YAOGYAW 119
1 Can pui pa grum hawt ka beenli Siyiex khankix, koe bwan son heue.
2 Can pui pa priex ka sakse pa kham Nawh khankix mai pui pa viex khawm rhawm tix mai sawg ka Nawh, koe bwanson heue.
3 Kix ang chix yuh phimap, viang mawh nan kix hu hoek ka daux krax Nawh heue.
4 Nawh Cao hoik tawx hoik gau lox tawm beenli sonsang cuca ex ti hawt twah klaung heue.
5 Kieh daux krax pa hu aux kaux cong mai sonsang pon ti hawt lox tawm beenli Maix khankix liak.
6 Yam hawt aux ti yuh ka lox tawm beenli Maix khawmuik, kieh aux luan khaing krax pa kaig tua liak.
7 Khaix hoik gau aux ti tawng ka krax pa rahsee Maix, aux tak yaog yaw Maix ka rhawm pa rahsee tix heue.
8 Aux tak hawt ti yuh ka lox tawm beenli Maix khankix heue. Paw lai tik vud aux liak.
9 Pui pa awn ju khankix, chix priex krax hu tix yuh ka mawh, yuh satix kheu gumlox Nawh Cao heue.
10 Aux viex khawm rhawm tix, sawg ka Maix heue. Paw kieh aux lud hu khaing lox tawm beenli Maix liak.
11 Aux hoik priex gumlox Maix ka daux rhawm tix, son ang sang lud ka Maix heue.
12 Siyiex eue, Maix koe bwanson heue. Gau aux ka lox tawm beenli Maix liak.
13 Aux kieh jheeh tix sidiex ka grawng pa kaoh khaing daux jheeh Maix khawmuik heue.
14 Aux gaux rhawm ka daux krax pa kham sakse khankix, awm pa pon aux kraung khrai kuceu khawmuik heue.
15 Aux tak keud ka grawng pa hoik sidiex gau Maix khankix mai jhak ka daux krax pa hu Maix khankix heue.
16 Aux tak gaux rhawm ka daux lox tawm beenli Maix khankix mai ang doh pi awm ka gumlox Maix heue.
17 Yuh bwanson ka aux, yam kawn im ju aux mai sonsang pon hawt aux gumlox Maix heue.
18 Paoh ngai aux, sonsang chix yaox aux ka ceu pa daox am, ka daux beenli Maix heue.
19 Aux mawh nyo sinie ka piang haktiex in, paw lai mox lox tawm beenli Maix khaing aux liak.
20 Rhawm aux bih hu, kheu simie ti yaox ka krax prawng ca Maix ku jheung jheung heue.
21 Nawh Cao sivied tix gau ka pui pa ting rhawm mai pa yaox ti kham geu ka lox pa jhax lawg kheu cha nie luan yuh ka lox tawm beenli Maix khankix heue.
22 Kieh aux luan khaing pui pa salao mai pa ah lox pa ang cee ang cag, kheu hawt aux ka sakse pa kham Maix heue.
23 Simiang khankix, ot tang plak briex ti kum grawng aux, viang mawh nan, aux mawh siliex Maix keud grawng lox tawm beenli Maix khankix heue.
24 Grawng pa kham Maix ti deuh sakse khankix, mawh dee gaux rhawm mai pa tawx krax keud krax sawn ka aux heue.
25 Ju aux ot ka daux phawng tiex mai kieh aux im ju awm pa koe gumlox Maix liak.
26 Aux tak krai jhawm ceu pa hoik yuh aux khankix, Maix hoik nghiet ka lox aux mai Maix gau aux ka lox tawm beenli Maix liak.
27 Kieh aux tawng daux krax pa sidiex gau Maix liak, phan yuh nan, aux doh keud ka ceu pa daox am pa hoik yuh Maix khankix heue.
28 Rhawm aux sijieh mai teh hu kheu krax pa laux rhawm lauxrhi heue. Kieh aux kaux cong awm pa koe gumlox Maix liak.
29 Kieh aux gwieh hu khaing krax pie lhen mai caux rhawm tawx lox tawm beenli Maix ka aux liak.
30 Aux hoik laug ti teei ka krax sijax mukheu Maix mai aux hoik priex ka krax pa prawng ca Maix ka sivoe ngai aux heue.
31 Aux hoik priex ti hawt ka grawng ceu pa hoik kham sakse khankix, Siyiex eue, paw kieh aux hoek krax pa kaig tua liak.
32 Aux tak leue tix hawt ka daux krax lox tawm beenli Maix, yam kieh Maix aux koe cuyi pingnya heue.
33 Siyiex eue, gau aux ka daux krax lox tawm beenli Maix liak, aux tak hawt tom sidah heue.
34 Kieh aux tawng cuyi pingnya Maix liak. Aux tak hawt ka lox tawm beenli Maix mai viex khawm rhawm rhi tix mai hawt yuh heue.
