1 Siyiex seeing ka jiang pa ang khaw, kla jiang pa khaw caw mawh pa khaw rhawm Siyiex heue. 2 Yam ting rhawm, lih mawh krax kaig tua mai pui pa awn rhawm khankix, mawh pa koe pingnya heue. 3 Ceu pa rahsee, thong gau ka pui pa rahsee khankix heue, ceu pa kawk vawk rhawm khankix, cha nie luan yuh mai hoek krax laux leeing heue. 4 Sinngao kraung khrai khankix, ang chix tawx bwanson singaix bawg yam lih song rhawm ex, phan mawh ceu pa rahsee, chix taoh ex khaing pa yum heue. 5 Krax pa rahsee, thong gau ka pui pa grum naog pa rahsee, pui pa ang rahsee khankix, yaox ti som nai ka pa ang rahsee ka ceu pa yuh tix heue. 6 Rhawm pa rahsee, chix taoh ka kix pui rahsee khankix heue, mai pui pa cha nie luan yuh khankix, deeh krix ka jhawk pa luan yuh tix heue. 7 Yam yum pui caox khankix, pa krox jun nawh tak hoek krax laux leeing mai pui pa ang rahsee khankix, viang kix simie ti pon kawx, hoek krax laux leeing heue. 8 Pui rahsee khankix, tak luan hu khaing pa khi rhawm mai pui pa ang rahsee, tieh ti deeh kham tang nawh heue. 9 Jheeh pui pa nieb yuh khankix, chix kieh nyiex paox plawg tix laux heue. Pui rahsee khankix, chix luan khaing see, kheu koe pingnya heue. 10 Phan pui rahsee ting lhaong haok huan tix kaux, pui khawm veng gaux rhawm heue. Yam som nai pui ang rahsee tix kaux, pui lawh maw kah heue. 11 Mawh kheu jheeh pui pa rahsee, tawx bwanson ka veng pa ot nawh an mai pon krax yaogyaw heue. Mawh kheu jheeh pui pa ang rahsee, chix yuh veng an laux leeing heue. 12 Pui pa ang koe pingnya, chix yuh pa ang cee ang cag ka paox plawg tix mai pui pa koe pingnya krax tawng yung chix ot yiien yawg tix heue. 13 Pui pa lailing mai krai lox tom nie, chix plak jhi doh ka ceu pa caw ti mox khankix mai pui pa kaux sijax khankix, chix mox mhawm mhawm heue. 14 Phan pui pa koe pingnya ang koe, krax tawng yung, pa chix tawx krax keud gau, pui haktiex khankix, som nai heue. Phan koe cao pa tawx krax keud krax gau tom nie, pon ti luan khaing krax lhat graung heue. 15 Pui pa kham tang see pui pa ang nawh meed nawh tawng, nawh tak yaox ti kham tom nie heue. Pui pa koeng ka see dieh taix paox tix ang koe krax khi rhawm. 16 Bun pa chix priex rhawm tix, pon min plakngai mai simex pa ting riang rao chix pon sinngao mau khri heue. 17 Pui pa chix caux rhawm, nawh chix yuh bwanson ka tokaux tix mai pui caox pui caig chix laklheet ka tokaux tix heue. 18 Kaing pa yuh pui pa ang rahsee, ang chix kaux cong mai pui pa rhuat simie pa rahsee, tak pon bwanson pa kaux cong heue. 19 Awm dex dawd pa rahsee ka ju pa im mai pui pa hawt ti sawg phimap kawx, chix sawg tom sidah yum tix heue. 20 Pui pa vawk rhawm khankix, Siyiex seeing ka kix heue. Pui pa hawt hu daux krax pa rahsee, Nawh Cao khaw rhawm ka kix heue. 21 Pui caox khankix, viang kix yuh cub caw kawx, ang pon ti luan khaing krax ciyang phimap, simie ceu cad pui rahsee khaing, pa pon tix luan khaing krax ciyang heue. 22 Bun pa ang koe satix mai pingnya, viang mhawm grang kawx, awm lig miex pa tauk ih kraung mau khri ka toh meeh nawh heue. 23 Pui rahsee krox jun mai sawg ka ceu pa mhawm khaing mai pui pa ang rah ang see krox jun ka pa dex dawd mai pa song rhawm heue. 24 Pui pa gwieh ti tawx ka pui, tak baox deeh koe sinngao mau khri tom nie mai pui pa khrawm ti deuh, baox deeh hot hu ka koe. 25 Pui pa chix gwieh ti tawx ka pui, nawh tak mi koe heue. Pui pa see rawm ka pui tang kaux, nawh deeh pon bwanson pa deeh see ka tokaux tix heue. 26 Pui pa khrawm ti deuh nghox, nawh tak yaox ti kham ka pa jhax lawg pui khankix heue. Ka piang cao pa coh ih nghox koe bwanson pa mhawm heue. 27 Pui pa coca ti sawg ka ceu pa mhawm, tak pon bwanson heue. Pui pa sawg ti yuh pui laux, tokaux nawh tak hoek krax laux leeing heue. 28 Pui pa deuh rhawm ka sinngao mau khri tix, tak som nai heue. Pui rahsee tak awm lhax khaox pa klai jheung jheung heue. 29 Pui pa kieh nyiex ma tix sivix, pon ka sin bhaung, pui pa caox khankix kawx, tak yaox ti yuh siliex ka pui pa koe pingnya heue. 30 Plix pui pa rahsee, plix nawh mawh num plix pa im ju heue. Pui pa pon ka ju pui khankix, mawh pui pa koe pingnya heue. 31 Jhak heue, pui pa rahsee, yam ot kix piang haktiex, yaox ti kham ka pa ciyang phimap heue. Pui phimap mai pui pa ang rahsee khankix, nie lheu yaox ti kham geu miex ding?Ref 11:31 1Pe 4:18.