1 Pui pa doh keud ka pui pa hot pa sibhawm khankix ting bwanson heue. Siyiex kieh nawh luan ka bawg yam singaix pa nu pa khawm heue. 2 Siyiex tak teem ka nawh mai kieh ju nawh nyawm rhawm mai nawh tak sang pon bwanson ka daux meung Nawh Cao heue. Maix ang tawx nawh ka pui pa koeng ka nawh khankix. 3 Siyiex tak sang joh jhan teem ka nawh, yam saux yam ngia nawh mai Siyiex cox dee it nawh heue. 4 Aux ah nin, “Siyiex eue, caux rhawm ka aux liak mai kieh jhawm saux ju aux moi liak, mawh kheu hoik phit lud aux ka Maix heue.” 5 Pui pa koeng ka aux khankix, krai lox map ka aux, nawh tak yum mai ceu kaux nawh grai lai mawx? 6 Yam hoek nawh ti jhak ka aux, nawh ah lox pie lhen heue, ka daux rhawm rhi nawh, keud tix krai grawng pa ang mhawm yam lih hu nawh heue. 7 Can pui pa koeng ka aux khankix, ot tang plak mai krai lox supsiep ka paox tix, tix kaux lai tix kaux mai keud pa ang mhawm ang mhiem ka piang aux heue. 8 Kix nieb ah nin, nawh hoik goh mai ang tau ti deeh pon kaoh tix bawg kawx heue. 9 Paox grawm pa yum rhawm aux, pa ih blah aux, yaog caong tix tiied ka aux heue.Ref 41:9 Mat 26:24; Mak 14:21; Luk 22:22; Yo 13:18; 17:12. 10 Siyiex eue, caux rhawm ka aux, kieh aux deeh kaoh, sonsang deeh viied aux ti pawk phimap kix liak. 11 Son ang pui pa koeng ka aux khankix pex aux, teem ka aux liak mai kieh aux tawng grawng pa moh Maix aux heue. 12 Maix hoik teem mai kieh aux grum koe mai tawx dee ot aux sivoe ngai Maix leeing ju heue. 13 Kieh Siyiex ceu pui Isarelax koe bwanson leeing ju liak.Ref 41:13 Yaog 106:48. Amen, Amen.