1 Ju aux eue, yaogyaw ka Siyiex heue. Can pa koe ka daux aux khawmuik eue, yaogyaw ka ceu kaux Nawh pa singax singeh heue. 2 Ju aux eue, yaogyaw ka Siyiex heue, paw pi awm ka bwanson Nawh Cao khankix heue. 3 Nawh Cao hoik pluat ploi phimap maix kuceu mai hoik kieh jhawm saux maix moi khawmuik heue. 4 Nawh Cao taoh ju maix lih khaing ka daux pa laux leeing mai bwanson krax caux rhawm Nawh, koe ka piang kaing maix heue. 5 Nawh Cao teei ceu pa mhawm mai kieh ju maix fah rhawm mai deeh cox ju maix, awn awm klang krih heue. 6 Siyiex prawng ca rahsee son pui pa kham geu ka krax pa tuktiak tukte khawmuik heue. 7 Nawh Cao hoik krai kaing ceu pa sang yuh Nawh ka Mose mai plak jhi kaing pa yuh Nawh khankix ka ceu pui Isarelax heue. 8 Siyiex hoik grum naog ka krax pa caux rhawm mai pa chix yuh bwansonRef 103:8 Jas. 5:11. mai pa lang gun lang yeung mai krax pa caux rhawm tom nie heue. 9 Nawh ca deuh phimap jheung jheung ang mawh, Nawh deuh pa lud daux rhawm tix jheung jheung ang mawh heue. 10 Nawh ang lai deeh tawx phimap ka phimap, awm phimap pa hoik yuh ex heue. 11 Awm lhaong raoma khaing haktiex, krax pa caux rhawm Nawh Cao kied ting lhaong ka piang can pui pa lhat graung ka Nawh khankix heue. 12 Awm pa singai, plak lih singaix, khaing plak klip singaix, Nawh Cao kieh phimap ex, singai khaing ex heue. 13 Awm pa caux rhawm keeing ka kawn tix, Siyiex caux rhawm ka can pui pa lhat graung ka Nawh khankix heue. 14 Grawh grawng nawh, Nawh Cao hoik tawng grawng tokaux ex mai doh keud ka mawh ex phawng tiex heue. 15 Singaix bawg yam ex kawn pui, awm num rib mai nawh chix pruh awm tai daux tiagtu heue. 16 Bhaung phlu nawh luan hu mai tai nawh grai hu mai ang tawng dee bleeh nawh khaix. 17 Krax pa caux rhawm Siyiex, jah tom dix, tom hoek leeing ju, ca koe ka piang can pui pa lhat graung ka Nawh heue. 18 Pui pa priex ka sijax mukheu Nawh mai pa koe satix mai pa priex ti hawt ka lox tawm beenli Nawh khankix mai krax pa rahsee Nawh, koe ka piang kawn praix kix leeing ju heue. 19 Siyiex deuh dang ngeung Nawh piang raoma mai sibrawm pa giex Nawh kaing tah hu kudah kudee heue. 20 Kawncau Siyiex pa ting sibrawm mai pa nghiet ka gumlox Nawh mai pa hawt ti yuh ka gumlox pa tawx Nawh khankix eue, yaogyaw ka Siyiex heue. 21 Cub kawncau raoma pa hawt ti yuh ka alo Nawh Cao khankix eue, yaogyaw ka Siyiex heue. 22 Can pa phan pa deuh Nawh kudah kudee khawmuik eue, yaogyaw ka Siyiex heue. Ju aux eue, yaogyaw ka Siyiex heue.