9
1 Yam hoik hoek khix in tixnga pon ngaix, kawn praix ceu pui Isarelax khankix krawk khrawm paox tix ot tau mai tawx pa ih mai ceep ka man chee rhix mai rhuat phawng tiex piang kaing tix heue.
2 Khaix can pui pa kaoh khaing doeh ceu pui Isarelax khankix, tang tiah tokaux khaing pui tang ceu khankix mai kix yaog ti cung ti krai doh ka phimap tix mai ka phimap keeing kix heue.
3 Ka daux singaix an pon son tix son kix hoik yaog tix cung dee ot dee koe tix mai hoik phat khaing daux phuk lai lox tat jhawm prawng Siyiex kix mai son bawg yam pon son tix son kix hoik krai doh phimap cao tix mai krub ka Siyiex kix heue.
4 Khaix an Yeshu, Banix, Kamelax, Shebanix, Bunnix, Sherabix, Danix mai Khenanix khankix cung ka glawk bawng pui Lewix mai riag yo lox pa kied ting ka Siyiex kix heue.
5 Khaix pui Lewix, Yeshu, Kamelax, Hashabanix, Sherabix, Hodiyax, Shebanix mai Petahix khankix ah nin, “Kaoh cung mai yaogyaw bwanson Siyiex pex leeing ju, kieh yaogyaw ka min ceu kaux pa ting sibrawm Maix Cao, pa hoik ting lhaong piang bwanson khawmuik mai ka daux krax pa yaogyaw heue.”
6 Mawh ngie Maix Cao tix kaux khaing pa mawh Siyiex, Maix Cao yuh raoma piang raoma, tau mai can pa koe khawmuik, haktiex mai can pa koe piang haktiex khawmuik, rawm sigrit sigra mai can pa koe ka daux khawmuik mai Maix Cao hoik priex jhung ka kix khawmuik, can pa koe daux raoma khankix krub ka Maix Cao heue.
7 Maix Cao mawh Siyiex pa hoik laug ka Abram, mai hoik viex nawh lih khaing veng Urax haktiex KaladieRef 9:7 Jah 12:1 mai hoik loh ceu kaux nawh mawh Abraham, Ref 9:7 Jah 17:5
8 Maix Cao hoik yaox rhawm pa kaux sijax nawh ka plak sivoe Maix Cao mai hoik yuh sijax mukheu tau mai nawh, sonsang tawx tix haktiex ceu pui Khanan, ceu pui Hittix, ceu pui Amawrix, ceu pui Pharazi, ceu pui Yebusix mai haktiex ceu pui GerashiRef 9:8 Jah 15:18-21 khankix, ka doeh ru nawh khankix heue. Maix Cao yuh awm gumlox sikah tix khankix, mawh kheu Maix Cao mawh pa rahsee heue.
9 “Maix Cao yaox krax kha rhawm keeing yix ka daux haktiex meung EjiptuxRef 9:9 Lih 3:7 mai hoik mhong lox riag yo kix hawt rawm sigrit sigra raoh heue.Ref 9:9 Lih 14:10-12
10 Maix Cao hoik jhi mhai rug pa daox deng khankix ka Pharaw mai ka cub kawncau nawh khankix mai ka pui haktiex khankix, Ref 9:10 Lih 7:8-12:32 mawh kheu Maix Cao hoik tawng ka jhawm pa ting rhawm ca nyhau kix piang tax du yix heue. Mawh kheu grawng an, Maix Cao hoik koe min ceu kaux tom hoek ka daux in singaix heue.
11 Maix Cao kieh rawm sigrit sigra gwieh tix sivoe kix, sonsang pon tiang kix tix hu sigreung rawm sigrit sigra piang tiex kroh;Ref 9:11 Lih 14:21-29 mai Maix Cao hoik tik ka pui pa yuh krax kha rhawm khankix daux rawm pa kied raux, awm simaox tix lon.Ref 9:11 Lih 15:4-5
12 Lheu khaing an Maix Cao hoik thong kix tau mai rong ngu paiawm mai ponsawm tau mai rong ngu sonsang jhan riang piang krax hu kix heue.Ref 9:12 Lih 13:21-22
13 “Maix cao lih piang gawng Sina mai sikah tau mai kix khaing raoma mai hoik tawx been pa rahsee khankix mai ka lox tat jhawm prawng pa mawh meh, khawm lox lai beenli pa mhawm mai gumlox tawm pingnyap khankix,
14 Maix Cao hoik kieh kix tawng singaix twah pa singax singeh mai hoik tawm ti deuh been jhawm pa khaw caw tix hawt khankix mai lox lai beenli mai lox tat jhawm prawng khankix khaing daux tawm taix Mose kawncau Maix Cao heue.Ref 9:13-14 Lih 19:18-23:33
15 Yam cai rhawm kix Maix cao hoik tawx kix ih blah khaing raoma, Ref 9:15 Lih 16:4-15 yam sang nyaux nie kix rawmRef 9:15 Lih 17:1-7 Maix Cao viex kix nyaux rawm pa kaoh khaing daux rang mai hoik krai sonsang laig kix ti teei haktiex pa hoik tiextu Maix Cao tix tawx ka kix heue.Ref 9:15 Pi 1:21
16 Viang mawh nan kix ku kaux pa mawh keeing ex khankix hoik ting rhawm ca nyhau mai hoik kieh ngawg tix cong mai ang nghiet ka gumlox tawm pingnyap Maix Cao heue.
