1 Siyiex eue, doh keud ka Davit, pa yaox nawh ti kham geu mai krax kha rhawm nawh liak. 2 Nawh hoik tiextu tix ka Siyiex pa ting sibrawm pa krub ceu pui Yakop ah nin, 3 “Aux ang nyang laig ka daux nyiex dee ot tix, aux ang lai haok it ka piang ku dee it tix. 4 Ang kieh ngai it mai ang kieh siyieb ngai aux yip, 5 tom sidah ang aux nyang yaox nyiex dee ot Siyiex mai dee ot Siyiex pa ting sibrawm pa krub ceu pui Yakop kah heue. 6 Ex hoik mhong nyiex gox Siyiex an koe ka meung Epharat, ka daux tiagtu heue.” 7 Laig ka daux nyiex bwan dee ot Nawh mai ex grux ngawng ti krub dex ngot dee deuh Nawh caong heue. 8 Siyiex eue, tokaux Maix mai teug sijax mukheu mai min plakngai sibrawm Maix haok ot ka dee ot Maix liak. 9 Kieh cao giex kaing li Maix khankix, ceep kraung pa rahsee mai kieh pui pa singaix Maix khankix rhax lai pa gaux rhawm liak. 10 Mawh kheu jhak Maix ka plakngai siliex Maix Davit mai paw lai tik plakngai kaw pa hoik groi Maix rawm bee ka liak.Ref 132:8-10 2Been 6:41-42. 11 Lox sijax mukheu pa hoik tiextu Siyiex ka Davit mai Nawh ang yuh laux ka sijax an mai Aux tak sang kieh simie ceu cad maix mawh pa ngawm ka piang dang ngeung maix heue.Ref 132:11 2Sa 7:12-16; 1Been 17:11-14; Yaog 89:3-4; Cau 2:30. 12 Phan kawn praix maix priex ti hawt yuh ka lox tawm beenli Aux mai grawng pa hoik kham Aux sakse, pa hoik gau Aux ka maix khankix, kawn praix kix kawx, tak sang pon ti ngawm ka piang dang ngeung maix jheung jheung leeing ju heue. 13 Siyiex laug ti teei ka veng Zion mai khaw ka rhawm Nawh mai yuh mawh dee ot Nawh jheung jheung heue. 14 Veng in mawh, veng dee ot Aux jheung jheung, mawh kheu simie Aux ti ot ka daux veng in heue. 15 Aux tak nie lheu nawb bwanson, son pa ih ka nawh heue. Aux tak tawx pui pa hot sibhawm nawh ih pa ih tom sak heue. 16 Aux tak kieh cao giex kaing li nawh khankix, jawg tix ceep ka kraung krax taoh mai pui pa singax singeh nawh khankix, ah lox sinum mai ah lox rhax pa gaux rhawm heue. 17 Aux tak kieh rung lawm Davit lih tan heue. Aux hoik cox khre kawk ngu son kaw pa hoik groi Aux rawm bee heue.Ref 132:17 1Sim 11:36. 18 Aux tak teei krax pa kaig tua ceep ka pui pa koeng ka nawh khankix mai teei mhok khri nawh pa pruh riang ceep ka piang kaing nawh heue.