15
Krax Tan Nghox Ca Mai Pa Nyaux
1 Simiang Siyiex ah nin ka Mose,
2 “Krai ka pui Isarelax khankix, yam hoek pex ka daux haktiex pa ot tix pa tawx Aux ka pex,
3 pex tak yuh krax tan ka Siyiex, pa mawh krax tan pa yuh ka ngu ang ah, krax tan pa gleeing ang ah, krax tan pa appong ang ah, sonsang grum naog krax tan pa tiextu pex, awm krax tan pa koe rhawm rhi pex ang ah mai pawie pa hoik tat ti deuh khankix, sonsang mawh krax tan pa sioe bhawng pa khaw rhawm Siyiex, khaing mawie mhaing mai pex mhaing ang ah, yung mhaing ang ah,
4 nawh tak viex krax tan tix hoek ka Simiang Siyiex, pa mawh krax tan phawng nghox ca im kao son tix son khaing tix Epha mai phawng nghox ca ceu pa mhawm, pa hoik klao ti tau ka bee pon son tix son, khaing tix heng,
5 mai rawm plix siiet pon son tix son khaing tix heng, son krax tan pa nyaux maix tak khre tau mai krax tan pa gleeing ang ah, krax tan pa appong ang ah, son kawn yung ku mu heue.
6 Son yung mhaing maix tak khre awm krax tan phawng nghox ca im ra son khaing kao son daux tix Epha khaing phawng nghox ca ceu pa mhawm, pa klao ti tau mai bee loe son tix son khaing tix heng,
7 son krax tan pa nyaux maix tak tan rawm plix siiet loe son tix son khaing tix Heng, son krax tan pa sioe bhawng ka Simiang Siyiex.
8 Yam khre maix mawie mhaing tix mu son krax tan pa gleeing, phan ang mawh nan son krax tan pa appong, sonsang grum naog krax pa tiextu pex, phan ang mawh nan son krax tan pa nhim ka Simiang Siyiex,
9 Maix tak viex tix tan phawng nghox ca im loe son tix son khaing tix Epha, khaing phawng nghox ca im ceu pa mhawm, pa kluklao ti tau mai bee tix plak heng tau mai mawie mhaing tix mu,
10 mai pex tak viex rawm plix siiet son krax tan pa nyaux tix plak heng, pa mawh krax tan pa gleeing ka ngu pa sioe bhawng pa khaw rhawm Siyiex.
11 Maix tak yuh awm in ka mawie mhaing ang ah, yung mhaing ang ah, son kawn yung iak ang ah, son kawn pex mhaing ku mu ang ah.
12 Awm diag koe to brie pa khre pex ti deuh, mawh kheu nan pex tak yuh tau awm diag pa koe an ku mu.
13 Can pui haktiex khawmuik, yam yuh krax tan pa gleeing ka ngu, pa mawh krax tan pa sioe bhawng ka Simiang Siyiex.
14 Phan nyo sinie hoek ti peung tau mai pex, phan ang mawh nan pui tix kaux kaux pa ot daux sinax doeh ru pex, phan nawh simie ti yuh krax tan pa gleeing ka ngu pa mawh krax tan pa sioe bhawng ka Simiang Siyiex, kieh kix yuh awm pa yuh pex.
15 Been pa deuh pex son pui hun mai son nyo sinie, tak mawh tix ceu khaing mai been pa caw pex tix priex ka daux doeh ru tix leeing ju, mawh pa yuh ka mawx ka pex tak kieh awm an ka nyo sinie sivoe Simiang Siyiex.
16 Caw ti koe lox tat jhawm prawng mai lox lai beenli tix mu khaing son nyo sinie pa hoek ti peung tau mai pex heue.”Ref 15:16 Krub 24:22.
17 Simiang Siyiex ah nin ka Mose,
18 “Krai ah nin ka pui Isarelax, yam hoek pex ka daux haktiex pa viex Aux pex hoek,
19 yam ih pex priex ka daux haktiex an, pex tak caw tix viex krax tan pa yaogyaw ka Simiang Siyiex.
20 Pex tak yuh blah tix khlawp khaing nghox ca pa liang tix pon, kieh mawh krax tan pa yaog, awm krax tan pa yaog khaing glah nghox, maix tak caw ti tan awm an.
21 Pex tak tawx nghox ca pa liang ti pon ka Simiang Siyiex, sonsang mawh krax tan pa yaog khaing doeh ru pex leeing ju heue.
