3
1 Ka daux bawg yam an, Yohan cao cubcom hoek mai sidiex daux tiagtu haktiex Yudax, ah nin.
2 “Doh keud ka phimap tix, kheu Meung Raoma dex sang hoek heue.”
3 Kheu mawh kaw in, pa hoik krai cao jhai Isayax lox pa ah nin, “Lox kok yo pui tix kaux daux tiagtu, cox khre krax hu Simiang, yuh krax hu Nawh rahsee heue.”
4 Tokaux Yohan ceep kraung hauk kala-uk mai nhawt maox hak ka nyoi tix mai pa ih nawh mawh sido mai rawm hia tiag heue.
5 Yam an pui veng Yerusaliem mai pui meung Yudax khawmuik mai pa ot sivie siveng rawm Yawdan khawmuik khawm leeing, hu ka Yohan heue.
6 Kix krai doh ka phimap tokaux tix mai cubcom ka daux tawm taix nawh ka daux rawm klawng ting Yawdan heue.
7 Viang mawh nan yam yaox Yohan ka pui Pharishie mai Sadukie khankix hoek sonsang rieb cubcom, nawh ah nin ka kix, “Ceu siuing pa cai eue, mawx nhie pex to sonsang luan khaing pa song rhawm pa tak sang hoek lie?
8 Kieh plix, plix pa keung khaw mai pa doh keud ka phimap tokaux tix heue.
9 Paw keud ti ah ka tokaux tix, Ex koe Abraham pa mawh keeing ex, aux krai ka pex, Siyiex chix yuh simaox in khankix lih mawh kawn Abraham heue.
10 Pie yam in, hoik deuh moe dex riah num khaox mai khaox pa ang plix, plix pa mhawm khankix khawmuik, sang kid taing sau daux ngu heue.
11 Aux cubcom pex ka daux rawm kheu doh keud pex ka phimap tix heue. Viang mawh nan Kaw pa hoek khaix aux lheu ting sibrawm khaing aux, pie kiiep Nawh ang aux keung ti jiang. Nawh tak sang cubcom pex ka daux Khuan Singax mai ngu heue.
12 Ka daux tawm taix Nawh koe bia yib Nawh tak kieh gwang pah nghox tix singax Nawh tak sau nghox ca cie Nawh daux krao mai Nawh tak teei grhip gleeing daux ngu pa ang chix yeet heue.”
(Mak 1:9-11; Luk 3:21-22; Yo 1:31-34)
13 Yam an Yesux kaoh khaing meung Galilie mai hoek ka Yohan ka rawm klawng Yawdan, sonsang cubcom daux tawm taix nawh heue.
14 Viang mawh nan Yohan klat Nawh Cao ah nin, “Aux khaw ti cubcom ka daux tawm taix Maix mai Maix khex hoek ka aux lie?”
15 Yesux pawk lox mai ah nin ka nawh, “Kieh mawh yam in heue, kheu in mawh pa khaw son ex ti sang yuh naog ka pa rahsee khawmuik heue.” Khaix an nawh tom khaw rhawm kah heue.
16 Khaix hoik cubcom ka Yesux, Nawh lih khaing daux rawm dom mawx dom an jhak heue, raoma baoh ka Nawh mai Nawh yaox Khuan Siyiex lih awm sikaux tum piang Nawh heue.
17 Jhak heue, lox lih khaing raoma ah nin, “In mawh Kawn pa moh Aux, pa khaw caw ka rhawm Aux heue.”