5
Sidiex Piang Gawng
1 Yam yaox Nawh Cao cub pui hun, Nawh haok piang gawng mai khaix hoik ngawm Nawh, kawncau Nawh khankix hoek ka Nawh heue.
2 Nawh Cao ang jheeh tix mai gau kix ah nin,
3 “Pui pa hot daux khuan khankix koe bwanson heue, kheu Meung Raoma mawh cie kix.
4 Pui pa khi rhawm khankix koe bwanson heue, kheu kix tak pon pa nyawm rhawm.
5 Pui pa awn rhawm khankix koe bwanson heue, kheu kix tak pon haktiex.
6 Pui pa cai rhawm son pa rahsee khankix koe bwanson heue, kheu kix tak sak.
7 Pui pa chix caux rhawm khankix koe bwanson heue, kheu kix tak pon ceu pa caux rhawm.
8 Pui pa singax daux rhawm khankix koe bwanson heue, kheu kix tak yaox Siyiex.
9 Pui pa chix kieh raw pa simah simiang ka paox tix kieh yiien khankix, koe bwanson heue, kheu tak kok kix mawh kawn Siyiex.
10 Pui pa hoik kham geu pa tuktiak son pa rahsee koe bwanson heue, kheu Meung Raoma mawh cie kix.
11 Yam pui yuh pa ang khaw jiet ka pex mai tuktiak ka pex mai ah pa caox pa ang mawh meh kuceu grawh grawng pex, kheu Aux, pex koe bwanson heue.
12 Kieh kied gaux rhawm heue, kheu bwanson kied ting son pex ka daux Meung Raoma, kheu hoik tuktiak kix yuh nan, ka cao jhai khankix pa koe glangka pex.”
Kih Mai Pa Riang
(Mak 9:50; Luk 14:34-35)
13 “Pex mawh kih haktiex heue, viang mawh nan phan pa laoh kih hoik grai, kienie, chix deeh kieh laoh yuh ka mawx? Lheu khaing tik plak praix mai pui dig greem caong tix ang koe bwanson tidtix.
14 Pex mawh pa riang haktiex heue, veng pa hoik yuh piang gawng ang pon ti mox.
15 Pui pa tok kawk ngu ang sax sau greem phliex, viang mawh nan, deuh piang pheen, sonsang jhan riang son pui pa ot daux nyiex khawmuik.
16 Awm an kieh pa riang pex jhan riang sivoe ngai kawn pui heue, sonsang yaox kix kaing pa yuh pex pa mhawm mai yaogyaw Keeing pex pa ot daux Meung Raoma.”
17 “Pex paw ce Aux hoek ti yuh lox lai beenli laux mai lox cao jhai khankix, Aux hoek ti yuh laux ang mawh, hoek ti kieh naog heue.
18 Aux krai lox tete ka pex, tom ang haktiex mai raoma nyang bax grai, ngai lai lai beenli viang ki iak miex ding kawx, ang chix grai grhup tix gum kawx, tom hoik mawh grum naog khawmuik.
19 Mawh kheu nan pui mawx ang ah phan nawh lheu gumlox tawm ceu in pa iak khaing paox tix mai gau pui tang kaux yuh nan, tak kok mawh pa nie iak khaing paox tix ka daux meung raoma. Viang mawh nan, pui mawx ang ah phan nawh hawt yuh mai gau pui tang kaux yuh, tak sang kok nawh mawh pa ting ka daux Meung Raoma.
20 Aux krai ka pex, phan pa rahsee pex ang lheu khaing pui tiiem lai mai Pharishie khankix, pex ang tau ti pon laig ka daux Meung Raoma.”
Paw Pah Pui Yum
21 “Pex hoik mhong grawng lox pa hoik krai ka pui ju didix pa ah nin, Maix paw pah pui yum mai kaw pa pah pui yum tee hoek dee ciyang heue.
22 Aux krai ka pex, pui pa song rhawm ka puxaik nawh ku kaux, tee hoek dee ciyang. Pui mawx ang ah, pa ah ka puxaik nawh, tee hoek dee prawng ca cub kuad song cao prawng see khankix mai pui mawx ang ah, pa ah, maix mawh pui brai, tee hoek daux ngu mawnarhok heue.
23 Mawh kheu nan, phan maix viex pa tan ka khu dee tan mai doh keud ka phimap pa deuh puxaik maix tix ceu ceu.
24 Deuh pa tan maix sivoe khu dee tan mai hu ka puxaik maix mai kieh khaw caw paox tix ka ha, khaix an deeh hoek mai tan pa tan maix heue.
