1 Ka daux singaix an kix phat pui mhong ka gumlox phuk lai Mose mai ka daux lai ankix kix yaox krax pa hoik tiiem tix sonsang ang ceu pui Amon mai ceu pui Mawbax khankix, pon laig ka daux sinax cub pui hun cie Siyiex khankix, 2 mawh kheu ang kix rieb ka kawn praix ceu pui Isarelax khankix ka blah mai rawm, kix hoik vai Balam sonsang tieh feen mai jhax lawg ka kix, Ref 13:2 Si 22:1-6. viang mawh nan, Siyiex hoik deeh loh krax pa jhax lawg an, mawh ceu pa nawb bwanson heue.Ref 13:1-2 Pi 23:3-5. 3 Yam hoik mhong kix ka gumlox tat jhawm prawng an, kix hoik gwieh pui hun pa neuex tix tau khawmuik khaing ceu pui Isarelax khankix heue.

4 Sivoe in cao giex kaing li Eliaship hoik koe sibrawm piang lawg krao priex kraung nyiex bwan Siyiex ex khankix mai hoik yuh paox pie tau mai Tobix heue. 5 Hoik khre lawg pa ting tix mu son nawh, ka dee priex kix krax tan phawng nghox ca im mai can ceu pa sioe bhawng, kraung shiao mai nghox ca kao son tix son mai rawm plix siiet pa khraox khawm bee khankix, pa hoik tawm tix sonsang tawx ka pui Lewix cao rhax lai, cao pau siviex mai krax tan khankix son cub cao giex kaing li khankix heue. 6 Viang mawh nan glang yam sinax in khankix, aux ang lai ot ka daux veng Yerusaliem, mawh kheu ka daux bawg yam hoik kwang Atazerit simiang veng Babulon ka haktiex tixngoe ra num tix num, aux deeh hu ka simiang ka daux khaix singaix an aux hoik pon akhwang khaing simiang, 7 Yam hoek aux ka veng Yerusaliem mai yaox ka ceu pa caox caig pa yuh Eliaship son Tobix ka pa khre rien lawg tix mu son nawh ka daux biang nyiex bwan Siyiex heue. 8 Ceu pa kied meet rhawm ka tete, mawh kheu nan aux tom teei ti tik kraung nyiex ma Tobix khawmuik khaing daux lawg heue. 9 Khaix an aux tawx lox sonsang yuh kix lawg singax mai aux hoik deeh viex kraung shiao nyiex bwan Siyiex khankix laig ka daux lawg tau mai krax tan phawng nghox ca im mai ceu pa sioe bhawng khankix heue. 10 Aux hoik deeh tawng ka ang pui LewixRef 13:10 Pi 12:19. khankix nyang bax pon nyum pa khaw tix tawx ka kix pa mawh pui Lewix khankix ku kaux mai cao pa rhax lai pa yuh kaing jhaw khankix mai hoik deeh ing ka tong kaung tix heue. 11 Mawh kheu nan aux hoik ne raw ka cao pa kwang haktiex khankix ah nin, “Nyiex bwan Siyiex lai chix mawh pa tik pa vud ti yuh ka mawh lie?” Aux hoik kraix khrawm pui Lewix tau mai hoik deeh yaog ti deuh kix ka dee ot dee koe kix heue. 12 Khaix pui Yudax khawmuik hoik viex nghox ca, rawm plix siiet pa khraox mai bee khankix pa mawh krax tan kao son tix son hoek ka nyiex krao priex kraung heue.Ref 13:12 Ma 3:10. 13 Aux hoik yaog ti deuh cao pa kwang khankix piang nyiex krao priex sinbwan, pa mawh cao giex kaing li Shelemix mai cao tiiem lai Zadok mai khaing daux pui Lewix khankix tom mawh Pedayax mai khaix kix tom mawh Hanan mawh kawn simex Zakharix, Zakhurax mawh kawn simex Matania heue. Kheu mawh kix pa hoik koe krax pa kaux sijax mai kaing jhaw tom mawh pa sang gwieh tix tawx kraung ka son puxaik kix heue. 14 Siyiex eue doh keud ka aux son grawng in mai paw doh preet ti tik kaing ceu pa mhawm yuh aux khankix, ka pa hoik yuh aux ka son nyiex bwan Siyiex aux mai son kaing jhaw khankix liak. 15 Ka daux singaix yam an aux hoik yaox pui tiblah ka daux haktiex Yudax, pa biiet rawm plix siiet ka daux singaix twah mai paw viex lhiem nghox khankix hoek mai tang rawm plix siiet piang la, khawm sigleem plix siiet mai plix ruh khankix mai kuceu khawmuik, pa hoik viex kix hoek ka daux veng Yerusaliem ka daux singaix twahRef 13:15 Lih 20:8-10; Pi 5:12-14; Ye 17:21-22. mai aux hoik sax tawx satix ka kix sonsang ang kix coh cai lai gee singaix twah heue. 16 Pui veng Turux pa ot