17 Kix hoik thiang mai ang nghiet mai ang doh keud ka pa daox deng pa hoik yuh Maix Cao ka daux sinax kix, viang mawh nan kix kieh ngawg tix cong mai ka daux pa tieh feen kix, kix hoik yaog ka cao kaing tix kaux, sonsang deeh ing ka dee yuh tix siliex ka daux meung Ejiptux, Ref 9:16-17 Si 14:1-4; Pi 1:26-33 viang mawh nan, Maix Cao mawh Siyiex pa chix pluat ploi phimap mai pa chix tawx bwanson mai krax caux rhawmRef 9:17 Lih 34:6; Si 14:18 mai nhim ka daux pa song rhawm, pa grum naog ka daux krax caux rhawm mai ang lai tik lai vud ka kix heue.
18 Lheu khaing an, kix hoik raug riang kawn mawie tix mu, son tokaux cao kix ah nin, “In mawh siyiex yix, pa hoik viex yix lih khaing meung EjiptuxRef 9:18 Lih 32:1-4 mai hoik yuh pa salao pa kied ting lhaong kawx,
19 viang mawh nan Maix Cao koe krax pa caux rhawm, Maix Cao ang tik vud kix ka daux tiagtu, rong paiawm pa thong ka krax hu kix daux pon singaix ang grai mai rong ngu pa thong kix hu ka daux ponsawm ca jhan riang ka kix, ka daux krax pa tak sang hu kix heue.
20 Maix Cao hoik tawx khwan pa mhawm tix gau ka kix mai ang nyang pluat blah Mannax khaing jheeh kix mai hoik tawx kix nyaux rawm yam sang nyaux nie kix rawm heue.
21 Daux tixpon num Maix Cao hoik priex rhawm kix, ka daux tiagtu kix ang koe pa cud cha tix ceu kawx, kraung ceep kix ang nyang prim mai caong kix ang uah heue.Ref 9:19-21 Pi 8:2-4
22 Lheu khaing an Maix Cao hoik tawx meung haktiex mai ceu pui ka kix mai hoik gwieh veng baux mawx baux an, mawh kheu nan kix hoik rom tix cie haktiex Sihong simiang Heshabon mai haktiex Awga, pa mawh simiang Bashan heue.Ref 9:22 Si 21:21-35
23 Maix Cao hoik kieh kawn praix kix haoh hun, awm simuing raomaRef 9:23 Jah 15:5; 22:17 khankix mai viex kix hu ka daux tiag, pa hoik krai Maix Cao ka keeing kix, sonsang hu kix mai teei ti cie heue.Ref 9:23 Yaw 3:14-17
24 Mawh kheu nan kawn praix kix laig mai teei tix cie haktiex, Maix Cao hoik grheu ti tik pui pa ot daux haktiex an ka plak sivoe kix, pa mawh ceu pui Khanan mai hoik ap tix tawx kix ka daux tawm taix kix, tau mai simiang mai pui haktiex khankix, sonsang pon yuh kix ka kix, awm pa koe rhawm kix ti yuh heue.Ref 9:24 Yaw 11:23
25 Kix rhim ti teei veng pa kaux cong khankix, haktiex pa mhawm phon, nyiex pa naog kraung khrai khawmuik, rawm daux pa hoik kaong tix khankix, sipeem plix siiet, sipeem khaox sanlum khankix mai khaox pa plix pa kied haoh hun heue. Mawh kheu nan kix hoik yaox ti ih tom sak tom kluing tix ka mai gaux rhawm ka daux bwanson Siyiex pa kied ting lhaong Maix Cao heue.Ref 9:25 Pi 6:10-11
26 Viang mawh nan kix ang cu nghiet mai hoik tieh feen ka Maix Cao mai tik vud ka lox tat jhawm prawng Maix Cao plak khaix tix mai hoik pah ka cao jhai Maix Cao khankix, pa sidiex gau kix sonsang veeh tix ing ka Maix Cao mai kix hoik yuh kaing pa salao pa kied ting lhaong heue.