35 Thong aux hu ka daux krax lox tawm beenli Maix, aux moh ka daux krax an heue.
36 Kieh aux koe rhawm rhi, ka grawng ceu pa kham sakse, lheu khaing pa koe rhawm pa mi pa koe liak.
37 Kieh ngai aux via khaing pa ang koe bwanson tidtix mai kieh aux im ju ka daux krax Maix liak.
38 Kieh gumlox Maix kaux cong ka siliex pa lhat graung ka Maix khankix liak.
39 Kieh ceu pa salao mai pa lhat graung aux grai hu liak. Krax pa prawng ca Maix mawh pa mhawm heue.
40 Aux krox ti nghiet ka lox pa sidiex gau Maix khankix heue. Kieh aux im ju ka beenli pa rahsee Maix liak.
41 Siyiex eue, kieh krax caux rhawm Maix mai bwanson krax taoh Maix hoek ka piang aux, awm pa koe gumlox Maix liak.
42 Mawh kheu nan, sonsang pon aux ti pawk lox pa salao pui khankix, kheu deuh aux rhawm ka gumlox Maix heue.
43 Paw lai teei lox sijax mukheu lih khaing daux jheeh aux, mawh kheu krox jun aux ka krax prawng ca Maix heue.
44 Aux ang lai laux lee mai hawt ti yuh lox tawm beenli Maix jheung jheung heue.
45 Aux chawk cheng ti sawg ka lox pa sidiex gau Maix khankix mai aux tak yaox ti hu ka daux pa vieh pa ang koe pa tiebtie heue.
46 Aux tak krai grawng ceu pa hoik kham sakse khankix, ka simiang khankix mai ang koe krax pa kaig tua.
47 Aux tak gaux rhawm ka daux lox tawm beenli Maix ka pa moh aux khankix heue.
48 Aux tak yaog ka taix tix, hu ka lox tawm beenli Maix pa moh aux mai pa doh keud aux ka lox tawm beenli Maix khankix heue.
49 Doh keud doh sawn ka gumlox pa hoik deuh Maix ka aux, grawng pa kieh Maix aux krox jun liak.
50 Mawh kheu gumlox Maix aux yaox ti im ju, kheu gumlox an, aux koe krax nyawm rhawm yam yaox aux krax pa kha rhawm heue.
51 Viang pui pa ting rhawm rhi khankix salao ka aux kawx, aux ang doh tik vud lox tawm beenli Maix.
52 Siyiex eue, aux doh keud ka krax prawng ca Maix tom dix mai kieh tokaux aux nyawm rhawm tiru heue.
53 Aux kied song rhawm ka pui pa nieb yuh khankix, mawh kheu tik kix ka lox tawm beenli Maix khankix heue.
54 Lox tawm beenli Maix khankix, mawh grawng lox rhax ka daux nyiex yam mawh aux nyo heue.
55 Siyiex eue, aux doh keud ka ceu kaux Maix bawg yam ponsawm mai hawt ka lox tawm beenli Maix heue.
56 Mawh kheu nghiet aux ka lox pa sidiex gau Maix khankix, aux tom koe riang heue.
57 Siyiex eue, Maix mawh son aux, aux hoik krai ti deuh, aux tak sang nghiet gumlox Maix khankix heue.
58 Aux khyox khaw ka Maix, khawm rhawm rhi tix mai kieh aux pon bwanson Maix mai krax caux rhawm Maix, awm pa koe gumlox Maix liak.
