daux simeeig heue. 10 Nawh yaox yuh nin, pui pa koe cuyi pingnya kawx chix yum awm an, pui pa daox pa aw pa koe rhawm totiag kawx, chix laux leeing mai kraung khrai kix, prah ka pui tang kaux heue. 11 Kix keud daux rhawm tix, nyiex kix mai dee ot dee koe kix mawh pa kaux cong leeing ju mai ceu kaux kix ao min ka piang haktiex heue. 12 Viang mawh kawx nan, min plakngai kix, ang lai chix kaux cong mai nawh chix laux leeing awm pa laux totiag heue. 13 Kix deuh rhawm tix ka daux pa yuh nan mai pui khankix nghiet lox sikah kix heue. 14 Grheu kix lih hu ka daux meung yum, awm cub yung mai Simiang meung yum, tak sang ih kix heue. Pui pa rahsee khankix, giex kaing kwang kix been tix ngawb mai tokaux dee ot kix, deeh tieh loh mai dee ot kix mawh meung yum heue. 15 Phan mawh aux, Siyiex priex aux mai taoh ju aux khaing sibrawm meung yum heue. 16 Yam yaox maix mag mi pui mai koe mau khri mai ting min plakngai haok huan nyiex ma nawh, paw kieh rhawm maix ghoing kah heue. 17 Yam yum nawh, kraung khrai nawh mai min plakngai nawh, ang lai pon ti viex hawt khaix nawh tix ceu kawx heue. 18 Yam kawn im ju nawh, nawh chix yaw ka tokaux tix mai yam yuh nawh kaing son tokaux tix, pui yaogyaw ka nawh heue. 19 Viang mawh nan, nawh tak sang hu ka dee ot tax du (Yadie kix) heue. Kix ang yaox ka pa riang leeing ju heue. 20 Pui pa grum naog ka min plakngai mai pa ang koe cuyi pingnya khankix, awm totiag pa hoek krax pa laux leeing heue.