1 Ih ex blah tix gum ka daux pa khaw caw, nie lheu mhawm khaing ih priex tan, pa naog ka daux nyiex ma pa simah ka paox tix heue. 2 Siliex pa koe pingnya, yaox ti giex kaing piang kawn simex pa yuh krax kaig tua, pon sin tau mai kawn pui tang kaux heue. 3 Pa cheuk cheu ti yaox ka mau khri mawh ngu. Pa cheu ti yaox ka rhawm kawn pui mawh Siyiex heue. 4 Pui pa yuh pa ang rahsee khankix, chix yum rhawm ka lox pie lhen, pui pie kheem kawx, chix nghiet ka lox pa seeing brai heue. 5 Pui pa nieb yuh pa ang cee cag ka pui hot sibhawm khankix, map ka Siyiex Cao phan Cao deuh nawh, pui pa gaux rhawm ka yaox pui tang kaux krax khi rhawm, ang pon luan khaing krax ciyang phimap. 6 Kawn saux kawn sex mawh mhok khri ka pui pa riex ju, min plakngai kawn praix mawh keeing kix heue. 7 Lox pa mhawm ang doh keung ka pui caox, lheu khaing in, lox pie lhen, ang doh khaw ka simiang. 8 To taix awm siang pa mhawm sivoe cao pa pon, tak pex hu can dee vai ngai tix heue. 9 Pui pie kheem ka phimap, pa lud ka pui tang kaux, mawh pui pa sawg ka krax moh krax rhawm heue. Viang mawh nan, pui pa mie ti deeh krai pa lud pui tang kaux, mawh pui pa kieh paox grawm gwieh paox tix heue. 10 Lox pa sidiex gau tix gum ka pui pa koe pingnya, nie lheu mhawm khaing pa sivied tix yieh taix ka pui caox heue. 11 Pui pa tieh feen khankix chix khrawm ti deuh pa ang rahsee khaing, mawh kheu nan, ploi kawncau pa caox hu ka nawh heue. 12 sipup ka krih miex pa grai kawn, nie lheu mhawm khaing sipup ka pui caox yam lih song rhawm nawh heue. 13 Pui pa ang tawng ka bwanson mai pui pa deeh pawk ceu pa ang mhawm khankix, pa caox koe daux nyiex ma nawh jheung jheung heue. 14 Yam jah krax simah awm pa doh guh rawm nhawng, sivoe ang nyang koe krax simah, nied via hu khaing aw aw. 15 Pui pa ploi phimap ka pui pa ang rahsee mai pui pa ciyang phimap ka pui pa rahsee, Siyiex seeing ka kiex khawm ra heue. 16 Pui caox pa ang simie ka pingnya, tawx ngawh cuyi pingnya ka nawh chix koe bwanson yuh ka mawx? 17 Paox grawm chix moh paox tix jheung jheung, puxaik keh sonsang teem ka paox tix yam yaox krax kha rhawm heue. 18 Pui pa ang koe pingnya, dieh taix mai chix kham sivoe ngai paox grawm heue. 19 Pui pa moh pa simah khankix, mawh pui pa nie lheu moh ka pa cha nie luan yuh phimap heue. Pui pa yuh diang siviex tix ting lhaong khankix, sawg ka krax laux leeing heue. 20 Pui pa vawk rhawm khankix, ang chix yaox ka ceu pa mhawm mai pui pa pie lhen khankix, chix yaox ka ceu pa khi rhawm pa caox heue. 21 Pui pa kieh keh ka pui caox, chix kieh tokaux tix laux rhawm heue. Kawn pa caox ang chix yuh ceu pa gaux rhawm son keeing tix. 22 Rhawm rhi pa chix gaux rhawm, chix kieh nyawm ot heue. Khwan pa chix laux rhawm, Kieh si-ang chix ceh rham heue. 23 Pui pa ang rahsee khankix, chix cawk ti teei mau daux hau pui mai chix yuh laux ka pa rahsee heue. 24 Pingnya koe sivoe ngai pui pa koe pingnya krax tawng yung khankix mai ngai pui caox khankix chix lulie tix jhak tom sidah haktiex heue. 25 Kawn simex pa caox chix kieh keeing tix khi rhawm mai chix kieh miex tix laux rhawm heue. 26 Ang mhawm tix ciyang ka pui pa rahsee, ang mhawm tix chuh ka simiang pa prawng see rahsee. 27 Pui pa grum naog krax keud ang chix haoh lox mai pui pa koe pingnya krax tawng yung, chix deuh rhawm tix nhim yiien mhawm heue. 28 Pui caox kawx, phan chix ot nhim mhawm mhawm, pui ce kix mawh pa koe pingnya krax tawng yung heue. Pui pa ang vaoh jheeh tix sikah kawx, pui tang kaux ce mawh pa koe pingnya krax tawng yung heue.