59 Yam keud aux grawng krax pa hu aux khankix, caong aux deeh tieh ti hu ka grawng pa hoik kham sakse heue.
60 Aux ang lai koi, nied tix hawt yuh ka lox tawm beenli Maix heue.
61 Viang pui pa ang rahsee rob vung viang aux kawx, aux ang doh pi awm ka lox tawm beenli Maix heue.
62 Yam jhak aux ka krax prawng ca Maix hawt beenli khankix, aux kaoh yam greung sawm mai yaogyaw ka bwanson Maix heue.
63 Aux yuh paox pie ka pui pa lhat graung ka Maix mai pui pa nghiet ka lox pa sidiex gau Maix khankix heue.
64 Siyiex eue, krax caux rhawm Maix hoik naog ka piang haktiex mai gau aux ka lox tawm beenli Maix liak.
65 Siyiex eue, Maix yuh bwanson ka siliex Maix awm pa koe gumlox Maix heue.
66 Tawx pa tawng pa yung cuyi pingnya pa mhawm ka aux, kheu aux yum rhawm Ka lox tawm beenli Maix heue.
67 Ka sivoe ang aux nyang yaox ti kham geu krax kha rhawm, aux hoik lud krax hu tix heue. Viang mawh nan yam in, aux hoik deeh hawt ka gumlox Maix heue.
68 Maix koe rhawm pa mhawm mhiem mai rhawm pa chix yuh bwanson heue. Gau aux ka lox tawm beenli Maix liak.
69 Viang pui ting rhawm ting rhi khankix ot tang plak mai keud lox pie lhien kawx, aux tak viex khawm rhawm rhi mai priex ti hawt gumlox pa sidiex gau Maix heue.
70 Rhawm kix hoik awm lon bee, phan mawh aux, gaux rhawm gaux rhi ka lox tawm beenli Maix heue.
71 Kra pa kha rhawm aux, mawh pa ting bwanson, son aux grawh grawng nawh, sonsang gau aux ka lox tawm beenli Maix heue.
72 Lox tawm beenli pa kaoh khaing jheeh Maix nie lheu mhawm khaing mau khri kaing rheng, kaing mheen ka son aux heue.
73 Taix Maix hoik yuh aux mai kieh aux mawh pakpeung tix mai kieh aux tawng krax tawng yung sonsang chix gau aux lox tawm beenli Maix liak.
74 Pui pa lhat graung ka Maix khankix, yam yaox kix ka aux gaux rhawm, mawh kheu krox jun aux ka gumlox Maix heue.
75 Siyiex eue, aux tawng grawng krax prawng ca Maix mawh pa mawh meh mai pa kieh Maix aux yaox krax kha rhawm khaw mai sijax mukheu Maix heue.
76 Aux rawg mhaing ka Maix, awm koe lox mukheu Maix, tawx krax caux rhawm Maix kieh aux nyawm rhawm liak.
77 Kieh krax caux rhawm Maix hoek ka piang aux mai kieh aux im ju liak. Grawh grawng nawh, aux gaux rhawm ka lox tawm beenli Maix heue.
78 Kieh pui pa ting rhawm rhi khankix kaig tua liak. Mawh kheu kix nieb yuh pa ang rahsee ka aux, phan mawh aux, doh keud ka lox pa sidiex gau Maix heue.
79 Pui pa lhat graung ka Maix mai pui pa tawng ka Maix, sakse pa kham Maix ti deuh khankix tak deeh hoek ka aux heue.
80 Kieh rhawm aux grum naog ka lox tawm beenli Maix, kieh aux luan khaing krax pa kaig tua liak.
81 Ju aux krox ju ka bwanson krax taoh Maix mai aux iak riang hu heue. Viang mawh kawx nan, aux krox jun ka gumlox Maix heue.
82 Ngai aux krox jun ka gumlox Maix mai iak riang hu mai Maix tak tawx krax nyawm rhawm ka aux bawg yam lai mawx?
83 Aux hoik awm singiien rawm pa krat singao, viang mawh nan, aux ang doh pi awm ka lox tawm beenli Maix heue.
84 Aux kawn sang yaox ti ot bawg yam miex grheung? Maix tak prawng ca ka pui pa tuktiak tukte ka aux lai mawx?
85 Pui pa ting rhawm mai pa lheu ka lox tawm beenli Maix khankix, hoik kaong daux ka son aux heue.
86 Lox tawm beenli Maix khawmuik mawh pa grum mai sijax mukheu heue. Kix nieb tuktiak tukte ka aux, teem ka aux liak.
87 Kix dex teei ti tik aux khaing piang haktiex, viang mawh nan, aux ang tik ka lox pa sidiex gau Maix heue.
88 Kieh aux im ju awm krax caux rhawm Maix liak. Aux tak priex ti hawt ka gumlox pa kham Maix ka jheeh tix heue.
89 Siyiex eue, gumlox Maix kaux cong ka piang raoma jheung jheung heue.
90 Sijax mukheu Maix kaux cong piang ceu pui leeing ju heue. Maix hoik phan haktiex mai kieh nawh kaux cong jheung jheung heue.
