1 Rhawm simiang koe ka daux tawm taix Siyiex, awm rawm klawng, chix kieh vai hu awm koe alo Nawh heue. 2 Kawn pui chix fah rhawm ka pa yuh tix, phan mawh Siyiex ciang tix yaox rhawm khankix heue. 3 Siyiex khaw rhawm ka pa yuh ceu pa rahsee mai pa prawng ca rahsee, nie lheu khaw rhawm khaing ceu pa tan heue. 4 Plakngai pui ting rhawm mai rhawm cong coh, pa riang pui pa ang rahsee khankix, mawh phimap heue. 5 Krax keud pui pa coca ti yuh, mawh pa mi pa koe heue. Krax keud pui pa ang koe satix pa mawh pa meh mawh pa hot sibhawm heue. 6 Sinngao, mau khri pa khrawm ti deuh ka lox pie kheem khankix, awm taox rawm pa chix grai hu mai hoik krix ka jhawk simiang yum heue. 7 Pui pa ang rahsee khankix, mawh kheu kix ang simie tix prawng see ka daux pa rahsee, phimap pa yuh kix tak deeh kieh kix laux leeing heue. 8 Pui pa lud krax hu tak hoek dee singai, kaing pa yuh pui mhawm khankix, mawh pa khaw caw heue. 9 Pa yaox ti ot ka daog piang braux nyiex, nie lheu mhawm khaing pa yaox ti ot ka daux nyiex ting mai bun pa simah ka nyiex ting pui hun heue. 10 Pui pa ang rahsee khankix, simie ti yuh ka pa caox mai nawh ang rhawm yuh bwanson ka paox plawg tix. 11 Yam yaox pui pa yuh pa ang cee cag tix kham ka krax ciyang, pui pa ang koe pingnya deeh pon satix ka an mai pui pa koe pingnya yam deeh yaox nawh tix gau mai pingnya nawh koe krax haok hwan heue. 12 Pui pa rahsee chix keud sawn ka nyiex pui pa ang rah ang see mai pui pa ang rahsee khankix, Siyiex tak yuh kix laux kheu phimap pa yuh tix heue. 13 Pui pa thox yhaok mai ang rhawm mhong lox yiiem pa kok yo pui hot sibhawm khankix, yam deeh yiiem kok yo nawh pui tix kaux kawx ang lai mhong. 14 Totaix pa briex tawx, mawh ceu pa kieh nyawm rhawm mai totaix sivoe naok nawh, chix kieh krax pa kied song rhawm grai heue. 15 Krax prawng ca pa rahsee mawh pa gaux rhawm son pui rahsee, viang mawh nan, pui pa yuh pa caox khankix tak hoek krax laux leeing heue. 16 Pui pa lud hu khaing krax pingnya, caw tix ot daux simeeig dee khrawm pui yum paox tix heue. 17 Pui pa gaux rhawm ka alo nex nham, tak hoek krax hot sibhawm mai pui pa miag ka rawm plix siiet mai rawm bee, tak ang chix mi chix koe. 18 Pui pa ang rahsee khankix, mawh sonsang taoh ka pui rahsee mai pa cha nie luan yuh khankix kawx, mawh sonsang taoh ka pui pa rahsee heue. 19 Pa yaox ti ot ka daux tiagtu, nie lheu mhawm khaing pa yaox ti ot mai bun pa dawd rhawm mai pa yie simah ka pui heue. 20 Ka daux nyiex pui pa koe pingnya koe kraung khrai mai bee heue. Phan mawh pui caox khankix, chix kieh uik pak heue. 21 Pui pa sawg ka been pa rahsee mai krax caux rhawm, pon pa im ju pa rahsee mai plakngai sidawng heue. 22 Pui pa koe pingnya khankix, chix haok ka guh veng pa kaux cong mai teei ti tik ka pui ting riang dee deuh pui khankix rhawm heue. 23 Pui pa chix priex jheeh mai dak tix, chix priex ju khwan tix khaing pa kha rhawm heue. 24 Pui yie song rhawm mai pui pa ting rhawm khankix, deuh kix mawh pui pa yuh pa ang cee ang cag heue. 25 Pui pa nieh khankix, mawh kheu nieh yuh kaing, ceu pa simie kix, chix kieh kix yum heue. 26 Nawh kied chix simie ku singaix, phan mawh pui rahsee, ang lai lhawk mai chix gwieh ti tawx ka pui heue. 27 Pa tan pui pa ang rahsee, mawh ceu pa seeing brai heue. Lheu khaing in, phan nawh tan mai rhawm pa ang rahsee, nie lheu seeing brai miex ding? 28 Pui pa kham sakse pa ang mawh ang meh, chix hoek krax laux leeing, pui pa hoik mhong khankix jiet chix krai heue. 29 Pui pa ang rahsee khankix, chix kieh pakngai tix riex reen, phan mawh pui rahsee, chix cox ka krax pa hu tix heue. 30 Pingnya, krax keud krax gau mai pingnya krax tawng yung, ang chix kaux cong sivoe ngai Siyiex tix ceu kawx heue. 31 Viang hoik rien brung son bawg yam sang puing naing kawx, hoik pex mai pon pa nyawm rhawm kheu bwanson Siyiex heue.