Lox Tat Son Phimap Pa Ang Yuh
22 Phan pex lud ka daux pa ang bak ti yuh mai ang pon hawt yuh awm lox tawm pingnyap in khawmuik, pa hoik krai Simiang Siyiex ka Mose,
23 awm lox pa hoik tawm Simiang Siyiex ka pex, khaing Mose khawmuik, jah ka singaix tawx Simiang Siyiex lox tawm pingnyap, ka doeh ru pex khankix leeing ju,
24 Phan pui kawn lud ka daux pa ang tix bak ti yuh mai ka daux pa ang pui hun koe krax tawng mai pui hun khankix, tak tan kawn mawie mhaing tix mu, son krax tan pa gleeing, pa sioe bhawng pa khaw rhawm Siyiex tau mai krax tan phawng nghox ca im mai krax tan pa nyaux mai kawn pex mhaing tix mu son krax tan pa pluat ploi phimap awm pa koe been.
25 Cao giex kaing li tak yuh krax khyox khaw son pui hun ceu pui Isarelax khawmuik mai kix tak pon krax pluat ploi, kheu mawh pa lud loe, kix tak viex krax tan tix, krax tan pa gleeing ka ngu ka Simiang Siyiex mai krax tan son phimap kix ka plak sivoe ngai Simiang Siyiex, son phimap pa lud kix.
26 Pui hun Isarelax khawmuik mai nyo sinie pa peung sinax kix tak pon krax pa pluat ploi, mawh kheu pui khawmuik, hoik lud ka daux pa lud loe tix.
27 “Phan pui tix kaux lud ka daux pa lud loe tix, nawh tak tan pex shiang naog num tix mu, son krax tan pa pluat ploi phimap.
28 Cao giex kaing li tak yuh krax pa khyox khaw sivoe Simiang Siyiex son pui pa lud ka daux pa lud loe, yam yuh nawh phimap pa ang bak ti yuh mai yuh pa khyox khaw son nawh, mai nawh tak pon krax pa pluat ploi.Ref 15:27-28 Krub 4:27-31.
29 Maix tak deuh lox tat jhawm prawng tix mu ngie son pui pa lud ka daux krax pa ang tix bak ti yuh tix ceuceu, son ceu pui Isarelax mai son nyo sinie pa hoek peung sinax pex heue.
Lox Tat Son Phimap Pa Kua tix Yuh
30 Phan pui tix kaux kaux kwa rhawm tix lud, pa mawh pui haktiex an mai nyo sinie ang ah, yuh pa ang Khaw ang jiet ka Simiang Siyiex, tak teei ti tik pui an khaing sinax ceu pui nawh.
31 Mawh kheu hoik nunai nawh ka lox Simiang Siyiex mai yieh laux ka lox tawm pingnyap Nawh Cao, tak teei ti tik ka kaw an, phimap nawh tak koe ka piang nawh heue.”
Ciyang Ka Pui Lud Singaix Twah
32 Yam kawn ot pui Isarelax khankix ka daux tiag, kix yaox pui tix kaux kraix khix singaix twah.
33 Pui pa yaox ka cao kraix khix, viex nawh hoek ka Mose mai Arun mai ka cub pui hun.
34 Kix laung nawh, kheu ang kix nyang tawng pa sang yuh tix ka nawh.
35 Simiang Siyiex ah nin ka Mose, “Tak kieh pui an yum tete, cub pui hun tak dheem nawh ka simaox, ka plak praix nyiex bang.”
36 Awm gumlox pa hoik tawm Simiang Siyiex ka Mose, cub pui hun viex nawh lih plak praix nyiex bang mai dheem nawh yum ka simaox heue,
Grawng Ciem Sibex Dha
37 Simiang Siyiex ah nin ka Mose,
38 “Krai ka pui Isarelax khankix, kieh kix yuh ciem taix sibex hawt daog sibex ceep tix, Ref 15:38 Pi 22:12. tom sidah ju ru kix mai sonsang sau ciem tai keei klai raoma hawt daog sibex du daog.
39 Yam jhak pex ka ciem tai sibex an, sonsang mawh pa doh keud ka lox tawm pingnyap Simiang Siyiex mai son ang pex sang hawt yuh awm alo rhawm rhi cao tix mai awm pa khaw ka ngai pex awm pa hoik sax lud pex.
40 Sonsang doh keud pex mai hawt yuh awm lox tawm pingnyap Aux khawmuik mai mawh pui pa singax ka son Siyiex pex.
41 Aux mawh Simiang Siyiex pex, pa hoik viex pex lih khaing meung Ejiptux sonsang mawh Siyiex pex, Aux mawh Simiang Siyiex pex heue.