91 Can pa koe khawmuik mawh siliex Maix mai krax prawng ca Maix kaux cong tom hoek singaix heue.
92 Phan aux ang gaux rhawm ka beenli Maix, aux hoik dawg laux leeing yam yaox aux krax kha rhawm heue.
93 Aux ang pi awm ka ceu pa sidiex gau Maix tix bawg kawx, grawh grawng nawh, Maix kieh aux im ka lox beenli Maix heue.
94 Aux mawh cie Maix heue. taoh ka aux, mawh kheu sawg aux ka lox pa sidiex gau Maix heue.
95 Pui pa ang rahsee khankix, kix pau tix sang yuh aux laux leeing heue. Viang mawh kawx nan, aux tak doh keud ka grawng pa kham sakse heue.
96 Aux hoik grum yaox dee sidah kuceu khawmuik mai gumlox beenli Maix mawh pa kied ting kied vieh heue.
97 Aux kied moh ka lox tawm beenli Maix sigrien sigre mai aux doh keud mai lih rhawm ka leeing lang singaix heue.
98 Lox tawm beenli Maix khankix, kieh aux nie lheu koe cuyi pingnya khaing pui pa koeng ka aux khankix mai beenli an, kaux cong mai aux jheung jheung heue.
99 Aux nie lheu tawng khaing sara cao gau tix mawh kheu doh keud aux ka pa kham sakse heue.
100 Mawh kheu priex aux tix hawt ka lox pa sidiex gau Maix mai nie lheu koe krax tawng yung khaing pui pa riex ju khankix heue.
101 Aux tik ka ceu pa ang mhawm mai priex tix hawt ka gumlox Maix heue.
102 Aux ang tang hu khaing krax prawng ca Maix, mawh kheu hoik gau Maix ka aux heue.
103 Gumlox Maix sidaing tie ka daux ghok aux mai nie lheu tie khaing rawm hia ka daux jheeh aux heue.
104 Krax tawng krax yung aux, haok hwan, mawh kheu lox pa sidiex gau Maix mai aux koeng ka krax pa ang mawh ang meh khankix heue.
105 Gumlox Maix mawh kawk ngu sivoe caong aux mai kieh krax pa hu aux riang heue.
106 Aux hoik tiextu ah nin, “Aux tak priex ti hawt krax prawng ca Maix rahsee heue.”
107 Siyiex eue, aux kied kha rhawm tix, kieh aux im ju awm pa koe gumlox Maix heue.
108 Siyiex eue, aux khyox khaw ka Maix rieb ti teei ka krax pa tan lu aux khawm rhawmrhi mai tokaux jheeh jhai tix liak. Gau aux ka krax prawng ca Maix liak.
109 Ju aux koe ka daux taix Maix jheung jheung heue. Viang mawh kawx nan, aux ang pi awm ka beenli Maix heue.
110 Pui pa ang rahsee khankix, hoik taong ti deuh kie ka son aux heue. Viang mawh kawx nan, aux ang lud hu ka daux krax lox pa sidiex gau Maix heue.
111 Aux rieb ti teei ka pa kham Maix ti deuh mhai sakse khankix, mawh son sin tokaux aux jheung jheung mai ceu ankix kieh rhawm aux gaux rhawm heue.
112 Aux viex rhawm ti hawt ka lox tawm beenli Maix tom sidah jheung jheung heue.
113 Aux koeng ka pui pa koe rhawm ra mu, pa nieb yuh khankix mai aux moh ka beenli Maix heue.
114 Maix mawh dee mox aux mai kraung naing pa tiebtie aux mai krox jun ka gumlox Maix heue.
115 Pui pa yuh phimap khankix eue, lih hu khaing aux heue. Tak priex ti hawt ka lox tawm beenli Siyiex heue.
116 Joh jhan aux awm koe gumlox Maix mai kieh aux im ju liak. Paw kieh aux hoek krax pa kaig tua ka pa krox jun aux Maix liak.
