YAOGYAW 149
1 Ah lox rhax pa khraox mai yaogyaw ka Siyiex mai min plakngai Nawh ka dee khrawm pui pa singax singeh khankix heue.
2 Kieh ceu pui Isarelax gaux rhawm ka daux Cao pa phan pa deuh pex liak. Mai kieh pui Zion khankix gaux rhawm ka daux Simiang kix liak.
3 Kieh kix graoh thiao mai yaogyaw ka ceu kaux Nawh liak, kieh kix tah kawng, tah ting mai yaogyaw ka Nawh Cao liak.
4 Grawh grawng nawh, Siyiex moh ka pui Nawh khankix mai Nawh kieh pui pa awn rhawm khankix koe min plakngai ka krax taoh Nawh heue.
5 Kieh pui pa singax singeh khankix gaux rhawm liak. Kieh rhax lai pa gaux rhawm ka dee it dee tum kix liak.
6 Kieh krax pa yaogyaw min plakngai Siyiex koe ka jheeh kix liak. Kieh vaid lawm khawm ra plak koe ka tawm taix kix liak.
7 Kieh deeh tawx phimap ka pui tang ceu khankix, awm pa khaw mai beenli mai tawx krax pa kha rhawm ka pui khankix,
8 teei ceng mai phyawk ka simiang khankix mai teei ceng phyawk ka simiang greem kix,
9 mai sonsang prawng ca ka phimap, awm pa hoik tiem ti deuh mai pui pa singax Nawh khankix koe min plakngai heue. Haleluya!