ka daux veng Yerusaliem teei kax mai kraung lai kuceu hoek mai coh ka pui Yudax daux singaix twah heue. 17 Khaix an aux hoik ne raw ka cub simiang pa laoh lie pui Yudax khankix mai ah ka kix, “Kheu pex lai yuh ceu pa caox caig yuh nin, sonsang kieh tix singaix twah seeing brai ka yuh ka mawh? 18 “Mawh ang keeing pex khankix hoik yuh awm an mai ang mawh Siyiex pa hoik viex krax laux leeing in khawmuik hoek piang ex mai piang veng in lie? lai kawn baox viex krax song rhawm hoek piang ceu pui Isarelax khankix, pa hoik seeing brai yuh tix singaix twah heue.” 19 Mawh kheu nan ka daux siviex veng Yerusaliem ka daux bawg yam jah praix tix sang faik sivoe singaix twah tix ngaix, aux hoik tawx lox sonsang nyeep kix ka siviex veng khankix mai tawx beeh glawm sonsang ang kix paoh siviex tom hoik luan singaix twah, khaix aux yaog ti deuh kawncau tix khankix tiblah sonsang pau jhak ka siviex khankix, sonsang ang viex beeh glawm pa cien khankix laig ka daux veng singaix twah heue. 20 Mawh kheu nan cao yuh lai geu khankix mai cao coh cao cai kraung kuceu, hoik pan hoik peung ka plak praix veng Yerusaliem been tix bawg ra bawg heue. 21 Tawx satix mai ah nin ka kix, “Pex lai pan peung plak praix guh veng yuh ka mawx lie? Phan pex baox deeh yuh nin, Aux tak giex ka pex, ” jah khaing yam an, kix ang lai hoek tix bawg kawx ka daux singaix twah heue. 22 Aux tawx lox ka pui Lewix khankix, sonsang yuh kix tokaux tix singax mai sonsang hu pau kix ka siviex veng mai sonsang kieh kix singaix twah singax singeh, Siyiex deeh doh keud ka aux, son kaing in mai pluat ploi ka aux, awm koe krax caux rhawm pa kied ting Maix Cao liak. 23 Ka daux singaix an aux hoik yaox ka pui Yudax tiblah pa teei ti moeng ceu pui Ashadok, ceu pui Amon mai ceu pui Mawbax khankix heue. 24 Kawn praix kix tix plak hoik sikax lox ceu pui Ashadok mai ang lai chix sikax lox pui Yudax, viang mawh nan kix hoik sikah ka lox sikax ceu pui mawx pui an heue. 25 Aux ne raw kix, jhax lawg ka kix, sivied kix tiblah, reeig hauk kix mai hoik kieh kix tiextu tix ka Siyiex ah nin, “Pex tak ang pon tawx kawn bun tix mex kawn simex kix mai pex tak ang pon ti teei kawn bun kix mawh moeng kawn simex pex khawm cao pex heue.”Ref 13:23-25 Lih 34:11-16; Pi 7:1-5. 26 Ang mawh Sawlamon simiang ceu pui Isarelax pa hoik lud ka grawng ceu inkix lie? Viang mawh nan, ka daux sinax haktiex pa haoh hun simiang pa awm nawh ang koe tix kaux kawx, pa kied moh SiyiexRef 13:26 2Sa 12:24-25. ka nawh mai Siyiex hoik kieh nawh mawh simiang piang ceu pui Isarelax, viang yuh ka mawh kawx, bun tang praix klawng khankix kawn pon kieh nawh lud heue.Ref 13:26 1Sim 11:1-8. 27 “Mawh khex sang nghiet yix ka krax pa yuh pex, pa caox caig pa kied ting in mai pa lud pex ka Siyiex ex, ka teei pex tix moeng bun tang praix klawng khankix lie?” 28 Pui tix kaux pa kaoh khaing daux cub kawn simex Yoyadax pa mawh kawn simex cao giex kaing li pa ting Eliaship pa mawh kheue SanbalatRef 13:28 Ne 4:1. pui Horonix, mawh kheu aux hoik grheu nawh lih khaing tix heue. 29 Siyiex aux eue, doh keud ka kix, mawh kheu kix hoik seeing yuh grawng pa mawh tix cao giex kaing li mai sijax mukheu pa hoik yuh Maix Cao tau mai cao giex kaing li mai pui Lewix khankix heue. 30 Mawh kheu nan aux hoik kieh kix singax mai hoik kieh kix tang tiah khaing pui tang praix klawng kuceu, aux hoik yaog tix tawx beeh glawm ka cao giex kaing li mai pui Lewix khankix kaux mawx kaux an, ka daux kaing jhaw pa yuh nawh, 31 aux kieh kix viex ti tan khix mai plix khaox plix ox pa liang kix tix pon phao voe hoek ka bawg yam pa hoik tat ti deuh, Siyiex aux eue, doh keud ka aux mai tawx bwanson ka aux liak.