25
Pui Isarelax Ot Haktiex Mawbax
1 Yam ot pui Isarelax khankix ka daux Shittim mai pui khankix jah ti koe pa lud pa vao tau mai kawn bun ceu pui Mawbax.
2 Bun khankix kok pui hoek ka dee yuh kix krax tan ka siyiex tix, pui khankix ih ka pa tan kix mai krub ka siyiex kix.
3 Pui Isarelax khankix rom ti tau mai siyiex Balax Pegurax mai Simiang Siyiex song rhawm ka pui Isarelax khankix,
4 Simiang Siyiex ah nin ka Mose, “Viex cao kaing cao kap khaing pui hun mai teuk teue ka kix pui pa lud ka daux koek sivoe ngai Simiang Siyiex sonsang veeh Simiang Siyiex ka pa song rhawm tix singai khaing ceu pui Isarelax.”
5 Mose ah nin ka cao prawng see pui Isarelax khankix. “Pex ku kaux pah ka pui khankix pa rom tix tau mai Balax Pegurax.”
6 Jhak heue, pui Isarelax tix kaux viex bun pui Midian hoek ka puxaik ti, ka sivoe ngai Mose mai ka sivoe ngai cub pui hun kawn praix Isarelax, yam yiiem grai kix ka diang siviex nyiex gox bwan man bang kum.
7 Yam yaox Phenihat kawn simex Eliza pa mawh kawn simex Arun cao giex kaing li ka an, nawh yaog ti kaoh khaing sinax cub pui hun mai giex pliah tix giang ka daux taix tix,
8 hu ka pui Isarelax ka daux lawg mai suat ka pui Isarelax mai bun an, tom phlat ka kiex khawm ra, mawh kheu nan jhawm saux preng hoik grai khaing pui Isarelax khankix.
9 Pui yum ka jhawm saux preng an koe ra mheen pon rheng kaux heue.
10 Simiang Siyiex ah nin ka Mose,
11 “Phenihat kawn simex Eliza pa mawh kawn simex Arun cao giex kaing li, hoik kieh krax pa song rhawm Aux veeh ti khaing pui Isarelax khankix, mawh kheu kied koe rhawm koe rhi nawh, tau mai krax pa kied koe rhawm rhi Aux daux sinax kix, sonsang ang Aux yuh pui Isarelax hoek daux pa laux leeing, ka daux krax pa kied koe rhawm rhi Aux.
12 Mawh kheu nan maix ah nin, “Jhak heue, aux tawx gumlox sijax mukheu pa nhim ka nawh,
13 gumlox sijax mukheu in tak mawh son nawh mai son doeh ru pa koe khaix nawh, pa mawh gumlox sijax mukheu pa dex dawd mai cao giex kaing li, mawh kheu nawh kied koe rhawm ka son Siyiex mai nawh hoik yuh krax khyox khaw son pui Isarelax khankix.”
14 Ceu kaux pui Isarelax pa hoik pah kix tau mai bun pui Midian, mawh Zimarix kawn simex Salux pa mawh cao kaing daux nyiex ma keeing kix, pa ao min sinax ceu pui Simion khankix.
15 Ceu kaux bun Midian pa hoik pah kix, mawh Khawzabix kawn bun Zurax, pa mawh cao kaing pui pa ao min khaing daux nyiex ma keeing kix pui Midian heue.
16 Simiang Siyiex ah nin ka Mose,
17 “Yuh cuyi ka ceu pui Midian khankix mai pah ka kix, “
18 Mawh kheu kix hoik yuh cuyi tau mai pa pie lhen ka pex, sonsang yuh kix pex laux leeing, ka grawng pa dex dawd mai siyiex Pegurax mai ka grawng bun Khawzabix kawn bun cao giex kaing ceu pui Midian, pa mawh nan kix, pa hoik pah ka daux singaix lih saux preng jao siyiex Pegurax heue.”