1  Jhak heue, Aux ploi cao cau tix hoek mai nawh tak sang cox khre daux krax sivoe aux heue.Ref 3:1 Mat 11:10; Mak 1:2; Luk 1:76; 7:27. Siyiex pa sawg pex ti yaox, tak sang hoek sijaox ka nyiex bwan Nawh, cao cau gumlox sijax mukheu an, mawh pui pa sang khaw rhawm pex kah heue. Jhak heue, Nawh Cao tak sang phai hoek. Siyiex Cao kru naing raoma ah nan heue. 2 Viang mawh nan, mawh pui mawx pa pon kham singaix pa sang hoek Nawh Cao lie?Ref 3:2 Jhi. 6:17. mawh pui mawx pa pon cung yam bleeh Nawh Cao lie? Nawh Cao mawh pa awm ngu cao pa raug lon mau mai awm sipiak cao pa sidaux kraung heue. 3 Nawh Cao tak sang ngawm awm cao pa raug lon mau mai cao pa thi lon mau singax Nawh Cao tak sang kieh kawn simex ceu pui Lewix singax mai thi kix singax awm mau khri, sonsang tan kix ti tawx krax tan ka daux pa rahsee ka Siyiex heue. 4 “Yam an krax tan pui Yudax mai pui daux veng Yerusaliem khankix, tak sang mawh pa khaw rhawm rhi Siyiex, awm ka daux singaix pa prim khankix, awm baux num phao voe khankix heue. 5 Aux tak sang hoek dex pex, son krax ciyang, Aux tak sang mawh cao pa kham mhai rug pa kied phai, ka pui pa chix yuh phi yuh simeed khankix, ka pui pa phit vao, ka pui pa tiextu pie lhen, ka pui an kix, pa kheem ti ih ngawh kaing cao pa pon mau khankix mai ka pui pa yeen ya ti ih ka miexmai kawn doe mai ka pui an kix, pa nieb yuh ka nyo sinie khankix, kheu ang kix koe krax lhat graung ka aux heue. “Siyiex cao kru naing raoma ah nan heue. 6 “Aux mawh Siyiex pa ang chix loh tix heue. Mawh kheu nan, kawn simex ceu pui Yakop khankix eue, Pex ang nyang hoek krax pa laux leeing. 7 Jah khaing daux baux singaix keeing pex khankix, pex hoik via ti hu khaing beenli pa priex pa deuh Aux mai ang priex rien ti hawt ankix. Deeh ing hoek ka Aux mai Aux tak sang deeh ing hoek ka pex. Siyiex cao kru naing raoma ah nin. Viang mawh nan, pex kawn ah nin “Ex tak sang deeh ing hoek ka daux krax pa yuh ka mawx lie?

8 “Pui khiex sang tud rhim kraung cie Siyiex lie? Viang mawh nan, pex hoik tud rhim kraung cie Aux. Pex deeh chawk ah nin, “Ex hoik tud rhim kraung cie Maix ka ceu patix lie? “Mawh khaing ka daux kao son tix son mai krax tan khankix heue.” 9 Pex mawh pa hoik kham krax pa kha rhawm ka krax pa jhax lawg, grawh grawng nawh, pex khawm ceu pui inkix khawmuik hoik tud rhim kraung sinngao Aux heue. 10 Siyiex cao kru naing raoma ah nin, viex kao son tix son khawmuik laig ka daux nyiex krao,Ref 3:10 Krb. 27:30; Si. 18:21-24; Pi. 12:5-7; 14:22-29; Ne 13:12. kieh pa ih koe ka daux nyiex bwan Aux mai cheu ti yaox Aux yuh nin, “Aux paoh ang paoh daux siviex iak raoma ka son pex mai klup krax pa nawb bwanson lih ka piang pex, tom kreh mai ang lai koe dee een heue. 11 “Aux tak sang ah ka ceu pa chix kiied ting ih ka cie pex, son ang nawh lai laux leeing yuh plix simie pa kaoh khaing daux tiex pex mai plix siiet pex, tak ang lai cia sivoe sang teem ka daux tong kaung. Siyiex cao kru naing raoma ah nin heue. 12 “Ceu pui khankix, tak sang kok pex mawh pui pa koe bwanson, mawh kheu haktiex pex tak sang mawh haktiex pa koe krax gaux rhawm. “Siyiex cao kru naing raoma ah nin heue.

13 “Lox sikah pex hoik kied riex ka piang Aux. “Siyiex ah nin, Viang mawh nan, pex kawn ah nin, “Mawh hoik sikah yix lox pa kied riex ceu patix ka piang Maix lie?” 14 Pex ah nin! “Pa yuh kaing krup ka Siyiex mawh ceu pa giex going, pa hoik priex ex ti hawt beenli pa deuh Nawh Cao mai pa hoik lai ling ex ti hu, awm pui pa koe krax khi rhawm khankix, ka plak sivoe Siyiex cao kru naing raoma koe bwanson ceu patix lie? 15 Yam in ex kok pui pa ting rhawm rhi mawh pa koe bwanson mai pui pa yuh ceu pa caox caig, mawh pa hoik yaog ti haok hwan pui ankix pa nyaw ti yaox ka Siyiex pon lawd luan heue.” 16 Yam an pui ankix pa hoik koe krax lhat graung ka Siyiex hoik ra lai krai lox ka paox tix, tix kaux lai tix kaux mai Siyiex hoik nghiet lox ankix heue. Koe phuk lai pa hoik tiiem ti deuh ka plak sivoe Nawh Cao, son pui ankix, pa koe krax lhat graung ka Siyiex mai pui pa koe krax doh keud ka ceu kaux Nawh Cao heue. 17 Siyiex cao kru naing raoma ah nin, “Kix tak sang mawh cie Aux, ka daux singaix yuh Aux kix mawh sinngao pa blon mhawm. Aux tak sang koe rhawm lhawk ka kix, awm lhawk pui ka kawn simex tix pa yuh ti tawx kaing ka son nawh heue.” 18 Yam an pex tak sang deeh tawng ti gwieh sinax pui pa rahsee mai pui pa caox caig, sinax pui pa yuh kaing krub ka Siyiex mai pui pa ang yuh kaing krub ka Siyiex heue.