25 Yam hu maix krax tau mai kaw pa sang yuh see ka maix, nied ti yuh pa khaw rhawm nawh heue, phan ang mawh nan ha nawh kox teei ti tawx maix ka cao prawng see mai cao prawng see an teei ti tawx maix ka cao giex kaing mai cao giex kaing sau maix daux thawng heue.
26 Aux krai lox tete ka maix, maix ang pon ti lih khaing dee an, sidah ang maix nyang bax hoik plud mau ghoik tix piak heue. Paw lud vao mai moeng kawn pui.
27 Pex hoik mhong gumlox pa hoik ah nin, Maix paw lud vao mai moeng pui
28 Aux krai ka pex, pui mawx ang ah, pa jhak ka bun mai koe rhawm ti sang lud mai nawh, hoik lud vao mai nawh daux rhawm tix heue.
29 Phan ngai khawn dawm maix, kieh maix lud, koh ti tik khaing maix heue. Laux kraung pak peung maix tix ceu nie lheu mhawm khaing laig maix daux mawnarhok khawm kaux tix heue.
30 Phan taix khawn dawm maix kieh maix lud, kid ti tik heue. Laux kraung pak peung maix tix ceu nie lheu mhawm khaing laig maix daux mawnarhok khawm kaux tix heue.”
Grawng Pa Tik Mex Moeng
(Mat 19:9; Mak 10:11-12; Luk 16:18)
31 Viang mawh lox pa krai ti deuh ah nin ka koe, Pui mawx ang ah pa simie ti tik moeng tix, kieh nawh tawx lai grawng hoik hoik lox heue.
32 Aux krai ka pex, pui mawx ang ah phan nawh tik moeng tix lheu khaing grawng pa lud vao nawh, nawh kieh bun an mawh pui lud vao mai pui mawx ang ah pa teei ti moeng bun an nawh lud vao heue.
33 “Pex hoik mhong lox pa hoik krai ka pui ju didix khankix ah nin, Maix paw tiextu ka grawng pa ang mawh meh, yuh pa tiextu maix plak sivoe Simiang heue. Paw tiextu.
34 Viang mawh nan Aux krai ka pex, paw tiextu ceeix kawx, paw tiextu ka raoma, kheu raoma mawh dang ngeung Siyiex heue.
35 Haktiex in kawx paw tiextu kah, kheu mawh ngot dee deuh Nawh caong tix. Veng Yerusaliem kawx paw tiextu ka, kheu mawh veng laux simiang ting heue.
36 Paw tiextu ka kaing tokaux tix, kheu pex ang chix yuh hauk kaing pex, kieh lung kieh paing tix gawng kawx.
37 Kieh lox pex pa mawh, mawh heue, pa ang mawh, ang mawh heue, pa lheu khaing an mawh pa lih khaing pa caox heue. Paw pawk bix.
38 Pex hoik mhong lox pa hoik deuh ah nin, Ngai tix mu son ngai tix mu mai rhang tix plah son rhang tix plah
39 Aux krai ka pex, paw kieh raw ka pui caox heue. Pui mawx ang ah phan simang sibax pex khawn dawm, deeh veeh ka nawh khawm tang plak.
40 Phan pui tix kaux kaux simie ti yuh see ka maix mai teei sibex maix, prux fua maix kawx, baox tawx ka nawh heue.
41 Pui mawx ang ah pa khin maix hu tix lag, hu mai nawh ra lag heue.
42 Tawx ka kaw pa rawg mhaing ka maix mai ka kaw pa sang yaog yaing kawx paw vud tix hu khaing nawh heue.”
Moh Ka Pui Koeng Ka Pex
(Luk 6:27-28, 32-36)
43 “Pex hoik mhong lox pa deuh ah nin, Maix tak moh pui paox plawg paox nyhawm tix mai koeng ka pui pa koeng ka maix heue.
44 Aux krai ka pex, moh ka pui pa koeng ka pex mai rawg bwan, son pui pa tuktiak ka pex heue.
45 Kheu sonsang mawh pex kawn Keeing pex pa ot daux meung raoma, kheu Nawh kieh singaix lih piang pui caox pui mhawm mai Nawh kieh lhiex lih piang pui rahsee mai pui ang rahsee heue.
46 Phan pex moh pui pa moh ka pex ngie, pex tak pon bwanson yuh ka mawx? Pie pui koh mau khankix kawx, yuh nan ang mawh lie?
47 Phan pex nawb pex sikah mai puxaik pex ngie, pex yuh pa lheu khaing tang kaux yuh ka mawx? Pui tang ceu kawx yuh nan ang mawh lie?
48 Mawh kheu nan pex tak grum mhawm, awm grum mhawm Keeing pex piang raoma heue.”