27 Mawh kheu nan Maix Cao hoik ap tix tawx kix ka daux tawm taix pui koeng kix khankix, pa hoik map nai ka kix, mai yam pa kha kix rhawm tix, yam riag yo kix ka Maix Cao, Maix Cao hoik nghiet khaing daux raoma, awm pa kied nie koe krax pa caux rhawm Maix Cao, Maix Cao hoik tawx cao taoh kax kix, pa hoik deeh taoh ti teei kix khaing daux tawm taix pui koeng kix heue.
28 Viang mawh nan khaix hoik laux lee kix tix mhawm mhawm kix hoik baox yuh pa caox caig ka plak sivoe ngai Maix Cao, mawh kheu nan Maix Cao dee ap kix ka daux tawm taix pui koeng kix, sonsang kwang piang kix, viang yuh nan kawx, yam deeh hoek kix mai hoik riag yo ka Maix Cao, Maix Cao hoik nghiet khaing daux raoma mai Maix Cao hoik taoh ka kix tom nie bawg ka daux krax caux rhawm Maix Cao heue.Ref 9:26-28 Cao 2:11-16
29 Viang Maix Cao tawx satix sonsang deeh hoek kix ka lox tat jhawm prawng Maix Cao kawx, viang mawh nan, kix kawn koe krax ting rhawm ca nyhau mai ang cu nghiet ka lox tawm pingnyap Maix Cao khankix mai hoik lud ka grawng krax prawng krax ciyang Maix Cao khankix, Ref 9:29 Krub 18:5 awm pa khaw pui tix kaux, hawt jawh ti yuh mai im ju, kix hoik reek reen klip tix hoik kieh ngawg tix cong mai ang lai nghiet ka heue.
30 Viang mawh nan, Maix cao hoik gun yeung ka kix tom rheeng num mai Maix Cao tawx satix mai sidiex gau kix ka khwan Maix Cao pa kaoh khaing jheeh cao jhai khankix heue.Ref 9:30 2Sim 17:13-18; 2Been 36:15-16 Viang mawh nan kix ang lai nghiet jao in, Maix Cao tom ap kix ka daux tawm taix pui haktiex an khankix heue.
31 Viang yuh ka mawh kawx ka daux krax caux rhawm pa kied ting lhaong Maix Cao, Maix Cao ang nyang yuh kix laux leeing mai ang nyang tik vud ka kix, mawh kheu Maix Cao mawh Siyiex pa grum naog ka pa caux rhawm heue.
32 Mawh kheu nan Siyiex ex eue, Siyiex pa kied ting lhaong, pa kied ting riang rao mai pa koe sibrawm krax lhat graung, pa priex pa jhung ka gumlox sijax mukheu mai krax caux rhawm tix eue, paw kieh krax pa kha rhawm an khankix, mawh pa iak pa lied ka plak sivoe ngai Maix Cao pa hoek piang yix mai ka simiang yix, ka cao giex cao kwang yix mai ka cao giex kaing li yix, ka keeing yix mai ka pui Maix Cao khawmuik, jah ka yam kwang simiang AsurixRef 9:32 2Sim 15:19, 29; 17:3-6; Eza 4:2, 10 ka haktiex tom hoek ka daux in singaix heue.
33 Viang yuh ka mawh kawx Maix Cao rahsee ka can ceu pa hoik lih ti mawh piang yix khawmuik, mawh kheu maix Cao hoik kied kaux sijax tete, viang mawh nan yix hoik yuh pa ang rahsee heue.
34 Cub simiang yix mai cao kwang yix khankix, cao giex kaing li yix mai keeing yix khankix, ang lai priex rien ka lox tat jhawm prawng Maix Cao mai ang lai nghiet ka lox tawm pingnyap Maix Cao khankix mai, ka mhai rug Maix Cao, pa hoik kham Maix Cao mhai rug piang kix heue.
35 Grawh grawng nawh kix ang lai yuh kaing jhaw Maix Cao, ka daux meung haktiex tix, viang Maix Cao tawx bwanson pa mhawm tom nie mai haktiex pa kied vieh, pa mhawm phon ka kix kawx, kix ang lai veeh khaing kaing pa caox caig pa yuh tix heue.
36 “Ka daux in singaix yix hoik mawh siliex, mawh siliex ka daux haktiex tawx Maix Cao ka keeing yix khankix, ka daux haktiex pa yaox yix tix ih ka plix pa mhawm kuceu pa koe khaing tan heue.
37 Mawh kheu jao phimap yix, simiang pa yaog Maix Cao ti deuh piang yix, hoik ghrang tix ih plix pa kied haoh hun ka daux haktiex in khaing yix, mai kwang piang tokaux yix mai piang tobrie yix awm pa koe rhawm kix mai yix ot ka daux pa kha rhawm tix heue.
38 Mawh kheu jao grawng in, yix khawmuik yuh sijax mukheu mai tiiem ti deuh an, mai cub cao kaing pa thong bung yix khankix mai pui Lewix yix khankix mai cao giex kaing li yix khankix, hoik tawk cum piang an heue.