2
Khrit Yuh Ti Tiem Mai Yaog Nawh Ting
1 Mawh kheu nan phan koe pa jeeh pa sidiex ka daux Cao Khrit, phan koe pa nyawm rhawm ka daux krax moh krax rawm, phan koe ceu pa yuh paox pie mai Khuan Cao, phan koe ceu pa moh pa caux rhawm,
2 kieh krax gaux rhawm aux grum naog kah, sonsang koe pex rhawm pa awm paox tix mai koe krax moh krax rhawm pa awm paox tix, pa koe rhawm tix mu khaing, pa chix ih rhawm paox tix heue.
3 Paw yuh tix ceu kawx ka daux pa simah simiang, phan ang mawh nan kheu pa nieb yuh grang pa giex going, yuh ka daux rhawm pa tiem mai een tang kaux mawh pa nie lheu mhawm khaing tokaux tix,
4 paw vi jhak ngie ka ceu cie tokaux tix khankix, pex ku kaux jhak ka khawm ceu cie pui tang kaux khankix heue.
5 Kieh rhawm pa hoik koe ka daux Yesux Khrit koe ka daux pex.
6 Viang Nawh cao hoik mawh ka daux riang pakpeung Siyiex kawx, ang lai een lai sawn ceu pa mawh pa sidu mai Siyiex ti mawh pa jhawp ka,
7 viang mawh nan klop ti kieh yi min pakngai tokaux tix mai teei riang pakpeung siliex mai yuh ti lih mawh awm kawn pui,
8 mai yam mawh Nawh riang pakpeung kawn pui, Nawh yuh tokaux tix tiem mai cu nghiet tom geu pa yum, mawh heue, tom yum ka piang khaox lhak heue.
9 Mawh kheu nan Siyiex hoik yaog tix kieh Nawh ting mai tawx ceu kaux pa nie lheu blon ting lhaong khaing can ceu kaux khawmuik ka Nawh heue.
10 Ngawng ku ngawng tak sang grux ngawng ka daux ceu kaux Yesux, can pa koe ka daux meung raoma ang ah, ka piang haktiex ang ah, ka greem haktiex ang ah,
11 Dak ku dak tak sang kham grawng Yesux Khrit mawh Simiang,Ref 2:10-11 Isa 45:23. sonsang mawh min pakngai ka Keeing Siyiex heue.
Kieh Toh Riang Piang Haktiex
12 Mawh kheu nan pa moh aux khankix eue, awm hoik nghiet pex jheung jheung, ang mawh ngie yam ot aux, viang mawh nan yam in yam ang aux ot, pex khaw ti nie lheu yuh sonsang pon krax taoh tix, ka daux pa lhat pa siyaung heue.
13 Siyiex, mawh kaw pa yuh kaing ka daux pex, sonsang koe rhawm ti yuh mai sonsang yuh kaing, son pa caw rhawm Nawh heue.
14 Yuh ku ceu khawmuik ka daux pa ang koe pa bawg be mai pa thung thiang,
15 sonsang lih pex ti mawh pa ang koe dee lud mai pa ang chix lud, Ref 2:15 Pi 32:5.pa mawh kawn Siyiex pa loig, ka sigreung ju pa kawk vawk, pa tieh lud, jhi tokaux pex ka sinax pui pa yuh nin awm ceu pa toh riang ka daux haktiex,
16 mai yaog ti jung gum lox pa im ju, sonsang koe aux ceu pa yaw rangdi kah, ka daux singaix Cao Khrit, pa to aux ang mawh pa giex going mai viang pa nyhap pa yuh aux ang mawh pa giex going heue.
17 Viang sang prauk aux lih ka piang ceu pa tan mai ceu pa tan krax yum rhawm pex, aux gaux rhawm kah mai aux rom ti gaux rhawm tau mai pex khawmuik heue.
18 Awm an pex kawx gaux rhawm mai rom ti gaux rhawm tau mai aux heue.
Timose Mai Epaphrawdit
19 Aux keud pot jun pot ka daux Simiang Yesux ti sang ploi Timose hu ka pex, khaix ang awt rheung, sonsang nyawm rhawm aux khaix tawng aux grawh grawng pex heue.
20 Grawh grawng nawh aux ang koe pui tix kaux kawx pa awm rhawm nawh, pa sang viex khawm rhawm tix keud tete grawh grawng ceu pa dex mai pex heue.
21 Kix khawmuik sawg ceu son cie tokaux tix mai ang sawg ceu son cie Yesux Khrit heue.
22 Pex tawng mhai rug grawng nawh, grawng pa yuh nawh tau mai aux son lox bwan gaux rhawm, awm yuh kawn tau mai keeing heue.
23 Mawh kheu nan aux keud pot jun pot ti sang ploi nawh hu dom mawx dom an, khaix hoik yaox aux ceu pa sang mawh ka aux heue.
24 Aux een rhawm ka daux Simiang, yuh ka mawx tokaux aux kawx sang hoek ka pex khaix ang awt rheung heue.
25 Aux keud pon lox pa ploi Epaphrawdit, puxaik aux mai paox pa yuh aux kaing mai paox pui naing aux, pa mawh kawncau pex pa kia ngien ka ceu pa lo aux,
26 mawh kheu nawh byaong ka pex khawmuik, kied lulax rhawm kah, kheu hoik mhong pex grawng saux nawh heue.
27 Nawh hoik saux tete tom dex sang yum tix, viang mawh nan Siyiex hoik caux rhawm ka nawh mai ang joeng mawh ngie ka nawh, viang mawh nan khawm ka aux kawx, son aux tak ang koe pa khi rhawm piang pa khi rhawm heue.
28 Mawh kheu nan aux nie lheu coca ti ploi nawh hu, yam deeh yaox pex ka nawh, pex tak sang gaux rhawm kah, son krax khi rhawm aux sang moi dieh moi iak kah heue.
29 Mawh kheu nan rieb ti teei nawh ka daux Simiang tau mai krax gaux rhawm khawmuik, yung yi ka pui pa yuh nan,
30 mawh kheu son kaing Cao Khrit nawh dex sang yum mai hoik nyawk ka mawh ka ju tix, sonsang kieh naog, pa kawn cha ka ceu pa yuh pex ka aux heue.