117 Teem coi ka aux sonsang pon krax pa nyawm rhawm mai tak hawt ka lox tawm beenli Maix jheung jheung heue.
118 Maix tik vud ka pui pa lud krax ka lox tawm beenli Maix khankix heue. Pa keud kix mawh pa pie lhen heue.
119 Maix deuh pui haktiex pa ang rahsee khankix khawmuik mawh kraung pa dah jum heue. Mawh kheu in, aux tom moh ka pa kham mhai sakse heue.
120 Hauk haw aux pruh kheu kied lhat kied graung ka Maix, kheu krax prawng ca Maix heue.
121 Aux yuh awm krax prawng ca mai prawng ca rahsee heue. Paw lai tik vud aux ka daux tawm taix pui pa tuktiak tukte ka aux liak.
122 Maix rieb ti teei ka siliex Maix ka daux pa mhawm liak. Paw kieh pui pa ting rhawm khankix, tuktiaktukte ka siliex Maix liak.
123 Ngai aux hoik iak riang ka pau tix bwanson krax taoh Maix mai gumlox pa rahsee Maix heue.
124 Yuh ka aux awm koe Maix krax caux rhawm mai gau aux ka lox tawm beenli Maix liak.
125 Aux mawh siliex Maix heue. Cauxrhawm tawx krax tawng yung ka aux mai kieh aux tawng pa kham sakse khankix liak.
126 Bawg yam sang prawng ca Siyiex hoik hoek, grawh grawng nawh, kix hoik tik ka beenli Maix heue.
127 Phan mawh aux, moh ka lox tawm beenli Maix, nie lheu khaing khri pa hoik thi heue.
128 Mawh kheu in, aux priex ka lox pa sidiex gau Maix khawmuik, mawh pa rahsee mai koeng ka krax pa ang mawh meh heue.
129 Grawng pa kham sakse khankix mawh ceu pa daox am mai ju aux priex ti hawt heue.
130 Gumlox Maix mawh pa plak jhi pa riang ka pui pa ang tawng tidtix khankix, kieh deeh tawng heue.
131 Aux ang jheeh tix mai taug mao ka simie ti pon ka lox tawm beenli Maix heue.
132 Yuh bwanson jhak ka aux, awm pa sax yuh Maix ka kix pui pa moh ka ceu kaux Maix liak.
133 Awm koe gumlox Maix, kieh diang caong aux kaux cong liak. Paw kieh phimap ting ka piang aux liak.
134 Taoh aux lih khaing daux pui pa tuktiak tukte ka aux liak. Aux tak priex ti hawt ka lox sidiex gau Maix heue.
135 Kieh pakngai Maix jhan riang ka piang aux mai gau aux ka lox tawm beenli Maix khankix liak.
136 Mawh kheu ang kix priex ti hawt ka beenli Maix, rawm ngai aux lih awm rawm klawng heue.
137 Siyiex eue, Maix mawh pa rahsee heue. Grawng krax prawng ca Maix khankix kawx, mawh pa rahsee heue.
138 Sakse pa kham Maix ti deuh khankix, mawh pa khaw mai beenli pa rahsee mai pa kaux sijax tom nie heue.
139 Aux sung sang laux rhawm tix, kheu pui pa koeng ka aux khankix, pi awm ka lox beenli Maix heue.
140 Mawh kheu gumlox Maix mawh pa kied singax singeh mai mawh pa khaw rhawm siliex Maix khankix kah heue.
141 Aux mawh pui pa iak, pa yaox ti kham geu ka pa nieb yuh pui pa ang cee ang cag kah heue. Viang mawh kawx nan, aux ang pi awm ka gumlox pa sidiex gau Maix khankix heue.
142 Pa rahsee Maix mawh pa rahsee leeing ju heue. Beenli Maix mawh beenli pa kaux sijax heue.
143 Viang pa nu pa khawm mai pa kha rhawm hoek ka piang aux kawx, lox tawm beenli Maix khankix, kieh aux gaux rhawm heue.
144 Grawng pa kham sakse khankix mawh pa rahsee jheung jheung heue. Tawx krax tawng yung mai kieh aux im ju liak.
145 Siyiex eue, aux viex khawm rhawm khawm rhi ti kok yo, nghiet ka lox aux liak. Aux tak priex ti hawt ka lox tawm beenli Maix heue.
