YAOGYAW 147
1 Yaogyaw ka Siyiex heue. Grawh grawng nawh, krax pa yaogyaw ex ka Siyiex mawh kaing pa khaw pa keung ex ti yuh heue.
2 Siyiex yuh ka veng Yerusaliem mai kieh pui Isarelax pa hoik to dee singai khankix, deeh kieh kix hoek khrawm paox tix tan heue.
3 Nawh Cao kieh pui pa laux rhawm khankix nyawm rhawm mai pai dee saux kix moi heue.
4 Nawh Cao simin ka simuing khankix mai sum ti deuh ceu kaux mu mawx mu an heue.
5 Siyiex ex mawh pa kied ting sibrawm mai krax tawng yung Nawh ang lai uik krai heue.
6 Siyiex yaog kaoh ka pui pa awn rhawm khankix mai Nawh Cao kieh pui pa ang rahsee khankix goh ka piang tiex heue.
7 Rhax lai yaogyaw ka bwanson Siyiex heue. Tah ting yaogyaw ka Siyiex ex awx.
8 Nawh Cao teei paiawm mai kheem ka raoma mai khrex rawm lhiex son haktiex, kieh rib riem kuah ka piang gawng lua khankix heue.
9 Nawh Cao tawx ceu pa ih ka totiag mai kawn lak pa ah lox khankix heue.
10 Nawh Cao ang moh ka riang rao brung mai plawng taix plawng caong pui heue.
11 Siyiex moh ka pui pa lhat graung ka Nawh mai moh ka pui pa krox jun ka krax caux rhawm Nawh heue.
12 Veng Yerusaliem eue, yaogyaw ka Siyiex awx. Veng Zion eue, yaogyaw ka Siyiex maix awx.
13 Grawh grawng nawh, Nawh Cao kieh siviex veng maix kaux cong mai nawb bwanson ka kawn praix pa ot mai maix heue.
14 Nawh Cao kieh mee haktiex maix yiien yawg tix mai tawx nghox koi pa kied mhawm sonsang ih maix tom sak heue.
15 Nawh Cao ploi gumlo tix hu ka piang haktiex mai gumlox Nawh phai khran tah tom sidah haktiex heue.
16 Nawh Cao tawx rawm rha awm hauk yung mai Nawh Cao rhuat rawm ciex lih awm nyaox heue.
17 Nawh Cao ploi mu pre lih awm ceu pa ih mai pui mawx pon kham ti cung, ka pa kied sikiied an.
18 Nawh Cao baox deeh ploi gumlox tix mai kieh rawm rha an ceh hu awm rawm heue. Nawh kieh bhaung hoek mai rawm lih hu heue.
19 Nawh tawx gumlox tix ka ceu pui Yakop mai lox tawm beenli Nawh mai krax prawng ca Nawh ka pui Isarelax heue.
20 Nawh Cao ang yuh nan, ka pui tang ceu mai kix ang tawng ka krax prawng ca Nawh ti deuh. Haleluya.