1 Siyiex Simiang aux eue, aux yaog Maix ting mai yaogyaw ka ceu kaux Maix leeing ju heue. 2 Aux tak yaogyaw ka Maix ku singaix jheung jheung mai aux tak yaogyaw ka ceu kaux Maix ku ju leeing ju heue. 3 Siyiex mawh Cao pa ting lhaong mai khaw ti yaogyaw ka Nawh heue. Nawh ting lhaong miex ding ex ang dak uik krai heue. 4 Kawn pui tix ju hoik tix ju, yaogyaw ka kaing pa hoik yuh Maix mai plak jhi ka sibrawm Maix pa ting khankix heue. 5 Aux doh keud mai yaogyaw ka sibrawm pa ting pa hoik yuh Maix mai ceu pa daox am pa yuh Maix khankix heue. 6 Kix krai grawng sibrawm Maix pa khaw ti lhat graung khankix mai aux kawx, tak sang krai grawng pa ting lhaong Maix heue. 7 Kix doh keud mai krai grawng pa jiet mhawm Maix, kix tak rhax lai gaux rhawm grawng pa rahsee Maix heue. 8 Siyiex hoik grum naog bwanson krax caux rhawm mai koe krax pa gun yeung mai krax caux rhawm Nawh kied ting heue. 9 Siyiex yuh pa mhawm khawmuik mai Nawh caux rhawm ka pa hoik phan tix khawmuik heue. 10 Siyiex eue, can pa phan pa deuh Maix khankix, yaogyaw ka bwanson Maix mai pui pa singax singeh khankix yaogyaw ka Maix heue. 11 Kix tak krai grawng min plakngai meung Maix mai krai grawng sibrawm Maix, 12 mai tak krai grawng sibrawm pa ting lhaong pa hoik yuh Maix khankix mai min plakngai meung Maix ka kawn pui khankix heue. 13 Meung Maix mawh meung leeing ju mai Maix mawh Simiang ku ju leeing ju heue. 14 Siyiex joh jhan ka pui pa goh khankix mai yaog kaoh ka pui pa awn rhawm khankix heue. 15 Ceu pa phan pa deuh pa im ju khankix khawmuik, maong ti jhak ka Maix mai yam hoek bawg yam, Maix tak tawx kix ih heue. 16 Maix di taix tix mai kieh can pa im ju khankix sak heue. 17 Daux krax Siyiex mawh pa rahsee mai pa yuh Nawh ti deuh khawmuik mawh pa singax singeh heue. 18 Siyiex ot dex mai pui pa kaux sijax mai pa rawg mhaing ka Nawh khawmuik heue. 19 Nawh Cao kieh alo pui pa lhat graung ka Nawh, grum naog heue. Nawh nghiet ka lox pa kok yo kix mai taoh kix heue. 20 Siyiex teem ka pui pa moh ka Nawh khankix heue. Nawh yuh laux leeing ka pui pa ang rahsee khankix heue. 21 Jheeh aux tak ah lox rhax yaogyaw ka Siyiex heue. Kieh pui khawmuik yaogyaw ka ceu kaux Nawh pa singax singeh ku ju leeing ju heue.