1 Aux ah nin, aux yuh satix mai priex rhawm ka dak tix son ang lai lud, yam ot pui pa ang rahsee sivoe ngai aux mai aux thox jheeh tix ang ah lox tidtix heue. 2 Ang aux lai sikah awm pui aw, pie lox ceu pa mhawm kawx, ang aux krai, viang mawh nan, krax pa laux rhawm aux nie kin heue. 3 Ka daux rhawm aux hoik si aoh yam keud aux tokaux tix, lih hax awm ruk ngu heue. 4 Siyiex eue, kieh aux tawng tom sidah krax, ka grawng ju aux mai sonsang tawng aux grawng pa chix laux leeing tokaux tix heue. 5 Jhak heue, Maix hoik kieh ju aux dawd mai ju aux kawx ang mawh tidtix, sivoe ngai Maix, phan mawh kawn pui, viang nawh ting lhaong kawx, mawh pa giex going heue. 6 Phan mawh kawn pui awm ngie kawn pheue mai kha rhawm, ang koe bwanson tidtix, viang kix khrawm ti deuh kraung khrai kawx, ang kix tawng ka pui sang pon heue. 7 Siyiex eue, yam in aux keut pot ka ceu patix? Krax krox krax jun aux, koe ngie ka daux Maix khaing heue. 8 Taoh aux lih khaing phimap pa lud tix liak, paw kieh pui pa caox khankix, map mai salao ka aux liak. 9 Mawh kheu grawng kaing pa yuh Maix, aux tom ang lo ti ah tidtix heue. 10 Paw nyang ciyang ka aux ha, aux ot daux tawm taix pa sivied Maix ti gau mai riang rao aux hoik uik heue. 11 Maix sivied ti ciyang ka kawn pui, mawh kheu phimap nawh, Maix kieh min plakngai pa khaw rhawm kix grai hu, awm viag pa chix yuh laux mai kawn pui khawmuik mawh pa giex going heue. 12 Siyiex eue, nghiet ka lox pa rawg pa mhaing aux mai veeh yhaok Maix nghiet ka lox pa kok yo aux liak, paw lai jhak ka rawm ngai aux, aux mawh ngie nyo sinie sivoe ngai Maix, awm ju tax du ex khankix heue. 13 Veeh plakngai Maix ka aux sonsang nyawm rhawm rhi aux, tom ang aux nyang gah hu mai grai hu liak.