1 Pui hot sibhawm pa hawt daux krax rahsee, nie lheu mhawm khaing pui caox pa ah lox kawk vawk heue. 2 Phan rhawm khwan ang koe pingnya tawng yung ang khaw ti ot, caong pui pa hu phai, chix lud hu heue. 3 Mawh kheu kawn pui koe rhawm pa caox, ka daux rhawm nawh, deuh phimap ah lox salao ka Siyiex heue. 4 Pui pa koe sinngao khankix, haoh paox grawm, phan mawh pui hot sibhawm khankix, ang pon yuh paox pie tau mai paox plawg. 5 Pui pa kham sakse pa ang mawh ang lai pon tix luan khaing krax ciyang, awm an, pui pie lhen khankix kawx, ang pon tix luan khaing krax ciyang. 6 Pui haoh hun khankix, chix nyaw glaw lox ka simiang mai pui pa chix tawx totaix kawx, pui ku kaux chix yuh paox pie nawh. 7 Phan mawh pui hot sibhawm can puxaik nawh khankix kawx, koeng ka nawh mai paox grawm nawh khankix, nie lheu via hu singai khaing nawh heue. Viang nawh hawt kok kix kawx, kix mox tix grai khaing nawh heue. 8 Pui pa pon pingnya khankix, moh ka ju khwan tix, pui pa pon pingnya krax tawng yung kawx, tak pon bwanson pa mhawm heue. 9 Pui pa kham sakse pa ang mawh ang meh, ang lai pon tix luan khaing krax ciyang phimap, awm an, pui pie pui lhen khankix kawx, tak hoek krax laux leeing heue. 10 Krax gaux rhawm ang doh keung mai pui caox, lheu khaing an, siliex kawx ang keung tix kwang piang simiang nawh heue. 11 Pui pa chix yuh satix, chix gun yeung ka pa song rhawm tix mai pui pa chix gun yeung ka pui pa lud ka tix, nawh koe min plakngai heue. 12 Krax song rhawm simiang, awm graox sivai sangsi, viang mawh nan, bwanson nawh, awm rawm ciex pa lih piang rib khankix heue. 13 Kawn simex pa caox, mawh pa kieh keeing tix tug rhawm mai moeng pa chix brax simah lawlawx, awm jah rawm lhiex pa lih tix jah hoik tix jah heue. 14 Nyiex, sinngao, kraung khrai, mau khri, mawh sin pa pon khaing miex keeing, viang mawh nan, moeng pa koe satix mawh sin pa caux rhawm Siyiex ti tawx heue. 15 Rhawm pa nieh kieh pui chix luan it, pui pa nieh khankix, yaox tix pon pa cai rhawm heue. 16 Pui pa priex tix hawt ka lox tawm beenli, mawh pui pa priex ka ju khwan tix heue. Pui pa tik ka lox tawm beenli khankix, tak yaox tix yum heue. 17 Pui pa caux rhawm ka pui hot sibhawm, mawh pui pa tawx krax yaog yaing ka Siyiex, Nawh Cao deeh viied bwanson ka pa yuh nawh heue. 18 Yam kawn koe bawg yam, sidiex gau ka kawn simex maix awx. Son ang nawh sang hoek krax laux paw lai sidiex nawh ka daux krax caux rhawm. 19 Pui pa ting rhawm tak pon krax ciyang, phan maix taoh nawh maix tak yaox tix taoh nawh lawlawx heue. 20 Nghiet ka lox pa sidiex gau ka maix mai rieb ti teei ka lox pa tawx riang rao, sonsang mawh maix pui pa koe pingnya singaix pa sang hoek sax. 21 Kawn pui chix keud kuceu ka daux rhawm tix, viang mawh nan, mawh krax keud Siyiex khaing pa kaux cong heue. 22 Phan mawh pui pa koe rhawm sibieh, mawh pa chix yuh bwanson mai pui hot sibhawm, nie lheu mhawm khaing pui chix pie lhen heue. 23 Rhawm pa lhat graung ka Siyiex, mawh pa dex dawd mai pa im ju, pui pa koe rhawm yuh nan, koe krax fah rhawm mai nawh ang yaox krax khi rhawm. 24 Pui pa nieh khankix, viang taix kix hoik cawk ka daux aw kawx, ang koe rhawm deeh toek taix tix sonsang sau ka daux jheeh tix heue. 25 Phan sivied tix gau ka pui pa yuh pa ang cee ang cag, pui pa ang koe pingnya khankix, tak sang doh keud heue. Phan sidiex gau ka pui pa koe pingnya krax tawng yung nawh nie lheu koe pingnya heue. 26 Kawn simex pa kieh sin keeing tix nai nawk mai grheu miex tix to, tak yaox ti kham krax kaig tua pa salao pui heue. 27 Kawn simex aux eue, paw lai nghiet ka lox sidiex gau pa sang kieh maix via hu khaing pingnya krax tawng yung awx. 28 Pui pa nieb kham sakse chix yuh pa ang cee ang cag ka been pa rahsee mai jheeh pui pa ang rahsee khankix kawx chix bleet tix ih ka phimap heue. 29 Hoik rien ti deuh krax ciyang ka son pui pa yuh pa ang cee ang cag mai hoik rien ti deuh saux pa sivied son blawg pui pa caox khankix heue.