LAI YAOGYAW
(Psalms)
YAOGYAW 1
Baux Tix
1 Pui pa ang hu ka daux pa nyaw glaw pui caox caig khankix, pui pa ang cung ka daux krax pui yuh phimap khankix, pui pa ang ngawm tau mai pui pa yuh pa ang cee ang cag khankix,
2 mai pui pa gaux rhawm ka daux beenli Siyiex mai pa keud ku singaix ku sawm khankix, koe bwanson heue.
3 Nawh awm khaox pa sum praok rawm klawng, Ref 1:3 Ye 17:8. yam hoek bawg yam, chix plix heue. Lhax nawh kawx, ang chix teue chix kroh mai kaing pa yuh nawh kuceu khawmuik kawx tak ting lhaong heue.
4 Pui pa caox caig khankix ang lai mawh nan, kix awm kam riex pa phlu bhaung hu heue.
5 Mawh kheu in pui pa caox caig khankix, ang kaux cong bawg yam prawng ca, mai pui yuh phimap khankix, ang pon ti ot dee ot cub pui pa rahsee khankix heue.
6 Grawh grawng nawh, Siyiex hoik tawng ka daux krax pui pa rahsee khankix. Daux krax pui pa caox caig khankix tak sang hoek krax laux leeing heue.