146 Aux kok yo ka Maix, taoh aux liak mai aux tak priex ti hawt sakse pa kham Maix khankix heue.
147 Aux kok yo ka Maix, ka ang praix nyang riang, aux krox jun ka gumlox Maix heue.
148 Ka sivoe ang ponsawm nyang bax luan, aux siduad mai doh keud ka gumlox Maix heue.
149 Siyiex eue, awm koe krax caux rhawm Maix nghiet ka lox aux liak. Kieh aux im ju ka krax prawng ca Maix liak.
150 Pui pa ang mhawm, pa keud ti yuh pa ang mhawm khankix hoik hoek dex aux, kix mawh pa singai khaing beenli Maix heue.
151 Siyiex eue, Maix ot dex aux mai lox tawm beenli Maix khawmuik mawh pa kaux sijax heue.
152 Aux hoik tawng pa kham sakse khankix, mawh pa kaux cong jheung jheung tom didix heue.
153 Jhak ka pa kha rhawm mai taoh aux liak, aux ang pi awm beenli Maix heue.
154 Priex aux mai taoh aux liak, kieh aux im ju awm pa koe gumlox Maix liak.
155 Krax taoh Maix singai khaing pui pa ang rahsee khankix, mawh kheu ang kix sawg ka lox tawm beenli Maix khankix heue.
156 Siyiex eue, rhawm pa caux rhawm Maix, koe tom nie heue. Kieh aux im ju awm pa khaw mai krax prawng ca Maix liak.
157 Pui pa tuktiaktukte ka aux mai pui pa lah cha ka aux kied nie heue. Viang mawh kawx nan, aux ang via hu khaing grawng pa kham sakse khankix heue.
158 Yam yaox aux ka pui pa ang kaux sijax khankix, aux song rhawm heue. Grawh grawng nawh, kix ang nghiet ka gumlox Maix heue.
159 Jhak mai keud grawng pa moh aux, ka lox pa sidiex gau Maix khankix liak. Siyiex eue, kieh aux im ju awm pa koe pa caux rhawm Maix liak.
160 Gumlox Maix khawmuik mawh pa mawh meh heue. Pa prawng ca Maix ti deuh khawmuik mawh pa kaux cong jheung jheung heue.
161 Viang simiang khankix tuktiaktukte aux ka pa ang tie koe grawng kawx, rhawm aux lhat graung ka gumlox Maix heue.
162 Aux gaux rhawm ka gumlox Maix, awm pui pa yaox ka kraung khrai pa ngawh heue.
163 Aux seeing brai mai nieh mhong ka lox pie lhen heue. Viang mawh kawx nan, aux moh ka lox beenli Maix heue.
164 Aux yaogyaw ka Maix, tix singaix aliah bawg, kheu krax prawng ca Maix mawh pa rahsee heue.
165 Pui pa moh ka gumlox beenli Maix khankix, ang koe krax laux rhawm mai pon pa nhim tom nie heue.
166 Siyiex eue, aux krox jun ka bwanson krax taoh Maix mai priex ti hawt lox tawm beenli Maix heue.
167 Ju aux priex ti hawt ka pa hoik kham Maix ti deuh mhai sakse khankix mai aux kied moh sigrien sigre heue.
168 Aux priex ti hawt ka lox pa sidiex gau Maix mai pa kham Maix ti deuh sakse khankix heue. Daux krax aux khawmuik koe sivoe Maix heue.
169 Siyiex eue, kieh lox pa kok yo aux hoek sivoe ngai Maix liak. Tawx krax tawng yung ka aux awm pa koe gumlox Maix liak.
170 Kieh lox pa rawg pa mhaing aux hoek sivoe ngai Maix liak. Taoh ka aux awm pa koe gumlox Maix liak.
171 Jheeh aux tak ah lox yaogyaw, mawh kheu gau Maix aux ka lox tawm beenli Maix khankix heue.
172 Dak aux tak ah lox rhax ka gumlox Maix, mawh kheu lox tawm beenli Maix mawh pa rahsee heue.
173 Kieh taix Maix teem ka aux, mawh kheu aux laug ti teei ka lox sidiex gau Maix heue.
174 Siyiex eue, aux krox jun ka bwanson krax taoh Maix heue. Aux gaux rhawm gaux ka daux beenli Maix heue.
175 Kieh aux im ju mai yaogyaw ka Maix mai teem ka aux ka krax prawng ca Maix liak.
176 Aux hoik lud krax hu, awm yung pa hoik grai hu tix mu mai sawg ka aux liak. Aux ang pi awm ka lox tawm beenli Maix heue.