1 Aux moh ka Siyiex, mawh kheu nghiet Nawh ka ceu pa rawg mhaing aux heue. 2 Mawh kheu nghiet Nawh Cao ka lox aux, aux tak sang yaogyaw ka Nawh, yam kawn im ju aux heue. 3 Maox krax yum khankix, hoik rob ka aux mai meung yum hoik giex ka aux mai aux yaox krax pa kha rhawm heue. 4 Yam an aux rawg bwan ka ceu kaux Siyiex mai khyox khaw ah nin, “Siyiex eue, taoh ka ju aux liak.” 5 Siyiex koe rhawm pa chix yuh bwanson mai koe rhawm pa rahsee mai Siyiex ex koe krax pa chix caux rhawm heue. 6 Siyiex teem ka pui pa daox aw khankix mai yam ot aux ka dee tiiem, Nawh Cao taoh ti teei aux heue. 7 Ju aux eue, deeh ka dee ot maix mhawm mhawm heue. Siyiex hoik yuh bwanson ka maix heue. 8 Maix hoik taoh ju aux khaing krax yum mai hoik awt rawm ngai khaing ngai aux mai hoik taoh caong aux khaing dee sideeing caong heue. 9 Mawh kheu in, aux tak hu sivoe ngai Siyiex, ka daux dee ot pui pa im ju khankix heue. 10 Viang aux yaox ti kham krax kham krax geu kawx, Ref 116:10 2Kaw 4:13. aux kawn ah kawn koe krax yum rhawm heue. 11 Aux ang yuh satix mai loe ti ah nin, “Pui khawmuik chix ah lox pie lhen heue.” 12 Bwanson pa hoik yuh Siyiex ka aux kuceu khawmuik, aux tak sang deeh pon viied yuh ka mawx? 13 Aux tak giex ka kawk krax taoh mai rawg bwan ka daux ceu kaux Siyiex heue. 14 Aux tak tan ka plak sivoe ngai pui Siyiex khawmuik, awm pa hoik yuh aux sijax mukheu ka Siyiex heue. 15 Krax yum can pui pa singax singeh pa moh Nawh Cao, mawh pa kied ngawh, sivoe ngai Siyiex heue. 16 Siyiex eue, aux mawh siliex Maix tete heue, aux mawh siliex Maix, aux mawh kawn simex bun siliex Maix heue. Maix hoik yah aux lih khaing pa phyawk tix heue. 17 Aux tak tan mai yaogyaw ka bwanson Maix mai rawg mhaing ka daux ceu kaux Siyiex heue. 18 Aux tak tan ka plak sivoe ngai pui Siyiex khawmuik, awm pa hoik yuh aux sijax mukheu ka Siyiex heue. 19 Veng Yerusaliem eue, nyiex dee ot Siyiex, koe ka sigreung maix heue. Haleluya!